MTWE 16
Amkaneje Satana
“Amkaneje Satana ni jwalakwe cacatila”—YAKOBO 4:7.
1, 2. Ana tukusosekwa kumanyilila cici pakwamba ya Satana ni yiŵanda yakwe?
M’CILAMBO ca sambano, umi uciŵa wakusangalasya. Tucitama mpela muŵasacile Mlungu pandanda. Nambo apano tukutama m’cilambo cacikulamulilidwa ni Satana soni yiŵanda yakwe. (2 Akolinto 4:4) Atamose kuti nganituŵa tum’weni Satana ni yiŵandayi, nambo yipali soni yili yamacili mnope.
2 Mu mtwe awuno, citukambilane yampaka tutende kuti tuŵe paunasi wambone ni Yehofa, soni yampaka tutende pakusaka kulicenjela kwa Satana. Yehofa atusimicisye kuti catukamucisyeje. Nambo tukusosekwa kumanyilila matala gakusakamulicisya masengo Satana ni yiŵanda yakwe pakusaka kutuloŵesya soni kutujonanga.
“SATANA ALI MPELA LISIMBA LYAKUTONGOLA”
3. Ana cakulinga ca Satana cili cici kwa m’weji?
3 Satana akusaŵeceta kuti ŵandu akusalambila Yehofa pakusaka kupata kanekakwe, soni naga ali asimene ni yakusawusya paumi wawo mpaka alece kumtumicila Yehofajo. (Aŵalanje Yobu 2:4, 5.) Satana ni yiŵanda yakwe akusalingalinga kumsokonasya mundu jwakusaka kulijiganya ya Yehofa. Jwalakwe ni yiŵanda yakwe akusatumbila mnope naga mundu alipelece kwa Yehofa soni kubatiswa. Baibulo jikusawanicisya Satana ‘mpela lisimba lyakutongola, lyalikupita mcisosasosa jwakuti amlye.’ (1 Petulo 5:8) Satana akusasaka konanga unasi wetu ni Yehofa.—Salimo 7:1, 2; 2 Timoteo 3:12.
Satana akusatumbila patukusalipeleka acimsyewe kwa Yehofa
4, 5. (a) Ana Satana nganaŵa akombwele kutenda cici? (b) Ana maloŵe gakuti “amkaneje Satana” gakugopolela cici?
4 Nambo ngatukusosekwa kumjogopa Satana ni yiŵanda yakwe. Yehofa akwete macili gakutucenjela. Yehofa akutusimicisya kuti “likuga lyekulungwa” lya Aklistu ŵasyesyene licikulupuka “pa yisawusyo yekulungwa.” (Ciwunukuko 7:9, 14) Pangali cilicose campaka Satana atende pakulepelekasya yeleyi ligongo Yehofa akwacenjela ŵandu ŵakwe.
5 Naga tukumŵandicila mnope Yehofa, nikuti Satana nganaŵa akombwele kusokonasya unasi wetu ni Yehofajo. Maloŵe ga Mlungu gakusatusalila mwakusimicisya kuti, “Yehofa caciŵa namwe naga m’mwejo mkwendelecela kuŵa najo.” (2 Mbili 15:2; aŵalanje 1 Akolinto 10:13.) Acalume ni acakongwe ŵakulupicika ŵakala mpela Abele, Enoki, Nowa, Sala, soni Mose, ŵamkanile Satana mwakumŵandicila Yehofa. (Ahebeli 11:4-40) M’wejisoni mpaka tukombole. Maloŵe ga Mlungu gakutusimicisya kuti “Amkaneje Satana ni jwalakwe cacatila.”—Yakobo 4:7.
“TULI PANGONDO”
6. Ana Satana akusatujimucila mwamtuli?
6 Atamose kuti Satana akumanyilila kuti Yehofa nganaŵa amkundile kuti atujonanje, nambo jwalakwe cajendelecele kulingalinga kusokonasya unasi wetu ni Mlungu. Masiku agano, Satana akutujimucila m’matala gakulekanganalekangana soni akukamulicisya masengo matala gaŵele mkugakamulicisya kwa yaka yejinji. Ana gane mwa matala gelega ni gapi?
