Ana Yisangalalo Yosope Yikusamsangalasya Mlungu?

Yehofa akusasaka kuti tusangalaleje ni umi soni ndaŵi sine tutendeje yisangalalo. Nambo ana yisangalalo yosope yikusamsangalasya jwalakwe? Ana pangani jeleji mpaka tulosye chamtuli kuti tukusamnonyela Yehofa?

1. Ligongo chichi yisangalalo yejinji yangamsangalasya Yehofa?

Mpaka asimonje kumanyilila kuti yisangalalo yejinji yili yangakamulana ni yajikusajiganya Baibulo soni kuti yatyochele kwa ŵandu ŵanganamlambilaga Mlungu. Yisangalaloyi yikusakamulana ni dini syaunami soni chijiganyo chakuti mundu pawile akusapitilisya kuŵa ni umi. Yisangalalo yine yikusatyochela pa yikulupi yakuti misimu mpaka jakamuchisye ŵandu kola likungu soni upile. (Yesaya 65:11) Ni ligongo lyakwe Yehofa akusiŵakalamusya ŵakutumichila ŵakwe kuti: “Mŵe pajika. Kasimkwaya kandu kangaswejela.”—2 Akolinto 6:17.a

2. Ana Yehofa akusapikana uli ŵandu pakutenda yisangalalo yakwachimbichisya ŵandu mwakupundanganya?

Yehofa akusatukalamusya kuti ‘tukajegamila pa mundu.’ (Aŵalanje Yelemiya 17:5.) Pana yisangalalo yine yele chakulinga chakwe chili kwachimbichisya ŵakulamulila soni asilikali. Ŵandu ŵane akusasangalalilaga yimanyilo yakwimila chilambo chawo soni lisiku lyele ŵagopoledwe ku ulamusi wine. (1 Yohane 5:21) Konjechesya pelepa ŵandu ŵane akusasangalalila mabungwe ga ndale soni gakuputila ufulu wa ŵandu. Ana Yehofa akusapikana uli naga tukupeleka uchimbichimbi wakupundanganya kwa mundu soni mabungwe, mnopemnope gagakusalimbikasya nganisyo syakulekangana ni chakulinga chakwe?

3. Ana ni chichi champaka chitendekasye kuti Yehofa akayikundaga yisangalalo yine?

Baibulo jikusaŵengana ni “kukolelwa, yisangalalo ya masegwe, [soni] kumwa mwampikisano.” (1 Petulo 4:3, NWT) Pa yisangalalo yine ŵandu akusatenda yindu mwakulilechelela soni akusatenda yindu yakusakala. Myoyo kuti tupitilisye kuŵa achimjakwe ŵa Yehofa tukusosekwa kuŵambala ndamo syakusakala.

KULIJIGANYA YEJINJI

4. Aŵambaleje yisangalalo yangamchimbichisya Yehofa

Aŵalanje Aefeso 5:10, kaneko akambilane yiwusyo ayi:

• Ana tukusosekwa kusimichisya ya chichi mkanitutende nawo chisangalalo chine chakwe?

• Ana ni yisangalalo yapi yayiwandile kumangwawoko?

• Ana akuganisya kuti yisangalaloyo yikusamsangalasyaga Yehofa?

Mwachisyasyo, ana pakwete paganichisye mwakusajiwonela Mlungu ngani jakusangalalila masiku gakupagwa? Baibulo pangali pajikusatusalila kuti ŵakutumichila ŵa Mlungu pakwete pasangalalile lisiku lyakupagwa. Nambo jikusatusalila ya yisangalalo yiŵili ya masiku gakupagwa yaŵayitesile ŵandu ŵanganamtumichilaga Yehofa. Aŵalanje Genesesi 40:20-22 soni Mateyu 14:6-10. Kaneko akambilane yiwusyo ayi:

• Ana yisangalaloyi yikulandana m’matala gapi?

• Mwakamulana ni ngani sya m’Baibulosi, ana akuganisya kuti Yehofa akusapikana uli ni yisangalalo ya masiku gakupagwa?

Nambope komboleka kuliwusya kuti, ‘Ana Yehofa yikusamkwayaga naga ngutenda nawo chisangalalo cha lisiku lyakupagwa kapena chisangalalo chine chilichose changakamulana ni malemba?’ Aŵalanje Ekisodo 32:1-8. Kaneko alolele FIDIYO, soni akambilane yiwusyo ayi.

FIDIYO: Yisangalalo Yangamsangalasya Mlungu (5:07)

• Ligongo chichi tukusosekwa kusimichisya kuti yatukusaka kutenda Yehofa akuyijitichisya?

• Ana mpaka tutende yeleyi chamtuli?

Ana mpaka tumanyilile chamtuli yisangalalo yangamsangalasya Mlungu?

