Pandaŵi jaŵalamulilaga Mlungu, yakupanganyidwa yosope yaliji yakamulana soni yatamaga mwamtendele

Ligongo Chichi Tukusosechela Uchimwene wa Mlungu?

Yehofa ni juŵaliji Jwakulamulila chilambo chosope paŵapanganyisye Adamu ni Hawa. Jwalakwe jwalamulilaga mwachinonyelo. Nambosoni jwapanganyisye malo gambone mumgunda wa Edeni kuti ŵandu atamejemo. Ŵapelesoni yakulya yejinji. Kupwatika pelepa, ŵapelesoni masengo gambone gakuti akamuleje. (Genesesi 1:28, 29; 2:8, 15) Ŵandu akakwete umi wakusangalala akapitilisye kupikanila ulamusi wa Mlungu.

Adamu ajigele chisogosi chiŵalekasisye kuti akalya chachijigele kwa Hawa. — Ŵandu ŵandanda ŵakanile Ulamusi wa Mlungu

Baibulo jikusasala kuti lilayika line, lyalyaŵele Satana, lyajimuchile ulamusi wa Mlungu. Satana jwasasile kuti ŵandu mpaka aŵe ŵakusangalala mnope atamose ali ngakulamulidwa ni Mlungu. Chakutesya chanasa chili chakuti, achinangolo ŵetu ŵandanda Adamu ni Hawa, ŵampikanile Satana mwamti ŵamjimuchile Mlungu.—Genesesi 3:1-6; Chiwunukuko 12:9.

Ligongo lyakuti Adamu ni Hawa ŵakanile ulamusi wa Mlungu, ŵajasile upile wakutama mu Paladaiso nambosoni chembecheyo chakutama ni umi wamlama mpaka kalakala. (Genesesi 3:17-19) Yaŵatesileyi yakwayiyesoni ŵanache ŵawo wosope. Baibulo jikusasala kuti ligongo lyakuti Adamu ŵalemwisye, “ulemwa wayiche pachilambo chapasi . . . nipo ulemwawo wayiche nacho chiwa.” (Aloma 5:12) Ulemwa wayikasisyesoni chakusawusya chine chekulungwa. Chakusawusyachi chili chakuti ‘mundu akusamlamulilaga mjakwe mwangalwe kapena kuti mwangasa.’ (Jwakulalichila 8:9) Kuŵecheta kwine mpaka tujile kuti, ŵandu pakulilamulila pakusaŵa yakusawusya yejinji.

KUTANDA KWA ULAMUSI WA ŴANDU

Nimulodi ajimi mwakulikwesya. Kunyuma kwakwe ŵandu akukamula masengo gakutaŵa. — Nimulodi jwajimuchile ulamusi wa Yehofa

Baibulo jikusasala kuti mundu jwandanda kwalamulila achimjakwe jwaliji Nimulodi. Jwalakweju jwajimuchile ulamusi wa Yehofa. Kutandila mu ndaŵi ja Nimulodi, ŵandu aŵele ali mkukamulichisya masengo udindo wawo pakwalagasya ŵane. Yaka 3,000 yipiteyo, Mwenye Solomoni jwalembile kuti, ‘Nawenisoni ŵandu ali mkulagasidwa pa chilambo pano. Jemanjajo ŵaliji mkulila, nambo paliji pali pangali jwalijose jwakuti ŵamyalasye jemanjajo, ligongo lyakuti ŵiŵaliji mkwalagasya jemanjajo ŵaliji ŵamachili mnope.’—Jwakulalichila 4:1.

Yeleyi ni yayikutendekwasoni masiku agano. Mu 2009, magasini jine (United Nations) jasasile kuti ŵandu akupitilisya kuwuwona ulamusi wangasa kuti “ni wawukutendekasya yakusakala yosope pachilambopa.”

NDAŴI JAKUTI MLUNGU ATENDEPO KANDU

Chilambochi chikusosechela ŵakulamulila ŵambone soni boma jambone. Yeleyi ni yakusaka Mlungu juŵatupanganyisye.

Chiwulili: Yakuyichisya ya maboma ga ŵandu. 1. Jwamkongwe jwa ku Asia atemi malo gakunyalaya ali akajigele kamwanache kakakulila. 2. Jwamlume jwachikulile jwakulwala agonile pa bedi kuchipatala. 3. Asilikali akugombela uti pali kungondo. 4. Ŵandu akutenda yiwoneselo ali ajigele yikwangwani. 5. Jwamko ngwe ni mwanache jwakwe ajimi kusa kwa nyumba jawo soni ligalasi lya litanga lyawo likasidwe. 6. Msinda wegumbale ni lyosi lyakutyochela mmafakitale soni ndambo syamagesi. — Atamose ulamusi wa ŵandu wakuwoneka kuŵa wambone, ulepele kumasya yakusawusya yekulungwa ya ŵandu

Mlungu ŵatamilikasisye Uchimwene, kapena kuti boma, jajichijinjila mmalo mwa maulamusi gosope ga ŵandu, nambosoni “Uchimwene welewo pewo tiwuchiŵa mpaka kalakala.” (Daniele 2:44) Uchimwenewu ni waŵele ŵandu ali mkuwupopelela kwa yaka yejinji. (Mateyu 6:9, 10) Nambo ngaŵa kuti Mlungu chachilamulila jika mu bomaji. Mmalo mwakwe, jwalakwe jwasagwile mundu jwine jwaŵatemipo ni ŵandu, kuti aŵe Jwakulamulila. Ana mundu jweleju ali ŵani?