Pajitendekwe Ngosi Jachilengedwe

Andrew jwa ku Sierra Leone jwatite, “Pandanda twalipikanaga kuti nganitukola chembecheyo chilichose. Yindu yosope yatwakwete yajonasiche pa ngosi ja matope gampela likoko soni kusepuchila kwa mesi.”

David jwa ku Virgin Islands jwatite, “Panyuma pa mbungo jamachili, twawujile kunyumba. Twatengwiche mnope ligongo yindu yosope yajonasiche. Msikana jwetu jwatindiŵele nikutanda kulila.”

NAGA WAWOJO pakwete pakulupwiche pangosi nikuti mpaka ayipikanichisye yindu yakusasimana nayo ŵane pajitendekwe ngosi. Mwambone, ŵandu ŵane akusatenguka, kulepela kwitichisya kuti yatendechele, kubalalika, kulagasika nganisyo soni kusagamila yakogoya. Ŵandu ŵasimene ni ngosi akusatenguka soni ŵangasaka atamose kutenda yindu yakwakamuchisya kuti atende yindu mpela mwaŵatendelaga pandanda.

Naga katundu jwetu jwajonasiche ligongo lya ngosi jachilengedwe, komboleka kuti tukusalipikana kuti nganituŵa tukombwele kupilila. Ligongo lya yeleyi mpaka tutande kuganisya kuti umi wetu nganiwuŵa wakusosekwa. Nambope, Baibulo jikusasala kuti umi wetu wuli wakusosekwa soni mpaka tuŵe ŵakusimichisya kuti tuchikola sogolo jambone.

USYESYENE WA M’BAIBULO UKUSATUKAMUCHISYA KOLA CHEMBECHEYO

Palilemba lya Jwakulalichila 7:8 pakusati, “Mbesi ja chindu jili jambone kulekangana ni ndandililo jakwe.” Patutandite kutenda yindu yakamuchisya kuti tutendeje yindu mpela mwatwatendelaga pandanda mpaka tutande kuwuwona umi kuŵa wangasosekwa. Yindu mpaka yitande kwenda chenene naga tuli mkulinganya yindu paumi wetu mwakuwusimana mtima.

Baibulo jasasile kala kuti, ‘Ngasikupikanikasoni kulila kapena kudandawula.’ (Yesaya 65:19) Yeleyi yichikwanilichikwa pandaŵi jele chilambochi chichichenga nikuŵa paladaiso mu ulamusi wa Uchimwene wa Mlungu. (Salimo 37:11, 29) Ngosi syachilengedwe ngasisipagwasoni. Yakupweteka yosope kupwatikapo kulagasika nganisyo yichimala. Ligongo Mlungu Jwamachiligose jwasasile kuti, ‘Yiyatendeche kalakala ngasayikumbuchilasoni, tiyichiliŵalichika nditu.’—Yesaya 65:17.

Agambe ganichisya, Mlungu alinganyisye yakuti ‘tukole chembecheyo chisyesyene pa yamsogolo’ soni kutama mwamtendele mu ulamusi wa Mlungu. (Yelemiya 29:11) Ana kumanyilila usyesyene welewu mpaka kutukamuchisye kuti tuwuwoneje umi kuŵa wakusosekwa? Sally, jwatumkolasile mu ngani jandanda jula jwatite, “Kulikumbusya yindu yakusangalasya yawuchitenda Uchimwene wa Mlungu, mpaka yitukamuchisye kuti tuleche kuganichisya mnope yayatutendechele pangosi soni kuti tukombole kupilila yakusawusya yatukusimana nayo.”

Mpaka atende chenene ali alijiganyisye yawuchitenda Uchimwene wa Mlungu pachangakaŵapa kwa ŵandu. Kutenda yeleyi mpaka kutukamuchisye kuti tukole chikulupi chakuti atamose tulagasiche ni ngosi syachilengedwe, nambope umi wetu wuli wakusosekwa patukwembecheya ndaŵi jele ngasikupagwasoni ngosisi. Pandaŵi ajino, Baibulo jikusapeleka yindu yakamuchisya kumalana ni yakuyichisya yayikusapagwa ligongo lya ngosi syachilengedwe. Kwende tulole yisyasyo yamnono panganiji.

Malemba ga M’Baibulo Gampaka Gatukamuchisye

Tugoneje mwakwanila.

“Kupumulila panandi kuli chenene kulekangana ni kamula masengo mwakulimbichila ni kuwutusya mbungo.”—Jwakulalichila 4:6, NWT.

Ŵakuwungunya ŵane akusasala kuti mundu pakulagasika nganisyo, “akusayiwonaga kuti yindu ngayikwenda soni kulagasika nganisyoko kukusatupaga naga ali ngakugona mwakwanila.” Myoyo kugona mwakwanila kuli kwakamuchisya.

Twasalileje ŵane mwatukupikanila mumtima.

‘[Kudandawula kwa] mundu kukusaŵa mpela msigo wausito mumtima mwakwe, nambo maloŵe gambone gakusamsangalasya.’—Misyungu 12:25.

Ŵasalileje ŵamwiŵasa mwawo kapena mjawo jwakusamkulupilila mnope. Konjechesya pakwapikanila pakulondesya mwakupikanila mumtima, jemanjaji chachalimbikasya soni kwapa chikamuchisyo chakusosechela.a

Aganichisyeje ya msogolo yindu payichiŵa chenene.

“Pakukuya chilanga cha Mlungu [kapena kuti yaŵasasile Mlungu], tukwembecheya kwinani kwasambano ni chilambo chapasi chasambano, mwele timuchiŵa m’mangwakwe mwachilungamo.”—2 Petulo 3:13.

a Mundu jwakusalagasikaga nganisyo kwandaŵi jelewu mpaka asosekwe kwawula kuchipatala kuti akamkamuchisye.