Ana Mpaka Tumpe Cici Mlungu Jwakwete Kala Cilicose?

1, 2. Ana Yehofa akusiŵakamucisya wuli ŵandu?

YEHOFA ali Mlungu jwakoloŵa magasa. Cilicose catukwete cili cakutyocela kwa jwalakwejo. Yindu yosope ya mu cipago kupwatikapo silifa ni golidi yili ya Yehofa. Jwalakwe akusakombola kusamalila yaumi pakamulicisya masengo yindu yeleyi. (Sal. 104:13-15; Hag. 2:8) M’Baibulo mwana ngani syejinji syakusala yaŵatendaga Yehofa pakwakamucisya ŵandu ŵakwe mwakusimonjesya.

² Kwa yaka 40, Yehofa ŵaŵele ali mkwapa Ayisalayeli mana ni mesi paŵaliji m’cipululu. (Eks. 16:35) Pambesi pakwe, jemanjajo “nganasoŵa cilicose.” (Neh. 9:20, 21) Yehofa ŵamkamulicisye masengo Elisa kuti atende cakusimonjesya cakutupiya mawuta kunyumba ja jwamkongwe jwine jwamasije. Yaŵamtendele Mlunguyi yamkamucisye jwamkongweju kuwusya ngongole syakwe syosope, soni kola mbiya syakamulicisya masengo pamlango ni ŵanace ŵakwe. (2 Maf. 4:1-7) Ni cikamucisyo ca Yehofa, nombenajo Yesu jwakombwele kutupiya yakulya, nambosoni kupeleka mbiya.—Mat. 15:35-38; 17:27.

3. Ana citutagulilane cici mungani ajino?

³ Yehofa akwete cilicose cakamucisya yindu yaŵayipanganyisye. Nambo atamose yili m’yoyo, jwalakwe akusiŵasalila ŵakutumicila ŵakwe kuti akamulicisyeje masengo yindu yawo pakamucisya likuga lyakwe. (Eks. 36:3-7; aŵalanje Miyambo 3:9.) Ligongo cici Yehofa akusasaka kuti tumpejesoni yindu yaŵatupele? Ana ŵandu ŵakulupicika ŵakala ŵakamulicisyaga masengo mwamtuli mbiya syawo pakwakamucisya ŵandu ŵele Yehofa ŵatumaga? Ana likuga lyetu likusakamulicisya masengo wuli mbiya syatukusapeleka? Kwanga kwa yiwusyoyi citukupate mungani ajino.

LIGONGO CICI TUKUSOSEKWA KUMPA YEHOFA YINDU YATUKWETE?

4. Patukukamucisya masengo ga Yehofa, ana tukusaŵa tuli mkumlosya cici jwalakwejo?

⁴ Tukusampa Yehofa yindu yatukwete ligongo lyakumnonyela mnope nambosoni kum’yamicila pa yosope yakusatutendela. Yehofa atutendele yejinji paumi wetu. Pakwasalila ŵandu yindu yayasosekwaga pakutaŵa nyumba ja Mlungu, Mwenye Daudi jwasasile kuti yosope yatukwete yikusatyocela kwa Yehofa, mwamti cilicose catukusampa cikusatyocela pa yindu yaŵatupele kala.—Aŵalanje 1 Mbiri 29:11-14.

5. Ana Malemba gakusalosya wuli kuti kupeleka mwakoloŵa magasa kuli mbali jakusosekwa ja kulambila kusyesyene?

⁵ Kumpa Yehofa yindu yatukwete kulisoni kumlambila. M’mesomkulola, ndumetume Yohane ŵapikene ŵakutumicila ŵa Yehofa kwinani ali mkuti, “Ali ŵakuŵajilwa wawo Yehofa Mlungu jwetu kupocela lumbili ni ucimbicimbi soni macili, ligongo ŵapanganyisye yosope, soni ligongo lyakusaka kwawo yapali soni ŵayipanganyisye.” (Ciu. 4:11) Ana ngatukwiticisya kuti Yehofa ali jwakuŵajilwa kupocela lumbili ni ucimbicimbi wosope kupitila mu yindu yambone mnope yatukwete? Yehofa jwalamwile Ayisalayeli kupitila mwa Mose kuti akawoneceleje kwa Yehofajo pa yindimba yitatu pacaka. Mpela mbali ja kulambila kwawo, pa yindimbayi ŵalamwile kuti akaja ‘kuwonecela kwa Yehofa yalayalape.’ (Deut. 16:16) Masiku aganosoni, kupeleka mwakoloŵa magasa yindu yetu pakamucisya mbali ja pacilambo capasi ja likuga lya Yehofa kuli kwakusosekwa pakulambila. Kutenda yeleyi kukusalosyasoni kuyamicila likugali.