7. Ligongo cici Satana akulimbana ni ŵandu ŵa Yehofa?
7 Ndumetume Yohane jwalembile kuti, “Cilambo cosope cili m’miyala mwa jwakusakalajo.” (1 Yohane 5:19) Satana akucilamulila cilambo cakusakalaci soni akusacilila ali mkwalamulila ni ŵandu ŵa Yehofa ŵakwe. (Mika 4:1; Yohane 15:19; Ciwunukuko 12:12, 17) Satana akumanyilila kuti kamsigalile kandaŵi kamnono, ni akulingalinga mwamacili kutusokonasya kuti tuŵe ŵangakulupicika kwa Mlungu. Ndaŵi sine akusatenda yeleyi mwakuwonecela nambo pane mwangawonecela.
8. Ana Mklistu jwalijose akusosekwa kumanyilila cici?
8 Pa Aefeso 6:12, tukusaŵalanga kuti, “Tuli pangondo, . . . jakulimbana ni makuga ga misimu jakusakala jamwinani.” Mklistu jwalijose ali pangondo jakulimbana ni Satana soni yiŵanda. Tukusosekwa kumanyilila kuti jwalijose juŵalipelece kwa Yehofa ali pangondo jeleji. Mu cikalata cakwe cakwawula ku Efeso, ndumetume Paulo jwadandawulile Aklistu katatu kose kuti aŵe “ŵakulimbangana.”—Aefeso 6:11, 13, 14.
9. Ana Satana ni yiŵanda yakwe akusalinga kutenda cici kwetuwe?
9 Satana ni yiŵanda yakwe akusalinga kutulambusya m’matala gakulekanganalekangana. Naga tukombwele kumkana Satana pa mbali jine jakwe ngayikugopolela kuti mpaka tukombolesoni kumkana mumbali sine. Satana akusalingalinga kumanyilila yakulepela yetu ni kusagula litala lyakutusokonacisya. Nambo nganituŵa tutanjile, ligongo Baibulo jikusatusalila matala gosope gakusakamulicisya masengo Satana. (2 Akolinto 2:11; alole Maloŵe Gakumbesi 31.) Litala limo lyakusakamulicisya masengo lili kutenda yamisimu.
AKATENDAGA MKAMULANO WULIWOSE NI YIŴANDA
10. (a) Ana kutenda yamisimu kukusapwatikapo cici? (b) Ana Yehofa akusakuwona wuli kutenda yamisimu?
10 Yamisimu yikusapwatikapo kutenda yindu yamasenga mpela kulocesya ya msogolo, usaŵi, kwaloga ŵane, kapena kuŵecetana ni ŵandu ŵawe. Baibulo jikusasala kuti kutenda yamisimu kuli “kwakunyalaya” soni ngatukusosekwa kupwatikanya yamisimu ni kulambila kwetu Yehofa. (Detulonomo 18:10-12; Ciwunukuko 21:8) Aklistu akusosekwa kuŵambala cilicose cakwayana ni yamisimu.—Aloma 12:9.
11. Ana kola lung’wanu ni yamasenga mpaka kutulongolele kwapi?
11 Satana akusamanyilila kuti naga tukutenda lung’wanu ni yamasenga nikuti mpaka yiŵe yangasawusya kwa jwalakwe kutugwicisya ku yamisimu. Yiliyose yakwayana ni misimu mpaka yijonanje unasi wetu ni Yehofa.
SATANA AKUSALINGALINGA KUTUSOKONASYA
12. Ana Satana akusalinga camtuli kusokonasya kaganisye ketu?
12 Satana akusalingalinga kusokonasya kaganisye ka ŵandu. Mwapanandipanandi akusiŵatendekasya ŵandu kutanda kukayicila mpaka kwika pakuganisya kuti “yambone yili yakusakala, soni kuti yakusakala yili yambone.” (Yesaya 5:20) Satana akusalimbikasya nganisyo syakuti yajikusasala Baibulo yili yangakamula masengo soni kuti mpaka tuŵe ŵakusangalala naga ngatukwendela yakusasala Mlungu.
