Yindu Yambone Yakusapata Ŵandu Ŵakusampikanila Mlungu

Mtumiki Mose jwaŵechete kuti naga tukusagapikanila malamusi ga Mlungu, jwalakwe chachitutendela yindu yambone. (Detulonomo 10:13; 11:27) Ngatukusampikanila Mlungu ligongo lyakogopa kuti chachituwulaga. Ndamo syambone syakwete Mlungu sikusatutendekasya kuti tumpikanileje. Soni tukusaŵambala kutenda yindu yampaka yimtumbilikasye jwalakwejo. Maloŵe ga Mlungu gakusati, “Kumnonyela Mlungu kuli kugapikanila malamusi gakwe, soni nganigaŵa gakusitopesya.”—1 Yohane 5:3.

Nambo ana pana umbone wamtuli naga tukumpikanila Mlungu? Kwende tulole maumbone gaŵili.

1. KUMPIKANILA MLUNGU KUKUSATUTENDEKASYA KUTI TUŴE ŴALUNDA

Maloŵe ga Mlungu gakusati, “Une ndili Ambuje, Mlungu jwenu jungusinamjiganya, kuti yindu yimjendele chenene, ngusinamlongolela litala lyakwenela kulikuya.”—YESAYA 48:17.

Yehofa Mlungu juŵatupanganyisye akusatumanyilila soni akusatupaga chikamuchisyo chatukusasosechelaga. Naga tukusaka kuti Mlungu atukamuchisye kuŵa ŵalunda, tukusosekwa tulijiganyeje maloŵe gakwe soni tuyikamulichisyeje masengo yatulijiganyisyeyo.

2. KUMPIKANILA MLUNGU KUCHITUKAMUCHISYA KUŴA ŴAKUSANGALALA

Maloŵe ga Mlungu gakusati, “Ŵana upile ali ŵandu ŵakusagapikanila maloŵe ga Mlungu ni kugakamulichisya masengo.”—LUKA 11:28.

Masiku agano, ŵandu ŵajinji ŵakugapikanila Maloŵe ga Mlungu ali ŵakusangalala mnope. Mwachisyasyo, jwamlume jwine jwa ku Spain jwaliji jwangakaŵa kupya mtima soni jwatendelaga ŵandu ŵane yindu yangalwe kupwatikapo ŵamkwakwe. Lisiku line jwalakwe jwaŵalasile ngani jakwamba kuwusimana mtima kwa Yosefe, mwanache jwa Yakobo. Nganiji jalembedwe ni mtumiki Mose. Yosefe ŵamsumisye ni kuŵa kapolo soni ŵamŵisile mundende ligongo lyakumlambuchisya ngani ja unami. Jwalakwe jwapitilisye kuŵa jwakuwusimana mtima, kutenda yindu mwamtendele soni ŵakululuchile ŵandu wosope. (Genesesi chaputala 37–45) Jwamlume jula jwatite, “Kuganichisya chisyasyo cha Yosefechi kwangamuchisye kuŵa mundu jwakuwusimana mtima, jwachanasa nambosoni jwakulitimalika. Yeleyi yingamuchisye kuŵa jwakusangalala.”

Maloŵe ga Mlungu gakusatukamuchisya kumanyilila mwampaka tutendeleje yindu ni ŵandu ŵane. Ngani jakuyichisya jikusala mwampaka tutendele yeleyi.