Yehofa Akusajiwona “Ami” Jwetu Kuŵa Jwakusosekwa

“ŴANDU WOSOPE TACIJANGA KUTI, ‘ELO, YIŴE MYOYO.’”

Liloŵe lyakuti “ami” likusagopolela kuti “yiŵe myoyo” kapena “yisyene.” Liloŵeli likusatyocela ku liloŵe lya Cihebeli lyalikusagopolela kuti “kuŵa jwakulupicika.” Ndaŵi sine, likusakamula masengo pa magambo. Nambosoni panyuma pakuti mundu atesile cilanga, pambesi pakwe jwalakwe jwasalaga kuti “ami” kusimicisya kuti yaŵeceteyo yili yisyene soni cacitenda mwakamulana ni yaŵeceteyo atamose yikole yakuyicisya yamtuli. (Num. 5:22) Naga atesile “ami” pa likuga lya ŵandu, jwalakwe jwakwete magongo gekulungwa gakumtendekasya kusunga cilanga cakweco.—Neh. 5:13.

Cisyasyo cakutesya lung’wanu ca kakamulicisye masengo ka liloŵe lyakuti “ami,” cikusimanikwa pa Detulonomo 27. Panyuma pakuti Aisalaeli ajinjile m’Cilambo Celagucisye, jemanjaji ŵatemi pasikati pa litumbi lya Ebala ni Gelisimu kuti apikanile Cilamusi. Ngaŵa kuti ŵasosekwaga kupikanilape, nambo ŵasosekwagasoni kusala pelanga kuti cacipikanila yiliyose yayili m’Cilamusico. Jemanjaji ŵatesile yeleyi mwakwanga kuti “Ami” panyuma pakuti amanyililesoni yakuyicisya yampaka yipagwe naga ngakupikanila Cilamusico. (Det. 27:15-26) Pamalopa papali lisegwe ligongo lya acalume, acakongwe soni ŵanace ŵaŵajiticisyaga pacaŵalanjidwaga cilamusici. (Yos. 8:30-35) Jemanjaji nganaliŵalila yaŵajanjile palisikuli. Baibulo jikusasala kuti, “Pandaŵi jiŵaliji cijumi Yoswa, ŵandu ŵa ku Isalaeli ŵatumicile Ambuje, nipo panyuma pa ciwa cakwe jemanjajo ŵapitilisye kutenda myoyo ndaŵi josope jiŵaliji umi ŵakulongolela ŵiŵayiweni yosope yiŵatendele Ambuje Aisalaeli.” Yeleyi yikulosya kuti Aisalaeli ŵajendelecele kusunga cilanga cawo.—Yos. 24:31.

Nombe najo Yesu jwakamulicisyaga masengo liloŵe lyakuti “ami” pakusaka kulosya kuti yakusaka kuŵeceteyo yili yisyene. Nambo jwatendaga yeleyi m’litala lyapajika. M’malo mwakuti jwalakwe ajile kuti “ami” pakwiticisya yaŵecete jwine, jwalakwe jwasalaga liloŵeli mkanasale ciwundo cinecakwe, pakusaka kulosya kuti yakusalayo yili yisyene. Ndaŵi sine jwalakwe jwaŵecetaga mwakuwilisyawilisya liloŵe lyakuti “ami.” (Mat. 5:18; Yoh. 1:51) Mwakutenda yeleyi, jwalakwe jwasimicisyaga ŵakupikanila ŵakwe kuti maloŵe gakwe galiji gasyesyene. Yesu jwakombolaga kuŵeceta mwakusimicisya m’yiyi ligongo lyakuti jwalakwe jwapocele ukumu wakukwanilisya yilanga ya Mlungu.—2 Akoli. 1:20; Ciw. 3:14.

‘ŴANDU WOSOPE ŴAJITICISYE KUTI ‘ELO, YIŴE MYOYO,’ NIPO ŴALUMBILE AMBUJE’

