Akamulicisyeje Masengo jw.org mu Undumetume

Webusayiti jetu cili cida capenani mnope cakulalicilila utenga wambone ‘mpaka kumbesi kwa cilambo capasi.’ (Mase. 1:8) Acimsyenenyumba ŵajinji akusalepela kujipata webusayitiji pajika. Ŵajinji akusajimanyilila mundu jwakulalicila jwine ŵasalilile mwampaka ajipatile.

Jwakulolela mkuli jwine ŵaŵisile kafidiyo kakuti, Ligongo Cici Tukusosekwa Kulijiganya Baibulo? pa foni jakwe. Jwalakwe akusajilosyaga kwa ŵandu ŵasimene nawo. Mwambone, payice panyumba akusaŵeceta kuti: “Nguŵecetana ni ŵandu mwakata pakwakamucisya kupata kwanga kwa yiwusyo yitatu yakusosekwayi: Ligongo cici pacilambopa pana yipwetesi yejinji? Ana Mlungu tacimasya catuli yipwetesiyi? Ana mpaka tuyipilile catuli pandaŵi ajino? Kafidiyoka kakwanga yiwusyo yeleyi.” Kaneko, jwalakwe akusatanda kumlosya kafidiyoko kupitila pafonijo. Kafidiyoka kali kakusangalasya mnope mwati ŵandu ŵajinji akusatenda nako lungw’anu kutandila pandanda mpaka kumbesi. Kaneko jwakulolela mkulijo akusaŵeceta kuti: “Mwakamulana ni yapikene pelepa, ali ŵakomboleka kuŵenda lijiganyo lya Baibulo pa Intaneti. Ana mpaka nalosye mwatukusatendela lijiganyo lyeleli?.” Msyenenyumba pajiticisye, jwakulolela mkulijo akusamlosya mwakusatendela lijiganyo lya Baibulo pakamulicisya masengo kabuku ka Ngani Syambone. Naga msyenenyumba yimtupile yakutenda, akulangana yakuti cayicesoni. Jwakulolela mkuliju pakupumula akutendasoni yilayila ni jwalijose jwatemi pakuŵandika panyuma pakumpa moni. Nambi uli wawojo, ana akusakamulicisya masengo jw.org mu undumetume wawo?