• Ana chisangalalocho chikusatyochela pa yikulupi yangakamulana ni malemba? Kuti amanyilile yejinji, awungunye muchatandile chisangalalocho.

• Ana ŵandu pakutenda chisangalalocho akusachimbichisya mwakupundanganya ŵandu, mabungwe soni yimanyilo yakwimila chilambo? Yehofa ni jwatukusosekwa kumchimbichisya kupunda jwalijose. Tukusosekwasoni kukulupilila kuti jwalakwe ni juchachimasya yakusawusya ya ŵandu.

• Ana misyungu soni yayikusatendekwa pachisangalalocho yikusatindana ni yajikusajiganya Baibulo? Tukusosekwa tukoleje ndamo syambone.

5. Ŵakamuchisyeje ŵane kuchimbichisya yatukusakulupilila

FIDIYO: Ŵasalileje Ŵane Mwalunda Yakusakulupilila (2:01)

Aŵalanje Mateyu 7:12, kaneko akambilane yiwusyo ayi:

• Mwakamulana ni lilembali, ana akuyiwona kuŵa yakuŵajilwa kwalekasyaga ŵamwiŵasa mwawo kuti akatendaga yisangalalo yine yakwe?

• Ana mpaka atende yamtuli pakulosya kuti akusiŵanonyela ŵamwiŵasa mwawo atamose kuti wawojo nganaŵa atesile nawo chisangalalo?

6. Yehofa akusasaka kuti tusangalaleje

Yehofa akusasaka kuti tupateje ndaŵi jakusangalala yalumo ni ŵamwiŵasa mwetu soni achimjetu. Aŵalanje Jwakulalichila 8:15, kaneko akambilane chiwusyo achi:

• Ana lilembali likulosya chamtuli kuti Yehofa akusasaka kuti tuŵeje ŵakusangalala?

Yehofa akusasaka kuti ŵandu ŵakwe akungulucheje soni asangalaleje yimpepe. Alolele FIDIYO kuti amanyilile mwayikusatendechelaga yeleyi pamisongano jetu ja yilambo.

FIDIYO: Kwapochela Chenene Ŵane Pamisongano ja Yilambo (5:40)

Aŵalanje Agalatiya 6:10, kaneko akambilane yiwusyo ayi:

• Ana mpaka tujile kuti pandaŵi ja yisangalalo ni patukusosekwa ‘kwatendela ŵane yambone’?

• Ana akuganisya kuti ni kupeleka kwapi kwampaka kumkamuchisye mundu kuŵa jwakusangalala, kupeleka ligongo lya chisangalalo, kapena kupeleka ligongo lya mtima wakusachilila?

• Ŵa Mboni ŵajinji akusatendaga yakuti ndaŵi sine apateje ndaŵi jakusangalala ni ŵanache ŵawo soni kwapa mituka. Naga akwete ŵanache, ana ni yindu yine yapi yampaka ŵatendele?

YALIJIGANYISYE

Yehofa akusasaka kuti tupateje ndaŵi jakusangalala yalumo ni ŵamwiŵasa mwetu soni achimjetu. Nambo akusasaka kuti tuŵambaleje yisangalalo yangamsangalasyaga jwalakwe.

Yiwusyo Yakuwilisya

• Ana ni yiwusyo yapi yampaka aliwusye yakwakamuchisya kumanyilila naga chisangalalocho changamsangalasyaga Yehofa?

• Ana mpaka twakamuchisye chamtuli ŵamwiŵasa mwetu soni achimjetu kupikanichisya yatusagwile pangani ja yisangalalo?

• Ana akumanyilila chamtuli kuti Yehofa akusasaka kuti tusangalaleje soni kukunguluka?

YAKULINGA YINESONI

Kwende tulole yisangalalo yine yele Aklistu ŵangatendaga nawo.

“Ligongo Chichi ŵa Mboni sya Yehofa Ŵangatendaga Nawo Yisangalalo Yine?” (Ngani ja pa intaneti)

Alole magongo mcheche gagakusatutendekasya kukulupilila kuti yisangalalo ya masiku gakupagwa yangamsangalasya Mlungu.

“Ligongo Chichi ŵa Mboni sya Yehofa Ŵangatenda Nawo Yisangalalo ya Masiku Gakupagwa?” (Ngani ja pa intaneti)

Alole yakusatenda ŵanache ŵakusamnonyela Yehofa pakumsangalasya jwalakwe pandaŵi ja maholide.

Yehofa Akusamwona Kuti Mli Jwakusosekwa Mnope (11:35)

Aklistu ŵajinji ŵangasangalalila Kilisimasi. Ana jemanjaji akusapikana uli mumtima ni yaŵasagwileyi?

“Ŵapatile Chindu Chambone Mnope” (Sanja ja Mlonda, Disemba 1, 2012)