6. Ligongo cici kwagaŵila ŵane yindu yatukwete kuli kwakamucisya? (Alole ciwulili cacili kundanda kwa nganiji.)

⁶ Kwagaŵila ŵane yatukwete kuli kwakamucisyasoni kwa m’weji. Tupeleceje mwakoloŵa magasa, ngaŵa kwambaga kupocela yakutupa ŵane. (Aŵalanje Miyambo 29:21.) Tuganicisye ya mwanace jwele acinangologwe pampele mbiya kuti asumile yakusaka pambesi pakwe akusumasoni kandu ni kwapa acinangolowo. Acinangolowo mpaka asangalale mnope. Mwanace jwakutenda upayiniya ali pamlango pa acinangologwe mpaka ŵapejesoni acinangolo ŵakwe tumbiya twakamucisya ya pamlangopo. Atamose kuti acinangolowo nganajembeceyaga mtukawu, nambo mpaka apocelepe ligongo lili litala lyele mwanace mpaka alosye kuyamicila yakusamtendela acinangologwe. Yehofa nombenajo akusamanyilila kuti kupeleka yindu yatukwete kuli kwakamucisya kwa m’weji.

YAŴATENDAGA ŴANDU KALA PAKUPELEKA

7, 8. Ana ŵandu ŵa Yehofa mu ndaŵi ja Baibulo ŵalosisye cisyasyo camtuli cakupeleka (a) pakamucisya masengo ganegakwe? (b) pakamucisya kulambila kusyesyene?

⁷ Kupeleka yindu nganikutanda lelo. M’malemba mwana ngani syejinji syakulosya kuti ŵandu ŵapelekaga yindu yawo pakamucisya masengo ganegakwe. Mwambone, Mose jwasalile ŵandu kuti apelece yakupeleka yakamucisya pakutaŵa citenti cakulambilila. Nombenajo Mwenye Daudi jwatesile yeleyi pakutaŵa nyumba ja Mlungu. (Eks. 35:5; 1 Mbiri 29:5-9) Mu ndaŵi ja Mwenye Yowasi, ŵambopesi ŵajigele mbiya syaŵapelece ŵandu ni kulinganyicisya yindu yayajonasice pa nyumba ja Yehofa. (2 Maf. 12:4, 5) Mpingo wandanda wa Ciklistu pawapikene yakuti jikwika sala, ‘jwakulijiganya jwalijose jwasimicisye mtima kutumisya cikamucisyo cilicose campaka akombole kwa abale ŵaŵatamaga ku Yudeya.’—Mase. 11:27-30.

⁸ Ndaŵi sinesoni, ŵandu ŵa Yehofa ŵapelekaga yindu kwa ŵandu ŵaŵalongolelaga pakulambila. Mwakamulana ni Cilamusi ca Mose, pakugaŵa malo kwa ngosyo syosope sya Ayisalayeli m’Cilambo ca Cilangano, Alefi nganapocela cilicose. M’malo mwakwe, Ayisalayeli ŵapaga calikumi. Yeleyi yakamucisyaga jemanjaji kuŵika nganisyo syawo syosope pamasengo gawo pa citenti cakulambilila. (Num. 18:21) Pandaŵi jinesoni Yesu ni ŵandumetume ŵakwe ŵapocele cikamucisyo kutyocela kwa acakongwe “ŵaŵaliji mkumtumicila Yesu ni ŵandumetumewo pakamulicisya masengo cipanje cawo.”—Luk. 8:1-3.

