Ana Akukumbucila?

Ana aŵalasile mwakusamala magasini ga Sanja ja Mlonda gapacangakaŵapa? Kwende tulole naga cakombole kwanga yiwusyo yakuyicisyayi:

Ana abale, mpela ŵakulolela mikuli soni acakulungwa ŵa mumpingo akusosekwa kutenda cici papocele malamusi kutyocela ku likuga lya Mlungu?

Akusosekwa kupikanila mwacitema. Mpaka aliwusye kuti, ‘Ana ngusinalimbikasya ŵane kuti aŵe ŵakulupicika kwa Yehofa? Ana ngusinjanguya kwiticisya nambosoni kamulicisya masengo yatusalile abale ŵakulongolela?’—w16.11, p. 11.

Ana Aklistu ŵaŵele acikapolo mu Babulo Jwamkulungwa cakaci?

Yeleyi yatendekwe panyuma pakuti ŵandumetume wosope awile. Pandaŵiji, acalume ŵaŵaliji ŵakulolela mumpingo ŵatandite kupanganya likuga lya acimlongola. Dini soni boma jalimbikasyaga Ciklistu cakusapuka soni nganapikanila yaŵaŵecetaga Aklistu ŵaŵaliji mpela tiligu. Nambope, caka ca 1914 mkaniciyice, Aklistu ŵasagulwe ŵaliji ali atandite kopoka mu Babulo Jwamkulungwa.—w16.11, pp. 23-25.

Ligongo cici yaŵatesile Lefèvre d’Étaples yaliji yakusosekwa mnope?

M’yaka ya m’ma 1520, Lefèvre ŵagopolele Baibulo mu Cifulenci pakusaka kuti ŵandu ŵajinji akomboleje kuŵalanga. Litala lyaŵakamulicisye masengo pakugopolela Baibulo lyamkamucisye Martin Luther, William Tyndale, soni John Calvin.—wp16.6, pp. 10-12.

Ana ‘kuŵika nganisyo pa yindu ya cilu’ ni ‘kuŵika nganisyo pa yindu ya msimu’ kukusalekangana camtuli? (Alo. 8:6)

Mundu ‘jwakuŵika nganisyo pa yindu ya cilu’ akusanonyela kuŵeceta ya yindu ya cilu. Mundu ‘jwakuŵika nganisyo pa yindu ya msimu’ akusalingalinga kutenda yindu yakusasaka Mlungu kuti tutendeje. Mundu jweleju akusakunda kuti nganisyo syakwe silongoleledweje ni msimu weswela. ‘Kuŵika nganisyo pa yindu ya cilu’ kukusalongolela ku ciwa, nambo ‘kuŵika nganisyo pa yindu ya msimu’ kukusalongolela ku umi ni mtendele.—w16.12, pp. 15-17.

Ana gane mwa matala gampaka gakamucisye kunandiya kulagasika nganisyo ni gapi?

Amalileje ndaŵi jawo pa yindu yakusosekwa, akajembeceyaga yindu yakuti nganiyiŵa yitendekwe, apateje ndaŵi jakutama jika, asangalaleje ni yindu yaŵapanganyisye Mlungu, aŵeje ŵakusangalala, atendeje mang’asi gakulimbisya cilu soni agoneje mwakwanila.—w16.12, pp. 22-23.

“Enoki ŵamsamisye kuti akaciwona ciwa.” (Ahe. 11:5) Camtuli?

Yehofa jwatyosisye umi wa Enoki mwamti nganamanyilila kuti akuwa.—wp17.1, pp. 12-13.

Ligongo cici kulinandiya kuli kwakusosekwa mnope?

Mundu jwakulinandiya akusalimanyilila cenene msyene soni akusamanyilila malile gakwe gakutendela yindu. Tukusosekwa kulolecesya mwele yakutenda yetu mpaka yakwayile ŵane soni tukaliwonaga kuŵa ŵakusosekwa mnope.—w17.01, p. 18.

Ana pana maumboni gamtuli gakulosya kuti Mlungu ŵalilongolelaga likuga lyakulongolela lya m’yaka 100 yandanda, mpela mwakutendelasoni ni wosope ŵali mu Likuga Lyakulongolela lya masiku agano?

Msimu weswela wakamucisyaga kuti apikanicisye usyesyene wa m’Malemba. Ŵalolelaga masengo gakulalicila ni cikamucisyo ca Malayika, soni ŵajegamilaga Maloŵe ga Mlungu kuti galongoleleje. Yeleyisoni ni yayikutendekwa masiku agano.—w17.02, pp. 26-28.

Ana yindu yapi yampaka yitutendekasye kuwuwona mtuka wa ciwombolo kuŵa wakusosekwa mnope?

Yindu yakwe yili ayi: Jwapelece mtukawo, ligongo lyapelecele, mtundu wa mtuka watupele, soni naga mtukawo utukamucisye pa yakusosecela yetu. Kuganicisya yeleyi mpaka kutukamucisye kuyamicila ni mtima wosope mbopesi jaciwombolo, jajili mtuka wekulungwa waŵatupele Mlungu.—wp17.2, pp. 4-6.

Ana Mklistu mpaka acenje yaŵasagwile kala?

Tukusasosekwa kutenda yatwasagwile. Nambope, ndaŵi sine mpaka tusosekwe kuganicisyasoni yatwasagwile kala. Panyuma pakuti ŵandu ŵa ku Ninefe apitikwice mtima, Yehofa ŵacenjile yaŵasagwile kuti ciŵatendele. Mwakulandanamo, ndaŵi sine mpaka tusosekwe kucenga yatwasagwile kala naga yindu yicenjile kapena tupikene yindu yine yasambano.—w17.03, pp. 16-17.

Ligongo cici kusogoda kuli kwakogoya mnope?

Kusogoda mpaka kutendekasye kuti cakusawusya cikule mnope. Cinga jwine atulemwecesye kapena iyayi, kum’ŵecetela maloŵe gakupweteka nganikuŵa kujongwele yindu.—w17.04, p. 21