Yajikusasala Baibulo Pangani Jagonana

Ŵandu ŵajinji akusatenda sooni kuŵecheta ngani syakwamba gonana. Nambope Baibulo pajikusala yakwamba nganiji, jikusasala yisyesyene soni mwakuchimbichisya. Yajikusasalayi mpaka yitukamuchisye. Yili myoyo ligongo lyakuti Baibulo jatyochele kwa Mlungu juŵatupanganyisye. Jwalakwe akusamanyilila yampaka yitukamuchisye. Akusatusalila yatukusosekwa kutenda kuti tumsangalasyeje soni yampaka yitukamuchisye kuŵa ŵakusangalala mpaka kalakala.

1. Ana nganisyo sya Yehofa sili syamtuli pangani jagonana?

Yehofa ni juŵapanganyisye yakuti ŵalume ni ŵakongwe agonaneje. Jwalakwe akusasaka kuti ŵalombane pakugonana asangalaleje. Yeleyi yikusakamuchisya ŵalombane kuti akoleje ŵanache. Konjechesya pelepa yikusakamuchisyasoni kuti alosyaneje chinonyelo. Ni ligongo lyakwe Maloŵe ga Mlungu gakusati: ‘Msangalaleje nawo ŵakongwe ŵa ku uchanda wenu.’ (Misyungu 5:18, 19) Yehofa akusasaka kuti ŵalombane aŵeje ŵakulupichika kwa jwine ni mjakwe. Yeleyi mpaka yikamuchisye kuti jwine akatenda chikululu.—Aŵalanje Ahebeli 13:4.

2. Ana ndamo syachikululu sikusapwatikapo yakutendekwa yapi?

Baibulo jikusatusalila kuti “ŵandu wosope. . . ŵalilama [“ŵachikululu,” NWT] . . . Ngisapochela Uchimwene wa Mlungu.” (1 Akolinto 6:9, 10) Ŵakulemba Baibulo ŵakamulichisye masengo maloŵe ga Chigiliki gakuti por·neiʹa pakulondesya ndamo sya chikululu. Maloŵega gakusapwatikapo (1) kugonanaa kwa ŵandu ŵanganalombana, (2) kugonana kwa achalumepe kapena achakongwepe, soni (3) kuyigona yinyama. Naga “tukuŵambala chikululu,” yikusatukamuchisyaga m’weji soni tukusamsangalasyaga Yehofa.—1 Atesalonika 4:3.

KULIJIGANYA YEJINJI

3. Tusitileje ndamo syachikululu

Yosefe juŵaliji mundu jwakulupichika jwakanile kutenda chikululu. Aŵalanje Genesesi 39:1-12, ni akambilane yiwusyo ayi:

• Ana ni chichi chachamkamuchisye Yosefe kuti akatenda chikululu?—Alole vesi 9.

• Ana akuganisya kuti ŵatesile chenene kutila? Ligongo chichi?

FIDIYO: Aŵambaleje Ndamo ja Chikululu (5:06)

Yehofa akusasaka kuti wosopewe tuŵambaleje ndamo sya chikululu. Aŵalanje 1 Akolinto 6:18, kaneko akambilane yiwusyo ayi:

• Ana ni yindu yapi yampaka yimlongolele mundu kutenda chikululu?

• Ana mpaka atende yamtuli kuti aŵambale chikululu?

4. Asikaneje nganisyo sya chikululu

FIDIYO: Alimbaneje ni Nganisyo Syakusakala Mwakuŵalanga Baibulo (3:02)

• Mu fidiyoji, ana m’bale jula ŵatesile yamtuli ali amanyilile kuti nganisyo soni yitendo yakwe mpaka yimtendekasye kuti akaŵa jwakulupichika kwa ŵamkwakwe?

