LIJIGANYO 6

Kusala Kakamulicisye Masengo ka Lilemba

Yohane 10:33-36

YACITULIJIGANYE: Ngakusosekwa kwamba kuŵalanga lilemba kaneko ni kuwutucila ku songa jine. Ŵakamucisyeje ŵakupikanila ŵawo kupikanicisya kukamulana kwa lilemba lyaŵalasilelyo ni songa jakusala.

MWAMPAKA ATENDELE:

Agombelecesye maloŵe gakusosekwa mnope. Paŵalasile lilemba agombelecesye maloŵe gagakamulana cenene ni songa jawo. Mpaka atende yeleyi pakuwilisya kusala maloŵego kapena kuwusya ciwusyo campaka cakamucisye ŵakupikanila kumanyilila maloŵe gakusosekwa mnopego.

Naga akukamulicisya masengo maloŵe gane pakusala songa ja palilembalyo, alolecesyeje kuti ŵakupikanila ŵawo akumanyilila kukamulana kwa maloŵego ni maloŵe ga m’Baibulo gagakusala ya songa jakusosekwa mnope.
Agombelecesye songa jakusosekwa mnope. Naga asasile ligongo lyakuŵalanjila lilemba, asalejesoni kukamulana kwakwe ni maloŵe gakusosekwa mnope ga m’lilembalyo.

Pakutagulila lilemba, Baibulo jawo jiŵeje jewugule. Yeleyi yikusakamucisya ŵakupikanilawo kulola kukamulana kwa yakusalayo ni lilemba lyaŵalasilelyo.
Asaleje mwangasawusya mwampaka akamulicisye masengo lilembalyo. Aŵambaleje kusala yindu yanganiyiŵa yikamulene ni songa jakusosekwa ja lilembalyo. Winji wa songa syampaka asagule kuti asitagulile mwakupikanika cenene mpaka yijigalilesoni ni yayimanyi ŵakupikanila ŵawo panganijo soni kusosekwa kwa songasyo.