Aisalaeliŵa ŵakamulicisyagasoni masengo liloŵe lyakuti “ami” pandaŵi jaŵamlumbaga Yehofa soni pakupopela. (Neh. 8:6; Sal. 41:13) Kusala kuti “ami” panyuma pa lipopelo, kwalosyaga kuti ŵakupikanilawo akwiticisya yaŵeceteje jwapelece lipopelojo. Wosope ŵaŵasonganaga pamalopa ŵajigalaga nawo mbali. Yeleyi yatendekasyaga kuti kulambila Yehofa m’litala lyeleli kuŵeje kwakusangalasya. Yeleyi ni yayatendekwe pandaŵi jele Mwenye Daudi jwasamisyaga libokosi lya malangano lya Yehofa kwawula nalyo ku Yelusalemu. Panyuma pakutenda cindimba, jwalakwe jwapelece lipopelo lyakutyocela pasi pa mtima lyalyaliji mpela nyimbo jajikusimanikwa pa 1 Mbili 16:8-36. Wosope ŵaŵasongene pamalopa yalimbikasisye ali apikene maloŵega mwamti “wosope ŵajiticisye kuti ‘Elo, yiŵe myoyo.’ Nipo ŵalumbile Ambuje.” Yisyene, jemanjaji ŵaliji ŵakusangalala kumlambila Yehofa pampepe mwakamulana.

Nombenawosoni Aklistu ŵa m’yaka 100 yandanda ŵakamulicisyaga masengo liloŵe lyakuti “ami,” paŵamlumbaga Yehofa. Ŵakulemba Baibulo ŵapwaticesoni yeleyi mu yikalata yawo. (Alo. 1:25; 16:27; 1 Pet. 4:11) Buku ja Ciwunukuko jikusasala kuti yakupanganyikwa yausimu payikupeleka ucimbicimbi kwa Yehofa kwinani yikusasala kuti, “Ami! Kwende tumlumbe Mlungu!” (Ciw. 19:1, 4) Aklistu ŵandanda, kaŵilikaŵili ŵasalaga kuti “ami” panyuma pa lipopelo pandaŵi jakutenda misongano. (1 Akoli. 14:16) Nambope, nganiyiŵa yakuti agambeje kusala liloŵeli mwacisawawa..

LIGONGO CICI “AMI” JWETU ALI JWAKUSOSEKWA?

Sambano tumanyilile yaŵatiga pakukamulicisya masengo ŵandumetume ŵa Yehofa liloŵe lyakuti “ami.” Yeleyi yikutukamucisya kumanyilila ligongo lyakwe kuli kwakusosekwa kumalisya lipopelo ni liloŵeli. Patukupeleka lipopelo lyapajika tukusasala kuti “ami” kulosya kuti tukusimicisya yatuŵeceteyo. Pa lipopelo lyapekuga, patukusala kuti “ami” atamose camumtima, tukusalosya kuti tukukamulana ni yayiŵecetedweyo. Kwende tulole magongo gane gatukusosecela kusala kuti “ami.”

Yikusalosya kuti tukupikanila mwalung’wanu lipopelo, jajili mbali jakulambila kwetu. Ngaŵa kuti tukusalambila Yehofa pakwamba kwiticisyape yayiŵecetedwe mu lipopelo, nambo yatukusatenda lipopelo lili mkati. Ligongo lyakuti tukusakuwona kusosekwa kwakusala kuti “ami,” yicitukamucisya kuŵika nganisyo syetu pa lipopelo soni kutenda yakuŵajilwa lipopelo lili mkati.

Yikusatukamucisya kuŵa ŵakamulana. Pandaŵi ja lipopelo lyapekuga, abale ni alongo wosope akusaŵaga kuti akupikanila yakusala mu lipopelolyo. (Mase. 1:14; 12:5) Patukwanga wosope, abale ni alongo, ni patukusaŵa ŵakamulana mnope. Cinga citusale camumtima kapena mwakwesya maloŵe, “ami” jwetu akusatendekasya kuti Yehofa atutendele yatumŵendileyo.

Tukusamlumba Yehofa. Yiliyose yatukusatenda pakumlambila Yehofa, jwalakwe akusayiwona. (Luk. 21:2, 3) Jwalakwe akusayiwona yakulinga yetu soni yayili mumtima mwetu. Cinga tukupikanila misongano kupitila pafoni, mpaka tuŵe ŵakusimicisya kuti “ami” jwetu Yehofa akusampikana. Patusasile kuti “ami” yikusaŵa kuti tukumlumba Yehofa pampepe ni abale ni alongo ŵasongene ku Nyumba ja Ucimwene ŵala.

Liloŵe lyakuti “ami” mpaka liwoneceje kuŵa lyangali mate, nambo lili lyakusosekwa mnope. Buku jine jagopolela maloŵe gane ga m’Baibulo jasasile kuti, “Kupitila m’liloŵeli,” ŵandumetume ŵa Mlungu, mpaka alosye kuti akwete “cikulupi, ali ŵakulimba mnope soni akwete cembeceyo m’mitima mwawo.” Kwende ndaŵi syosope “ami” jwetu amsangalasyeje Yehofa.—Sal. 19:14.