Ajawuleko Mwacitemacitema

Patwagambile kujilinganyasoni webusayiti jetu, ciŵalanjo ca ŵandu ŵakuŵenda majiganyo ga Baibulo cikutupilatupila. Ŵane akusaŵendaga majiganyo ga Baibulo kupitila m’matala gane gasambano gakulalicilila. Mundu paŵendile lijiganyo lya Baibulo kupitila pa jw.org, ofesi ja nyambi mwacitemacitema jikusatumisya cimanyisyo kwa acakulungwa ŵa kumkuli kwakutama mundu jwalung’wanujo pali papite masiku gaŵilipe kutyocela pa lisiku lyaŵendile lijiganyolyo. Nambo malipoti gakulosya kuti ŵane ŵaŵaŵendile lijiganyo lya Baibulo akusajembeceya kwa yijuma yejinji ŵamboni mkanajawule kukuwonegana nawo. Ana mpaka tutendeje uli kuti twakamucisyeje ŵandu ŵeleŵa mwacitemacitema?—Maliko 4:14, 15.

Naga mundu jwalosisye lung’wanu ngakusatama mumkuli wawo, mwacitemacitema alembe fomu ja Akawonegane ni Mundu Aju (S-43) ni kujipeleka kwa Mlembela jwa mpingo wawo cijuma cicoco. Mlembelajo cacitumisya cimanyisyoci ku mpingo wakuŵajilwa kapena ku ofesi ja nyambi lisiku lilyolyo kapena lisiku lyakuyicisya mwakwamba kutowanya palembile kuti Mpingo pa jw.org. M’yoyo, acakulungwa akusasosekwa aloleje pa webusayitiji ndaŵi ni katema kuti amanyilileje naga pana jwine jwakusosekwa kumkamucisya mwacitemacitema. Jwakulalicila jwalijose jwamsalile acakulungwa kuti ajawule kukuwonegana ni mundu jwalung’wanu akusosekwasoni kwawulako mwacitemacitema. Naga amsimene mundujo ali atyosile pamlango, komboleka kuleka utenga kapena nambala jawo ja foni.