Ana Akukumbucila?

Ana aŵalasile mwakusamala magasini ga Sanja ja Mlonda gapacangakaŵapa? Kwende tulole naga cakombole kwanga yiwusyo yakuyicisyayi:

Ana yindu mcece yapi yampaka atende kuti ajimbeje cenene nyimbo?

Ajimeje cenene, akakotimisyaga mtwe wawo soni ajikwesyeje panandi buku jawo ja nyimbo. Awuteje lipuje lyakwanila. Awuguleje mnope pakamwa ni kaneko ajimbeje mwamacili.​—w17.11, p. 5.

Ana cici cacikusatutesya lung’wanu ni misinda jakutilila soni misewu jakwe jakwawula kumisinda jakutilila?

Papali misinda jakutilila 6 ku mbali syakulekanganalekangana m’cilambo ca Yisalayeli soni misewu jakwe jaliji jambone. Yaliji yangasawusya kuti mundu akayice mwacitema.​—w17.11, p. 14.

Ana ligongo cici mbopesi jaciwombolo wuli mtuka wambone watupele Mlungu kupunda mituka josope?

Ukusakwanilisya yakusacilila yetu, soni wakwanilisye yakusoŵa yetu ni kutugopola ku ulemwa soni ciwa. Ligongo lyakuti Yehofa ŵanonyele mnope ŵanace ŵa Adamu, jwapelece Yesu kwa m’weji atamose kuti twaliji ŵakulemwa.​—wp17.6, pp. 6-7.

Ana lilemba lya Salimo 118:22 lyasasile yamtuli pakwamba yakwimuka kwa Yesu?

Yesu mpela Mesiya, ŵandu ŵamkanile soni pambesi pakwe ŵawulajidwe. Nambo kuti aŵe “liganga lyakusosekwa mnope lyapandumba” Mlungu ŵamjimwisye ku ŵawe.​—w17.12, pp. 9-10.

Mundaŵi ja m’Baibulo, ana mundu kuti aŵe mumsela wakupagwila Mesiya jwasosekwaga kuti aŵe jwandanda kupagwa?

Ndaŵi sine yaŵaga m’yoyo nambo ndaŵi sine nganiyiŵaga m’yoyo. Mwambone, Daudi nganaŵa mwanace jwandanda jwa Jese nambope akusimanikwa mu msela wakupagwila Mesiya.​—w17.12, pp. 14-15.

Ana yindu yapi yakwayana ni yacipatala yajikusasala Baibulo?

Cilamusi ca Mose, calimbikasyaga kuti ŵandu ŵaŵakwete maulwele gane ŵasosekwaga kwaŵika kwajika, kunaŵa m’miyala panyuma pakuti mundu akamwile mtembo, kusilila yakusakala panyuma pakulikamucisya soni Kum’wumbasya mwanace pali pamasile masiku 8 cipagwile ligongo lyakuti cilu ca mwanace ngacikusajasa miyasi jejinji pandaŵiji.​—wp18.1, p. 7.

Ana ligongo cici kulinonyela mwakuŵajilwa nganikuŵa kulemwa kwa Mklistu?

Tukusasosekwa kwanonyela acimjetu mpela mwatukusalinonyelela acimsyewe. (Maliko 12:31) Acalume ŵalombele akusasosekwa “ŵanonyeleje aciŵamkwawo, mpela mwakusayinonyelela yilu yawo.” (Aef. 5:28) M’yoyo kulinonyela mwakuŵajilwa nganikuŵa kulemwa.​—w18.01, p. 23.

Ana mpaka tutende yamtuli kuti tukule mwausimu?

Tukusosekwa kulijiganya maloŵe ga Mlungu, soni kuganicisya mwakusokoka nambosoni kamulicisya masengo yatukulijiganyayo. Tukusosekwasoni kunda msimu wa Yehofa kuti utulongoleleje soni kusangalala ŵandu ŵane patukamucisye.​—w18.02, p. 26.

Ligongo cici ŵakulupilila ndondwa soni ŵayisango nganaŵa atukamucisye kumanyilila yamsogolo?

Pana magongo gejinji, nambo ligongo lyekulungwa lili lyakuti Baibulo jikusalekasya kulupilila yeleyi.​—wp18.2, pp. 4-5.

Ana mpaka tulosye camtuli kuyamicila mundu jwine patuŵilasile kuti tukakunguluce kumangwakwe?

Naga tujiticisye, tutendeje yindu mwakamulana ni maloŵe getu. (Sal. 15:4) Tukalepelaga kwawula pali pangali magongo gakupikanika cenene, ligongo yeleyi mpaka yimtendekasye konanga yindu soni ndaŵi jakwe pakutukosecela.​—w18.03, p. 18.

Ana abale ŵakwete maukumu mpaka alijiganye cici kutyocela kwa Timoteyo?

Timoteyo jwasamalaga mnope ya ŵandu soni jwaŵikaga yausimu pamalo gandanda paumi wakwe. Jwalimbicilaga pa undemetume wakwe wapajika soni jwakamulicisyaga masengo yalijiganyisye. Jwalakwe jwajendelecele kulijiganya soni kwegamila msimu wa Yehofa. Acakulungwa ŵa mumpingo soni wosope mpaka tulijiganye kutyocela pa cisyasyo cakwe.—w18.04, pp. 13-14.