13. Ana Satana aŵele ali mkulinga camtuli kutandisya msimu wakukayicila?
13 Litala limo lyakusakamulicisya masengo Satana lili kwatendekasya ŵandu kuti akayicileje. Aŵele ali mkulikamulicisya masengo litalali kwandaŵi jelewu. Mumgunda wa Edeni, jwatandikasisye mtima wakukayicila mwa Hawa pakum’wusya kuti, “Ana yisyene kuti Mlungu ŵatite mkalya yisogosi ya m’citela cilicose ca mumgundamu?” (Genesesi 3:1) Kaneko mu ndaŵi ja Yobu, Satana jwam’wusisye Mlungu pameso pa malayika kuti, “Ana kogopa Mlungu kwa Yobu kuli kwalulele?” (Yobu 1:9) Panyuma pakuti Yesu ali abatiswe, Satana ŵaŵecete mwakulikwesya pameso pa Yesu kuti, “Naga mli mwanace jwa Mlungu, mgalamule magangaga kuti gaŵe mkate.”—Mateyu 4:3.
14. Ana Satana mpaka ŵatendekasye camtuli ŵandu kutanda kukayicila kuti yamisimu yili yakogoya?
14 Masiku aganosoni, Satana akwendelecela kwatendekasya ŵandu kola msimu wakayicila. Akusatendekasya ŵandu kayicila naga yamisimu yili yakusakala mwakutendekasya yamisimu yine kuwoneka mpela yambone. Atamose Aklistu ŵane ayikene pakujigalika nikaganisye keleka. (2 Akolinto 11:3) Ana mpaka tutende cici kuti tulicenjele acimisyewe? Ana mpaka tusimicisye camtuli kuti Satana ngakutulambusya? Kwende tukambilane matala gaŵili gampaka Satana atukalamucile. Matalaga gali yakusangalasya, soni cikamucisyo ca mtela.
SATANA AKUSAPATILA UPILE PA YINDU YATUKUSAYINONYELA PAKUSAKA KULIMBANA NI M’WEJI
15. Ana mpaka tutende camtuli yamisimu kupitila mu yakusangalasya?
15 Masiku agano, mafilimu gejinji, mafidiyo, mapulogalamu ga pa TV, pa Intaneti soni ung’asi wa pakompyuta akusalosya yamisimu, yausaŵi soni yamasenga. Ŵajinji akusayiwona yeleyi mpela yindu yakusangalasya soni ŵangamanyilila kogoya kwakusyoŵelela yamisimu. Mundu mpaka atandesoni kunonyela yindu yamisimu kupitila mu yindu mpela kulupilila ndondwa, kutenda cisango pakamulicisya masengo tumisela twa m’miyala, makadi ga yamisimu, soni ligalasi lya masenga. Satana akusasisa kogoya kwa yinduyi ni kuyitendekasya kuwoneka mpela yacilendo, yakutesya lung’wanu, soni yakusangalasya. Ŵandu mpaka ayikane pakuganisya kuti pangali cakogoya cilicose ni kulolela yamisimu kapena yamasenga naga ali ngakutenda nawo yamisimuyo. Ligongo cici kaganisye keleka kali kakogoya?—1 Akolinto 10:12.
16. Ana ligongo cici tukusosekwa kuyikana yakusangalasya yayikusalosya yamasenga?
16 Satana ni yiŵanda ngaŵa mkumanyilila nganisyo syetu. Nambo mpaka amanyilile yatukusakumbila soni kuganisya mwakulolecesya yatukusagula kapena yatukulisagulila liŵasa lyetu, kupwatikapo yakusangalasya yatukusasagula. Naga tukusagula mafilimu, nyimbo, kapena mabuku gagakusalosya ŵandu ŵakuŵeceta ni misimu, yamasenga, ŵandu ŵakamwilwe ni misimu jakusakala, usaŵi, kusyuka cinecakwe panyuma pakuwa, kapena yine yakulandana ni yeleyi, Satana ni yiŵanda yikusamanyilila kuti tukwete lung’wanu ni yamisimu. Pelepa ni pacacilinga mnope kutukwisilila ku yamisimu.—Aŵalanje Agalatiya 6:7.
