Kuŵa Ŵakuwusimana Mtima Kukusalosya Lunda
Toñi, jwakusamanyilila cenene kamula masengo gakusamalila ŵakalambale, ŵapoposisye palitanga ni jwamkongwe jwine ŵakopwece m’nyumbamo. Jwamkongwejo ŵam’ŵecetele Toñi maloŵe gacipongwe ligongo lyakwika mwakucelewa kukwasamalila mamagwe ŵaŵaliji ŵakalambale. Atamose kuti Toñi nganacelewa kumasengoko, nambo jwalakwe ŵampepesye jwamkongwejo ligongo lya yayatendekweyo.
PA ULENDO wakuyicisya, jwamkongwe jula ŵam’wecetelesoni Toñi maloŵe gacipongwe. Ana jwalakwe ŵatesile cici? Jwalakwe ŵasasile kuti, “Yaliji yakusawusya mnope. Jwamkongweju nganaŵajilwaga kuŵeceta maloŵe gacipongwego.” Nambope, Toñi ŵampepesyesoni jwamkongwejo ni kumsalila kuti jwalakwe akupikanicisya yakusawusya yakusimana nayo.
Yikaŵe kuti wawojo ali Toñi, akuganisya kuti nakatesile cici? Ana nakalinjile kulosya mtima wakulitimalika? Ana niyikasawisye kuwusimana mtima? Mpaka yiŵe yakusawusya kwendelecela kuwusimana mtima pa cakutendekwa mpela celeci. Kusala yisyene, naga ŵane atutumbilikasisye, yikusaŵa yakusawusya kuti tuwukamule mtima.
Nambope, Baibulo jikusalimbikasya Aklistu kuti aŵeje ŵakuwusimana mtima. Ni ligongo lyakwe Maloŵe ga Mlungu gakusakamulanya ndamo ja kukuwusimana mtima ni lunda. Yakobo ŵawusisye kuti, ‘Ana pasikati penu pana mundu jwali jwalunda soni jwakupikanicisya yindu? Jwelejo kupitila mu ndamo jakwe jambone, akusosekwa kulosya kuti akutenda yiliyose mwakuwusimana mtima kwakukusatyocela mu lunda.’ (Yak. 3:13) Ana kuwusimana mtima kukusalosya catuli kuti kuli lunda lwakutyocela kwinani? Ana cici campaka citukamucisye kulosya ndamo ja kuwusimana mtima?
LUNDA LWALUKUSAWOCELA MU NDAMO JA KUWUSIMANA MTIMA
Kuwusimana mtima kukusakamucisya kunandiya kutumbila. ‘Kwanga mwakuwusimana mtima kukusanandiya kupya mtima nambo maloŵe gakupweteka gakusatandisya ukangani.’—Miy. 15:1.
Kwanga mwakupya mtima, mpaka kutendekasye kuti yindu yisakale mnope ligongo ukusaŵa mpela ukukwisilila moto. (Miy. 26:21) Mwakulekangana ni yeleyi, kwanga mwakuwusimana mtima kukusakamucisya kuti mundu jwatumbile mnope atulale.
Toñi ŵayiweni yeleyi. Pakulola yaŵatite Toñi pakwanga mwakuwusimana mtima, jwamkongwe jula jwatandite kulila. Jwalakwe ŵasasile kuti, ŵasokonecele nganisyo ligongo lya yindu yayamtendecelaga nambosoni yakusawusya ya m’liŵasa lyakwe. Ligongo lya yeleyi, Toñi ŵamlalicile jwamkongwejo mwati ŵatandisye lijiganyo lya Baibulo. Yeleyi yatendekwe ligongo lya ndamo jambone jaŵalosisye ja kuwusimana mtima.
Kuwusimana mtima mpaka kututendekasye kuŵa ŵakusangalala. ‘Ŵakusangalala ali ŵandu ŵakuwusimana mtima, pakuŵa cacipocela cilambo capasi.’—Mat. 5:5.
Ligongo cici ŵandu ŵakuwusimana mtima akusaŵa ŵakusangalala? Ligongo lyakuwala ndamo ja kuwusimana mtima, ŵandu ŵane ŵaŵaliji ŵakupya mtima sambano akusangalala. Apano maumi gawo gacenjile mwati akumanyilila kuti akwete sogolo jambone. (Akolo. 3:12) Adolfo jwa ku Spain, jwali jwakulolela mkuli, ŵasasile muwaŵelele umi wakwe mkanalijiganye usyesyene.
Adolfo ŵasasile kuti, “Umi wangu waliji wangali sogolo. Ndaŵi syosope, najanguyaga kupya mtima, m’yoyo acimjangu ŵane ŵanjogopaga. Nambo yayatendekwe panyuma pakwe yangamucisye kuti njenje yakutenda yangu. Lisiku line, namenyanaga ni ŵandu ŵane, ni nacopedwe yipula mwati nakwete maŵanga 6 soni najasile miyasi jejinji mwati nasigele panandi kuwa.”
Apano, kupitila mu yakuŵeceta soni yakutenda yakwe, Adolfo akusiŵajiganya ŵandu kuti aŵe ŵakuwusimana mtima. Ŵajinji akuyamicila mnope ligongo lya umundu wakwe wambone. Jwalakwe akusala kuti, sambano ali jwakusangalala mnope ligongo ŵakombwele kucenga ndamo syakusakala. Akuyamicilasoni Yehofa ligongo lyakumkamucisya kola ndamo ja kuwusimana mtimaji.
Kuwusimana mtima kukusamtendekasya Yehofa kuŵa jwakusangalala. ‘Mwanangu, m’ŵeje jwalunda, ni m’wusangalasye mtima wangu; kuti namjanje jwele jwakunyosya.’—Miy. 27:11.
Ndaŵi syosope, m’magongo jwamkulungwa, Satana akusam’nyosya Yehofa. Yili yakupikanika kuti Yehofa apye mtima ligongo lya kum’nyosyaku, nambo Baibulo jikusasala kuti Yehofa ‘jwangatumbila citema.’ (Eks. 34:6) Naga tukulingalinga kuya cisyasyo ca Mlungu cangatumbila citema soni ca kuwusimana mtima, nikuti tukulosya lunda lwalukusamsangalasya mnope Yehofa.—Aef. 5:1.
Ŵandu ŵajinji masiku agano ali “ŵakulinonyela, ŵakulikwesya, ŵakunyosya, . . . ŵawulamba, ŵangaligosa, soni ŵakogoya.” (2 Tim. 3:2, 3) Nambope, yeleyi ngayikusosekwa kwalepelekasya Aklistu kulosya ndamo ja kuwusimana mtima. Maloŵe ga Mlungu gakusatukumbusya kuti “lunda lwakutyocela kwinani luli . . . lwamtendele, lwakundilila.” (Yak. 3:17) Naga tukulosya ndamo ja mtendele soni ja kundilila, tucilosya kuti tukusajendela lunda lwa Mlungu. Lunda lwelelu lucitukamucisya kwanga mwakuwusimana mtima naga ŵane atutumbilikasisye soni lucitukamucisya kuti tum’ŵandicile mnope Yehofa, jwali Mkupeleka lunda lusyesyene.