“Ligongo Chichi Mlungu Jwakundile Yeleyi?”
“NDAŴI NI KATEMA NGUSALIWUSYA KUTI, LIGONGO CHICHI MLUNGU JWAKUNDILE YELEYI KUTENDEKWA?”—Papa Benedict 16 jwaŵechete yeleyi paŵayiche kumalo gagaliji ndende jakulagachisya ŵandu ku Auschwitz m’chilambo cha Poland.
PAYITENDEKWE YAKUSAWUSYA, ANA PAKWETE PALIWUSISYE KUTI, ‘LIGONGO CHICHI MLUNGU JWAKUNDILE YELEYI KUTENDEKWA?’ KAPENA PAUMI WAWO ŴASIMENE NI YIPWETESI YAYATENDEKASISYE KUKAYICHILA NAGA MLUNGU AKUSASAMALA YA WAWOJO PAJIKA?
Komboleka akulipikana mpela muŵalipikanilaga Sheila jwakusatama ku United States. Ligongo lyakuti jwakulile m’liŵasa lyalyanonyelaga mnope ya dini, jwalakwe jwatite, “Kutandila ndili mwanache natendaga lung’wanu ni ya Mlungu ligongo ni juŵatupanganyisye. Nambope nganinalipikanaga kuŵa jwakuŵandikana ni Mlungu. Naganisyaga kuti Mlungu ŵambonelaga kwakutalika mnope. Nambosoni nganinalipikanaga kuti Mlungu akuŵengana ni une, kwamba kuti nganingulupililaga kuti akusasamalaga yauneji.” Ana ligongo chichi Sheila ŵakayichilaga yakuti Mlungu akusamnonyela? Jwalakwe jwatite, “Nayiwonaga kuti Mlungu ngakutukamuchisya amta panandi ligongo mwiŵasa mwetu twasimanaga ni yakusawusya yejinji.”
Mwakulandana ni Sheila, komboleka kuti wawojosoni akusakulupilila kuti kwana Mlungu Jwamachiligosope. Nambope mwine mpaka akayichileje naga yisyene kuti Mlungu akusasamala ya wawojo. Nombenajo Yobu juŵaliji jwakulungama soni jwaŵamkulupililaga mnope Mlungu, jwakayichilaga yakuti Mlungujo akusasamala ya jwalakwejo. (Yobu 2:3; 9:4) Yobu ali asimene ni yakusawusya yejinji mwakuwilisyawilisya yamtendekasisye kusoŵa pakwegamila. Jwalakwe jwam’wusisye Mlungu kuti, “Ligongo chichi akusisa ngope jawo soni akumbona kuŵa m’magongo jwawo?”—Yobu 13:24.
Ana Baibulo jikusasala yamtuli? Ana tumjimbeje magambo Mlungu patusimene ni yakusawusya? Ana pana umboni wakulosya kuti Mlungu akusasamala ya ŵandu wosope soni ya mundu jwalijose pajika? Ana panasoni umboni wakulosya kuti Mlungu akusatupikanichisya, kutumanyilila, soni kutukamuchisya pa yakusawusya yatukusimana nayo?
Mungani syakuyichisya, chitulijiganye kutyochela ku yakupanganyikwa. (Aloma 1:20) Kaneko chitulole yajikusasala Baibulo pakwamba yakusati Mlungu pakutusamalila. Kulijiganya mnope ya jwalakwe kupitila mu yakupanganyikwa soni Baibulo yichakamuchisya kuti ammanyilile chenene Mlungu soni kusimichisya kuti “jwalakwe akusiŵaganichisyaga.”—1 Yohane 2:3; 1 Petulo 5:7.