Kongolela Katende Ketu ka Undumetume—Kulalacila M’malo ga Malonda

Ligongo Cici Kuli Kwakusosekwa: Ŵandu ŵajinji akusamalila ndaŵi jejinji ali mkukamula masengo, m’yoyo, litala lyambone lya kwayicila ni Ngani sya Ucimwene lili kulalicila m’malo gakusakamulila masengogo. Kulalicila m’malo ga malonda kuli kwakusangalasya soni kukwete yakuyicisya yambone, ligongo tukusasimana ni ŵandu ŵajinji soni akusalosya ndamo syambone kwa ŵandu ŵampaka ŵasume malonda. Kuti kulalicilaku kuŵe ni yakuyicisya yambone tukusosekwa kuŵa ŵaganisya cenene soni kawale ni kalisalalisye ketu kaŵeje kambone. (2 Akoli. 6:3) M’yoyo, ndaŵi syosope jwakulolela undumetume akusosekwa kuti ajendeleje ni kulola mwagakwendela masengo gakulalicila m’maloga, soni kuti amanyilileje jwakusalalicila m’malo gelega.

Mwampaka Tutendele:

Akosecele yacakaŵecete kuti yikaŵe yangajigala ndaŵi. Naga tukujigala ndaŵi jelewu tuli mkumlalicila mundujo, lisiku line ngaŵa mkutukunda kuti tuŵecete najo.
Ayiceje pa malopo pandaŵi jele nganatanganidwa ni makasitomala, mwambone, ndaŵi jele jagambile kutanda kwene malondago.
Mpaka yiŵe cenene kutanda ni kuŵeceta ni msyene malondajo. Aŵeje ŵagopoka soni ŵakungulicika. Payice, komboleka kuŵeceta kuti, “Tukunguluka ni ŵandu m’malo gawo ga malonda kwa kandaŵi kamnono, ligongo lyakuti yikusaŵa yakusawusya kuti twasimaneje ku majumba gawo.” Aŵecete mwakata yakoseceleyo, soni ampe kapepala, magasini, kapena buku jilijose jakwete. Pakogopela kutuwanicisya ni ŵandu ŵane ŵa malonda, mpaka yiŵe cenene ngasalila ya mbiya patwapele buku jine jakwe kulekapo naga atuwusisye kwakukusatyocela mbiya syakwendecesya masengo getu.
Naga msyene malondajo ali jwakungulucika komboleka kum’ŵenda kuti tuŵecetane ni ŵane ŵakukamula masengo pamalopo. M’malo gane gakutendela malonda mpaka yiŵe cenene kuwusya naga yili yakomboleka kuleka yakuŵalanga yetu m’malo gakusakungulucila.
Aŵeje ŵaganisya cenene soni ŵakoseka kucenga. Mwambone, naga mundujo akuŵecetana ni kasitomala kapena atanganidwe, mpaka yiŵe cenene kumjembeceya kuti amalisye kumkamucisya mundujo, kaneko ayice pamalopo.

Alinje Kutenda Yakuyicisyayi Mwesi Awuno:

Pakulambila kwawo kwa peŵasa, alinjilile mwakata yampaka aŵecete pakulalicila pamalo gakutendela malonda yampaka ayikamulicisye masengo naga ali ŵaŵendile kuti alalicileje m’malo gelega.