Ana Tukusakamucisya Catuli Aklistu Acimjetu Ŵasimene ni Yakusawusya?

Ngosi pajitendekwe, Mboni sya Yehofa mwacitema sikusalinganya cikamucisyo kwa Aklistu acimjawo. Kutenda yeleyi kukusalosya kuti tukusanonyelana yisyesyene. (Yohane 13:34, 35; 1 Yohane 3:17, 18) Ana tukusakamucisya catuli?

Tukusapeleka Mbiya. Sala jajikulungwa pajagwile ku Yudeya, Aklistu ŵandanda ŵa ku Antiokeya ŵatumisye cikamucisyo ca mbiya kwa Aklistuwo. (Masengo 11:27-30) M’wejisoni, patumanyilile kuti Aklistu acimjetu kwine kwakwe m’cilamboci akusimana ni yipwetesi, tukusatumisya yakupeleka kupitila mumpingo wakumangwetu kuti twakamucisye ŵandu ŵakusosekwa cikamucisyo mnope.—2 Akolinto 8:13-15.

Tukusakamucisya mwakucilu. Acakulungwa ŵa mumpingo ŵali kwajitendecele ngosiko akusalolecesya kuti ŵamboni wosope apali, soni kuti ali cenene. Komiti ja cikamucisyo komboleka kulinganya ya kupeleka yakulya, mesi gambone gakumwa, yakuwala, pagona, soni mtela. Ŵamboni ŵajinji ŵakumanyilila masengo gane gakwe, akusalipeleka kwawulako jika kukukamula nawo masengo gakamucisya ŵajatendecele ngosiwo, kapena kukulinganya nyumba syakugona ni Nyumba sya Ucimwene syasijonasice. Ligongo lyakutenda yindu mwakamulana mpela likuga, soni kumanyilila yindu kwatupatile ligongo lyakamulila yimpepe masengo, kukusatukamucisya kuti tusonganganye cikamucisyo, soni ŵakamula masengo mwacitemacitema pandaŵi ja ngosi. Atamose kuti tukusakamucisya “acimjetu ŵali m’liŵasa lya cikulupi,” tukusakamucisyagasoni ŵane naga yili yakomboleka, pangajigalila dini jali.—Agalatia 6:10.

Tukusatondoya mwausimu, soni munganisyo. Ŵandu ŵajakwayiye ngosi akusasosekwa citondoyo. Pandaŵi mpela jeleji, tukusapata macili kwa Yehofa, “Mlungu ŵakutulasya mitima josope.” (2 Akolinto 1:3, 4) Mwakusengwa tukusasalila ŵane yajikusasala Baibulo pakwamba ya m’bujo kwa ŵandu ŵali mu yipwetesi, kwasimicisya kuti pacangakaŵapa Ucimwene wa Mlungu ucimasya ngosi syosope syasikusatendekasya ŵandu kulagasika ni kuyiwona yipwetesi.—Ciunukuko 21:4.

• Ligongo cici Mboni sikusatenda yindu mwacitema pajitendece ngosi?

• Ana ŵakulupwice pangosi mpaka twape citondoyo causimu catuli?