Ana Dini Jetu Mpaka Jimsangalasye Chamtuli Mlungu?

Mu lijiganyo lipite lila, twayiweni kuti dini syejinji syangamsangalasya Mlungu. Nambope yili yakomboleka kuŵa mu dini jajikusamsangalasyaga Mlungu. Ana ni “dini” japi jajikusamsangalasya jwalakwe? (Yakobo 1:27) Kwende tulole yajikusajiganya Baibulo.

1. Ana mpaka tumanyilile chamtuli naga Mlungu akusajitichisya dini jetu?

Baibulo mpaka jitukamuchisye kumanyilila naga Mlungu akusajitichisya dini jetu. Yesu jwamsalile Mlungu kuti, ‘Maloŵe gawo gali gakuwona.’ (Yohane 17:17) Dini sine ngasikusakamulichisyaga masengo usyesyene wawuli m’Baibulo. M’malo mwakwe sikusakamulichisya masengo miyambo ni yijiganyo ya ŵandu. Nambo Yehofa jwangasangalala ni ŵandu ‘ŵakusaleka malamusi ga Mlungu.’ (Aŵalanje Maliko 7:9.) Mlungu akusasangalala patukukamulichisya masengo Baibulo soni patukukuya malamusi gakwe.

2. Ana mpaka tumtumichile Yehofa chamtuli?

Yehofa akusasaka kuti tulipelecheje kwa jwalakwepe, ligongo ni juŵatupanganyisye. (Chiwunukuko 4:11) Yeleyi yikugopolela kuti tukusosekwa kumnonyela soni kumtumichilaga jwalakwepe. Nambosoni tukakamulichisyaga masengo yiwanichisyo patukumtumichila.—Aŵalanje Yesaya 42:8.

Kutumichila kwetu Mlungu kuŵeje ‘kweswela soni kwakumsangalasya’ Yehofa. (Aloma 12:1) Yeleyi yikugopolela kuti tukusosekwa kupikanilaga malamusi gakwe. Mwachisyasyo, ŵandu ŵakusamnonyela Yehofa akusakuya malamusi gakwe gakwamba ulombela. Nambosoni akusaŵambala yitendo yampaka yijonanje umi mpela kwemba sona, kukamulichisya masengo mitela jakusokonasya mtwe soni kolelwa.a

3. Ana ligongo chichi tukusosekwa kumlumba Yehofa yimpepe ni ŵakulupilila achimjetu?

Misongano jatukusatenda wiki jilijose jikusatukamuchisya ‘kumlumba Yehofa.’ (Salimo 111:1, 2) Litala line lyatukusatendela yeleyi lili kwimba nyimbo syakumlumba Mlungu. (Aŵalanje Salimo 104:33.) Myoyo, Yehofa akutusalila kuti tusimanikweje pamisongano ligongo lyakuti akusatunonyela. Jwalakwe akusamanyilila kuti kusimanikwa pamisongano kuchitukamuchisya kuŵa ni umi wakusangalala mpaka kalakala. Patujawile kumisongano, tukusitwalimbikasya achimjetu soni jemanjajo akusatulimbikasya.

KULIJIGANYA YEJINJI

4. Tukakamulichisyaga masengo yiwanichisyo patukupopela

FIDIYO: Ana Mlungu Akusajitichisya Yiwanichisyo Pakupopela? (3:26)

• Ana chatendekwe chichi pandaŵi jele ŵandu ŵane ŵakamulichisyaga masengo yiwanichisyo pakupopela kwa Mlungu?

Ŵandu ŵane akusayiwona kuti mpaka aŵe paunasi wambone ni Mlungu naga akukamulichisya masengo yiwanichisyo pakupopela. Nambo ana kutenda yeleyi mpaka kumkamuchisye kwene mundu kuŵa paunasi ni Mlungu? Aŵalanje Ekisodo 20:4-6; soni Salimo 106:35, 36, kaneko akambilane yiwusyo ayi:

• Ana ni yindu soni yakuwanichisya yapi yayiweni ŵandu ali mkuyikamulichisya masengo pakupopela?

• Ana Yehofa akusapikana uli mumtima pakwawona ŵandu ali mkukamulichisya masengo yeleyi?

• Nambi wawojo akuganisya uli?

5. Kutumichila Yehofape kukusatugopola ku yindu yaunami

FIDIYO: Usyesyene Wamgopwele (5:16)

Aŵalanje Salimo 91:14, kaneko akambilane chiwusyo achi:

• Ana Yehofa akutusalila kuti chachitutendela chichi naga tukumnonyela soni tukupopela kwa jwalakwe jika?

6. Tukusamlumba Mlungu patuli kumisongano

Patukuŵecheta ngani, kwimba nyimbo soni kwanga pamisongano, tukusaŵa tuli kumchimbichisya Yehofa soni kwalimbikasya ŵane. Aŵalanje Salimo 22:22, kaneko akambilane yiwusyo ayi:

• Ana pali pamisongano akusasangalalaga kupikana yakuŵecheta ŵane?

• Ana mpaka akosechele kuti akajanje pamisongano?

7. Yehofa akusasangalala patukwasalila ŵane yatukulijiganya

Pana matala gejinji gampaka twasalile ŵandu ŵane usyesyene wa m’Baibulo. Aŵalanje Salimo 9:1 soni 34:1, kaneko akambilane chiwusyo achi:

• Ana ni chichi chalijiganyisye kutyochela m’Baibulo chakusaka kumsalila jwine jwakwe?

YALIJIGANYISYE

Tukusamsangalasyaga Mlungu patukumtumichila jwalakwe jika, patuli pamisongano nambosoni patukwasalila ŵane yatulijiganyisye.

Yiwusyo Yakuwilisya

• Ana mpaka tumanyilile chamtuli naga Mlungu akusajitichisya dini jetu?

• Ana ligongo chichi tukusosekwa kumtumichila Yehofa jika?

• Ana ligongo chichi tukusosekwa kumlumba Mlungu pampepe ni achimjetu ŵakusaka kumsangalasya jwalakwe?

YAKULINGA YINESONI

Mu ngani jakuti “Apano Jwangalambilasoni Yiwanichisyo” aŵalanje yiŵatesile jwamkongwe jwine kuti aleche kulambila yiwanichisyo yakusepa.

“Baibulo Jikusachenga Umi wa Ŵandu” (Sanja ja Mlonda, July 1, 2011)

Alijiganye yampaka atende kuti ajigaleje nawo mbali pamisongano ja mpingo.

“Amlumbeje Yehofa Mumpingo” (Sanja ja Mlonda, Januwale 2019)

Chitulole ya yayamkamuchisye mnyamata jwine ligongo lyakwawula kumisongano ja mpingo atamose kuti pandanda yaliji yakusawusya.

Yehofa Ŵangamuchisye 3:07

Aklistu ŵajinji akusakamulichisya masengo msalaba pakupopela, ana m’weji tukusosekwa tuwukamulichisyejesoni masengo?

“Ligongo Chichi ŵa Mboni sya Yehofa Ŵangakamulichisyaga Masengo Msalaba (Mtanda) Pakulambila?” (Ngani ja pa intaneti)