LIJIGANYO 36

Aŵeje Ŵakulupichika pa Yosope

Printed Edition

Mundu jwalijose akusasaka kuti achimjakwe aŵeje ŵakulupichika. Nombe najo Yehofa akusasakasoni kuti achimjakwe aŵeje ŵakulupichika. Nambope kuŵa jwakulupichika kuli kwakusawusya m’chilambo cha ŵandu ŵangakulupichikachi. Nambo ana kutenda yindu yosope mwakulupichika mpaka kutukamuchisye chamtuli?

1. Ana ligongo chichi tukusosekwa kuŵa ŵakulupichika?

Tukusalosya kuti tukusamnonyela Yehofa soni kumchimbichisya patukuŵa ŵakulupichika kwa ŵane. Aganichisye ayi: Yehofa akusamanyilila yatukusaganisya soni yatukusatenda. (Ahebeli 4:13) Mwamti patusagwile kuŵa ŵakulupichika kwa jwalakwe, akusamanyilila soni akusayamichila. Ni ligongo lyakwe Baibulo jikusati, “AMBUJE akusaŵengana ni mundu jwakusakala, nambo ŵandu ŵakulungama akusiŵaŵika m’likuga lya ŵandu ŵakwe ŵakusiŵakulupilila.”—Misyungu 3:32.

2. Ana mpaka tulosye chamtuli kuti tuli ŵakulupichika lisiku lililyose?

Yehofa akusasaka kuti, ‘tuŵecheteje yakuwona jwine ni mjakwe.’ (Sakaliya 8:16, 17) Ana yeleyi yikugopolela chichi? Yikugopolela kuti patukuŵechetana ni ŵamwiŵasa mwetu, ŵakumasengo, abale ni alongo kapena kwa achakulungwakulungwa ŵa boma, tukalambusyaga kapena kupeleka umboni waunami. Ŵandu ŵakulupichika ŵangajiŵilaga ŵane chinga mwa ukalamusi kapena matala gane. (Aŵalanje Misyungu 24:28 soni Aefeso 4:28.) Jemanjaji akusakomasoni misongo. (Aloma 13:5-7) Patukutenda yeleyi soni yindu yine tukusaŵa tuli ‘mkulosya kuti tuli ŵakulupichika pa yosope yambone.’—Tito 2:10.

3. Ana pakusaŵa umbone wamtuli patukuŵa ŵakulupichika?

Patukutenda yindu mwakulupichika, ŵane akusatudalila. Yeleyi yikusakamuchisya kuti mumpingo muŵe mtendele mpela liŵasa lyakunonyelana. Yikusatukamuchisyasoni kuti tukaligambaga. Kutenda yindu mwakulupichika kukusakamuchisya kuti ‘tulosyeje umbone wa majiganyo gakwamba ya Mlungu, Mkulupusyo jwetu.’ Soni mpaka kwatendekasye ŵane kutanda kumtumichila Yehofa.—Tito 2:10.

KULIJIGANYA YEJINJI

Chitulole mwayikusati kumkwaya Yehofa soni m’weji patukutenda yindu mwakulupichika. Chitulolesoni yampaka tutende kuti tuŵeje ŵakulupichika muyakutendekwa yakulekanganalekangana.

4. Kutenda mwakulupichika kukusamsangalasya Yehofa

Aŵalanje Salimo 44:21 soni Malaki 3:16, kaneko akambilane yiwusyo ayi:

Ligongo chichi nganiluŵa lunda kuŵecheta yaunami?
Ana akuganisya kuti Yehofa akusapikana uli mumtima patukuŵecheta yakuwona atamose pandaŵi jele kutenda yeleyi mpaka kuŵe kwakusawusya?

Mwanache akuŵecheta kwa baba ŵakwe ŵatindiŵele. Tambula jigwile mwamti mesi gakusuchile pa tebulo. — Achinangolo akusasangalalaga naga ŵanache ŵawo ŵangaŵecheta yaunami. M’wejisoni patukuŵecheta yisyesyene, Yehofa akusasangalalaga

5. Atendeje yindu mwakulupichika

Ŵandu ŵajinji akusaganisya kuti nganiyiŵa yikomboleche kuŵa ŵakulupichika ndaŵi syosope. Nambo kwende tulole ligongo lyakwe tukusosekwa kuŵa ŵakulupichika ndaŵi syosope. Alolele FIDIYO.

FIDIYO: Yampaka Yitukamuchisye Kuti Tuŵeje Ŵakusangalala—Kukola Chikumbumtima Chambone (2:32)

Ngani ja mu fidiyo jakuti ‘Yampaka Yitukamuchisye Kuti Tuŵeje Ŵakusangalala—Kukola Chikumbumtima Chambone.’ Beni ali ŵasalile abwana ŵakwe kuti alemwesye mnope, jemanjaji akukamulana mkono.

Aŵalanje Ahebeli 13:18, kaneko akambilane yampaka atende kuti aŵeje ŵakulupichika . . .

mwiŵasa mwawo.
kumasengo kapena kusukulu.
mu yakutendekwa yine.

6. Kulupichika kukusatukamuchisya

Kulupichika mpaka kuyikasye yakusawusya yine. Nambope kutenda yindu mwakulupichika kuli kwambone. Aŵalanje Salimo 34:12-16, kaneko akambilane chiwusyo achi:

Ana kulupichika mpaka kwakamuchisye chamtuli kola umi wambone?

A. Jwamlume ni jwamkongwe akukambilana kwineku ali mkumwa kofi.

B. Abwana akumyamichila makaniko jwali mu shopu jakwe.

Ŵalombane pakuŵa ŵakulupichika, akusakolaga liŵasa lyambone
Naga jwamasengo akutenda yindu mwakulupichika, abwana akusamkulupilila
Naga ŵandu m’chilambo akutenda yindu mwakulupichika, akusalipanganyichisya mbili jambone kwa achakulungwakulungwa ŵa boma

YAKUSAŴECHETA ŴANDU ŴANE: “Kulambusya panandi nganikuŵa kulemwa.”