Ulombela Uli Mkamulano wa Umi Wosope

Ulombela wa Chiklistu wawukusajenda chenene ukusamchimbichisya Yehofa, soni ŵalombanewo akusasangalala. (Mko 10:9) Kuti Mklistu chasangalale mu ulombela akusosekwa kukuya mfundo sya m’Baibulo pakusagula mundu jwakulombana najo.

Mpaka luŵe lunda kuŵa pachitomelo ali “apundile pa unyamata.” Pandaŵiji yikusaŵa kuti nganisyo syakumbila yagonana sinandipe mwamti mpaka akombole kusagula yindu mwalunda. (1Ak 7:36, NWT.) Akamulichisyeje masengo mwalunda ndaŵi jawo mkanaŵe kulombela. Pandaŵiji alimbisyeje unasi wawo ni Yehofa soni atendeje yakuti akole ndamo syambone. Yeleyi yichakamuchisya kuti chakole ulombela wambone.

Mkanaŵe kwitichisya kulombana ni mundu akusosekwa kumanyilila kaje “umi wamkati” wa mundujo. (1Pe 3:4) Naga akuyiwona yakusawusya yine pachitomelo chawo akusosekwa kukambilana ni mjawojo. Mpela mwayikusaŵela ni maunasi gane gosope, ŵalombanesoni akusasosekwa kuganichisya yampaka amtendele mjawo jwa mu ulombela mmalo mwagambaga kuliganichisya jika. (Afi 2:3, 4) Naga akukamulichisya masengo mfundo sya m’Baibulo mkanaŵe kulombela, yichiŵa kuti akutaŵa fendeshoni jambone ja ulombela wawo.

ALOLELE FIDIYO JAKUTI KOSECHELA ULOMBELA—MBALI 3: ‘AŴALANJILEJE MBIYA SYACHISISOSEKWE.’ KANEKO AJANJE YIWUSYO YAKUYICHISYAYI:

• Ana chitomelo cha mlongoju ni Shane chajendaga uli?

• Ana kaneko mlongoju jwayiweni yindu yapi mwa Shane?

• Ana achinangolo ŵa mlongoju ŵamkamuchisye chamtuli? Soni ana jwatesile chichi pakulosya kuti asagwile mwalunda?