Atamose Aklistu ŵakulupichika akusalimbana ni nganisyo syakusakala. Ana ni chichi champaka chakamuchisye kuti akagambaga kutamila kuganichisya yakusakala? Aŵalanje Afilipi 4:8, kaneko akambilane yiwusyo ayi:

• Ana ni yindu yapi yatukusosekwa kuyiganichisyaga?

• Ana kuŵalanga Baibulo soni kola yakutenda yejinji pakumtumichila Yehofa mpaka kutukamuchisye chamtuli kuti tukaneje nganisyo syakulemwecheka?

5. Mfundo sya m’Baibulo mpaka situkamuchisye

FIDIYO: Akaŵa Mundu Jwangali Lunda (9:31)

• Ana mnyamataju jwatesile yamtuli yakumlongolela kutenda chikululu?—Alole Misyungu 7:8, 9.

• Mwakamulana ni Misyungu 7:23, 26, kutenda chikululu kukwete yakuyichisya yakusakala. Patukuŵambala chikululu, ana ni yakusawusya yapi yatukusaŵambalaga?

• Ana kuŵambala ndamo sya chikululu, kukusatukamuchisya chamtuli kola umi wakusangalala mpaka kalakala?

Ŵane akusaganisya kuti yajikusasala Baibulo pangani jagonana kwa achalumepe ni achakongwepe nganichiŵa chinonyelo. Nambope Yehofa, akusasaka kuti tusangalaleje ni umi mpaka kalakala. Kuti yeleyi yikomboleche tukusosekwa kuya yakusatusalilaga kupitila m’Baibulo. Aŵalanje 1 Akolinto 6:9-11, kaneko akambilane chiwusyo achi:

• Mwakamulana ni nganisyo sya Mlungu, ana akuyiwona kuti mpaka kuŵe kulemwa kumkumbila jwamlume kapena jwamkongwe mjetu?

Kuti tumsangalasye Mlungu, wosopewe tukusosekwa kuchenga yindu yine paumi wetu. Ligongo chichi mundu akusosekwa kulingalinga kuti atende yeleyi? Aŵalanje Salimo 19:8, 11, kaneko akambilane chiwusyo achi:

• Ana akuganisya kuti malamusi ga m’Baibulo gali gakamuchisya? Asale magongo gakwe.

YALIJIGANYISYE

Yehofa ni juŵapanganyisye yakuti ŵalume ni ŵakongwe agonaneje soni kuti asangalaleje.

Yiwusyo Yakuwilisya

• Ana ndamo sya chikululu sikusapwatikapo yakutendekwa yapi?

• Ana ni chichi champaka chitukamuchisye kuti tuŵambale ndamo sya chikululu?

• Ana tukusapata umbone wamtuli patukukuya yajikusatusalilaga Baibulo?

YAKULINGA YINESONI

Amanyilile ligongo lyakwe Mlungu akusasaka kuti kugonana kuŵeje kwa ŵalombane.

“Ana Baibulo Jikusasala Yamtuli Pangani Jagonana kwa Ŵandu Ŵanganalombana?” (Ngani ja pa intaneti)

Amanyilile ligongo lyakwe Baibulo jikusasala kuti kugonana kwa achalumepe kapena achakongwepe kuli kulemwa. Nambo yeleyi ngayikugopolela kuti jemanjaji twaŵenjeje.

“Ana Gonana kwa Achalumepe Kapena Achakongwepe Kuli Kulemwa?” (Ngani ja pa intaneti)

Alijiganye mwagakusati kutuchenjela malamusi ga Mlungu pa ndamo sya chikululu.

“Ana Kugonana Mkamwa Kuli Kugonana Kwene?” (Ngani ja pa intaneti)

Pangani jakuti, “Ŵanjimbichisye,” alole yayamkamuchisye mundu juŵagonaga ni achalume achimjakwe kuti achenje ni kutendaga yakumsangalasya Mlungu.

“Baibulo Jikusachenga Umi wa Ŵandu” (Sanja ja Mlonda, Epulo 1, 2011)