9. Ana ŵandu ŵapataga wuli yakupeleka mundaŵi jakala?

⁹ Tukumanyilila kuti kapate ka yakupeleka yeleyi kaliji kakulekanganalekangana. Mwambone, yaŵapelece Ayisalayeli m’cipululu pakamucisya kutaŵa citenti cakulambilila, yine ŵatyocele nayo ku Iguputo. (Eks. 3:21, 22; 35:22-24) Mu ndaŵi ja ŵandumetume, Aklistu ŵane ŵasumisyaga migunda jawo kapena nyumba ni kwapa mbiya ŵandumetume. Pambesi pakwe ŵandumetumewo ŵasigaŵaga kwa ŵandu ŵakusoŵa. (Mase. 4:34, 35) Ŵanesoni ndaŵi syosope ŵasungaga mbiya ni kusipelekaga kuti sikamucisye pamasengo gakwayana ni kulambila. (1 Akoli. 16:2) Kusala yisyene, ŵandu wosope, cinga ŵakulaga kapena ŵakupata ŵakombolaga kupeleka.—Luk. 21:1-4.

YATUKUSAPELEKA MASIKU AGANO

10, 11. (a) Ana mpaka tusyasye wuli koloŵa magasa kwa ŵakutumicila ŵa Yehofa ŵakala? (b) Ana akusapikana wuli mumtima ligongo lyakola upile wakamucisya payindu ya Ucimwene?

¹⁰ Masiku aganosoni mpaka tusosekwe kupeleka yakupeleka kuti yikamucisye pa masengo ganegakwe. Mwambone, ana kumangwawoko akulinganya yakuti ataŵe Nyumba ja Ucimwene jakuti ukamulicisyeje masengo mpingo wawo? Kapena ana akulinganya yindu yayijonasice pa Nyumba ja Ucimwene ja mpingo wawo? Ndaŵi sine mpaka tupocelesoni cimanyisyo cakuti tukamucisye ni mbiya syetu pa yindu yayijonasice pa ofesi ja nyambi, kamucisya msongano waupande, kapena kwakamucisya Aklistu acimjetu ŵakulaga ni ngosi syacipago. Tukusapelekasoni yakamucisya ŵandu ŵakutumicila ku likulu lya Mboni sya Yehofa pacilambo cosope nambosoni m’maofesi ga nyambi. Yakupeleka yetu yikusakamucisyasoni amishonale, apayiniya ŵapajika, soni ŵakulolela mkuli. Ngatukukayicilasoni kuti mpingo wawo wajiticisye yakuti ciwupeleceje mbiya syakamucisya kutaŵa Malo ga Misongano soni Nyumba sya Ucimwene. Yakupeleka yetu yikusakamucisya abale ŵetu pacilambo cosope.

¹¹ Wosopewe tukwete upile wakamucisya masengo ga Yehofa gagakukwanilicikwa m’masiku gambesi gano. Yakupeleka yejinji tukusatenda mwangawonecela. Tukusagamba kuponya m’mabokosi ku Nyumba ja Ucimwene, kapena kwamba kutumisya kupitila pa jw.org. Mwine mpaka tuganisyeje kuti tumbiya twamnono twampaka tupelece nganituŵa tukamucisye. Nambo, casangalale kumanyilila kuti yakupeleka yejinji yikusaŵa yampela yeleyo basi, ngaŵaga mbiya syejinji. Abale ni alongo ŵajinji, atamose ŵakulajilila kupata yindu, ali mpela Aklistu ŵa ku Makedoniya ŵaŵaliji “ŵakulaga mnope.” Nambope, jemanjaji ŵaŵendile kuti akamucisye nawo ni yakupeleka yawo, mwamti ŵatesile yeleyi mwakoloŵa magasa.—2 Akoli. 8:1-4.

12. Ana likuga lyetu likusakamulicisya masengo mwamtuli yakupeleka?

¹² Likuga Lyakulongolela likusakamulicisya masengo mwalunda soni mwakulupicika yakupeleka yetu. (Mat. 24:45) Mbiya syosope sikusakamula masengo gakwe mwakuŵajilwa. (Luk. 14:28) Mu ndaŵi ja m’Baibulo, ŵandu ŵaŵakwete ukumu wakulondesya yakupeleka ŵalolecesyaga kuti yakupelekayo yikukamula masengo gakwe. Mwambone, Esala jwawujile ku Yelusalemu ni golidi, silifa soni yindu yine yaŵapelece mwenye jwa ku Pelesiya. Yindu yosopeyi mu ndaŵi jetu jino mpaka yikwane mbiya syakupunda 100,000,000 sya ku America. Esala ŵayiweni kuti yosopeyi yaliji mituka jakwawula kwa Yehofa. Pakuŵa ulendo wakuwujilawu waliji wakogoya mnope, jwalakwe ŵasalile yakusosekwa kuya pakunyakula yakupelekayi. (Ezara 8:24-34) Nombenajo ndumetume Paulo jwalokotele mbiya syakwakamucisya abale ŵa ku Yudeya. Jwalakwe jwalolecesye kuti ŵandu ŵakuja kupeleka mbiyasyo akutenda “yosope mwakuwona mtima, ngaŵape pameso pa Yehofa nambo ni pameso pa ŵandusoni.” (Aŵalanje 2 Akolinto 8:18-21.) Pakujigalila cisyasyo ca Esala soni Paulo, likuga lyetu likusakamulicisya masengo yakupeleka ya abale mwakusamala mnope.

13. Ana yindu yalicenjile likuga pacangakaŵapa yili yakamucisya wuli?

¹³ Liŵasa mpaka licenje yindu yine panyumba pakusaka kunandiya mbiya syalikusajonanga, kapena pakusaka kutama umi wangasaka yejinji kuti limalileje ndaŵi jejinji pakutumicila Yehofa. Likuga lya Yehofa likusatendasoni yeleyi. M’yaka yapacangakaŵapa, likuga lyetu likopwesye yindu yejinji yakusangalasya. Ndaŵi sine, yeleyi yitendekasisyeje kuti mbiya syakopoka siŵeje syejinji kulekangana ni syakwinjila. Ligongo lya yeleyi, likuga lyetu likusosasosape matala gakamucisya kunandiya mbiya syakonanga. Likulingalingasoni kunandiya masengo ni cakulinga cakuti yakupeleka ya abale ni alongo yikamuleje masengo mwakuŵajilwa.

YAKUPELEKA YAWO YIKUSAKAMUCISYA MNOPE

14-16. (a) Ana yindu yapi yayikutendekwa ligongo lya mbiya syakusapeleka ? (b) Ana yindu yeleyi yakamucisye wuli wawojo?

¹⁴ Ŵandu ŵaŵele ali mkutumicila Yehofa kwa yaka yejinji akusaŵeceta kuti apano tukupocela mituka jejinji kutyocela ku likuga lyetu kupundana ni kalakose. Apano tukwete webusayiti ja jw.org soni JW Broadcasting. Tukwetesoni Baibulo ja New World Translation of the Holy Scriptures m’yiŵeceto yejinji. Nambosoni, mu 2014 ni 2015, twakombwele kwasima maluŵala gekulungwakulungwa m’misinda jakwana 14 ni kutendela msongano wa yilambo wa masiku gatatu wa mtwe wakuti “Ajendelecele Kusosasosa Candanda Ucimwene wa Mlungu!” Ŵaŵasimanikwe pa misonganoji ŵasangalele kwabasi.

¹⁵ Ŵandu ŵajinji akuyamicila yalikutenda likuga lya Yehofali. Mwambone, pakwamba ya JW Broadcasting, liŵasa line lyalikutumicila m’cilambo cine ku Asia lyalembile kuti, “Undumetume wetu tukutendela mu kamsinda kamwana. Ligongo lya yeleyi, ndaŵi sine tukusalipikana kuti tuli jika, pane mpaka kutanda kuliŵalila yakuti tuli mu likuga lya pacilambo cosope. Nambo patugambile kulolela pologalamu pa JW Broadcasting, tukusatanda kukumbucila kuti tuli mu likuga lyakamulana lya pacilambo cosope. Abale ni alongo ŵa akuno akusangalala kwabasi ni ma pologalamu ga JW Broadcasting. Patulolelele pologalamu ja mwesi wuliwose, ŵajinji akusati akusalipikana kuŵa ŵakuŵandikana mnope ni abale ŵa mu Likuga Lyakulongolela. Apano ŵajinji akusangalala mnope kupunda ni kalakose kuti ali m’likuga lya Mlungu.”

¹⁶ Pacilambo cosope, pana masengo gakutaŵa kapena kulinganyasoni Nyumba sya Ucimwene ciŵandika 2,500. M’cilambo ca Honduras, mpingo wine pawatandite kusongana mu Nyumba ja Ucimwene jasambano, abale ni alongo ŵalembile cikalata cakuyamicila. Ŵatite, “Tuli ŵakusangalala mnope ligongo lyakuŵa mbali ja liŵasa lya Yehofa lyakusangalala ni mkamulano wa pacilambo cosope. Wosopewe tukulingalinga kamucisya masengoga ni cakulinga cakuti wosope tukole Nyumba sya Ucimwene syambone.” Ŵajinji akuyamicila ligongo lyakola Baibulo ni mabuku gane m’ciŵeceto cawo. Akuyamicilasoni cikamucisyo cakusapocela pajitendekwe ngosi, nambosoni ŵane akusangalala ni kulalicila ku malo gakusimanikwa ŵandu ŵajinji.

17. Ana yalikutenda likuga lyetu masiku agano, yikulosya wuli kuti Yehofa akulikamucisya?

¹⁷ Ŵandu ŵajinji ŵanganaŵa Ŵamboni ŵangapikanicisya mwatukusakombolela kukamula masengoga pakamulicisyape masengo yakupeleka mwakusaka kwetu. Mundu jwine jwakusakamula masengo ku kampani jekulungwa, ŵapite kukulola ofesi jetu jakupulintila mabuku. Ali alolite maloga jwalakwe jwasimonjile paŵapikene kuti yosopeyi yikusakomboleka ni ŵandu ŵakwamba kulipeleka, mbiya syakupeleka ŵandu mwakusaka kwawo, soni kuti pangali cakusasumisya. Jwalakwe jwaŵecete kuti yeleyi nganiyiŵa yikombolece. Twajiticisye yeleyi, ligongo tukusamanyilila kuti yiliyose yikusakomboleka ni cikamucisyo ca Yehofa.—Yobu 42:2.

MAJALI GAKWIKA LIGONGO LYAKAMUCISYA PAMASENGO GA YEHOFA

18. (a) Ana tukusapata majali gapi ligongo lyakukamucisya masengo ga Ucimwene? (b) Ana mpaka twajiganye wuli ŵanace ŵetu soni ŵacasambano kuŵa ŵakoloŵa magasa?

¹⁸ Yehofa atucimbicisye mwakutupa upile wakamucisya pamasengo ga Ucimwene. Jwalakwe akutusimicisya kuti cacitupa majali naga m’weji tukamucisya pamasengo ga Ucimwene. (Mal. 3:10) Yehofa ŵalagwisye kuti naga tukupeleka mwakoloŵa magasa, yindu yicitujendela cenene. (Aŵalanje Miyambo 11:24, 25.) Jwalakwe akusatusalilasoni kuti tuciŵa ŵakusangalala ligongo lyakupeleka, pakuŵa “kupeleka kukusamtendekasya mundu kuŵa jwakusangalala kulekangana ni kupocela.” (Mase. 20:35) Kupitila mu yakutenda soni yakuŵeceta yetu, mpaka twajiganye ŵanace ŵetu soni ŵacasambano kuŵa ŵakupeleka, yele pambesi pakwe cacipocela nayo majali.

19. Ana yatutagulilene munganiji yalimbikasisye wuli wawojo?

¹⁹ Kusala yisyene, cilicose catukwete cili cakutyocela kwa Yehofa. Patukumpa yindu yaŵatupele, tukusaŵa tuli mkumlosya kuti tukusamnonyela soni kuyamicila yindu yosope yakusatutendela. (1 Mbiri 29:17) Kalakala, ŵandu paŵapelekaga yindu yakamucisya kutaŵa nyumba ja Mlungu, ‘ŵasangalele mnope ligongo lyakupeleka yindu mwakusosa kwawo, pakuŵa ŵayipelece kwa Yehofa ni mtima wosope.’ (1 Mbiri 29:9) M’yoyo, kwende tujendelecele kusangalala ligongo lyakumpa Yehofa yindu yaŵatupele.