17. Ana Satana akusapatilapo upile wamtuli ligongo lyakusacilila kwetu kola cilu cambone?
17 Satana akusapatilasoni upile pakusacilila kwetu kukola cilu cambone. Masiku agano, ŵandu ŵajinji akulwala yilwele yakogoya. Mundu mpaka alinje mitela jakulekanganalekangana nambo ni ngapola. (Maliko 5:25, 26) Mwine mpaka atande kwasa mtima soni kusacilila kulinga cikamucisyo ca mtela cine cilicose. Nambo mpela Aklistu tukusosekwa kuŵa ŵakusamala kuti tukasagula cikamucisyo ca mitela jajikupwatika kukamulicisya masengo “macili gamasenga.”—Yesaya 1:13.
Pakulwala amjegamileje Yehofa
18. Ana Mklistu akusosekwa kuŵambala cikamucisyo ca mtela wamtuli?
18 Ndaŵi ja Ayisalayeli ŵakala, papali ŵane ŵaŵakamulicisyaga masengo “macili gamasenga.” Yehofa ŵasalile jemanjaji kuti, “Patambasukulile makono gawo mwinani, une ngusasiŵila meso gangu. Atamose apelece mapopelo gejinji, une jwangagapikanila.” (Yesaya 1:15) Agambe ganicisya, Yehofa nganiŵapikanilaga mapopelo gawo. Ngatukusosekwa kutenda cilicose campaka cijonanje unasi wetu ni Yehofa nambosoni kumlepelekasya kutukamucisya patulwasile. (Salimo 41:3) M’yoyo tukusosekwa kulolecesya kuti cikamucisyo ca mtela watukusaka kupocela ngacikukamulana ni yamisimu soni yamasenga. (Mateyu 6:13) Naga tuyiweni kuti cikamucisyoco cikamulana ni yamisimu tukusosekwa kuciŵambala.—Alole Maloŵe Gakumbesi 32.
YAMPAKA ATENDE NAGA NGANI SYA YIŴANDA SILI SYAKUWANDA MNOPE
19. Ana Satana aŵele mkwatendekasya ŵandu woga mwamtuli?
19 Ŵandu ŵane akusaganisya kuti Satana ni yiŵanda yili yagamba kuwanicisya. Ŵane akusamanyilila kuti yipali ligongo lya yindu yasimene nayo paumi. Ŵandu ŵajinji akusajijogopa mnope misimu jakusakala soni ali acikapolo wa misyungu ja yiŵanda. Ŵane akusiŵatendekasya ŵandu ŵane woga pakwasalila ngani syakogoya syakwayana ni yiŵanda. Ŵandu akusajigalika ni ngani syelesi ni kutanda kwasalila ŵane. Ngani syelesi sikusisyatendekasya ŵandu kumjogopa Satana.
20. Ana mpaka tuwandisye wuli unami wa Satana?
20 Aganicisye ayi, Satana akusasaka kuti ŵandu amjogopeje. (2 Atesalonika 2:9, 10) Jwalakwe ali jwakulambusya, jwakusamanyilila kukopa mitima ja ŵandu ŵakwete lung’wanu ni yamisimu soni kwatendekasya kulupilila yindu yayili yaunami. Ŵandu ŵeleŵa akusaŵeceta ngani syakuganisya kuti ŵasiweni soni kusipikana. Ŵandu pakuwilisya ngani syelesi ni payikusatupa yakonjecesya yawunami. Ngatukusosekwa kumkamucisya Satana kuwandisya woga mwakuwilisya ngani mpela syelesi.—Yohane 8:44; 2 Timoteo 2:16.
21. Ana tukusosekwa kuŵecetaga ya cici m’malo mwakuŵeceta yakwamba yiŵanda?
21 Naga jumo mwa ŵandu ŵa Yehofa jwatesilepo ya yiwanda, jwalakwejo ngakusosekwa kwambaga kwasalila ŵandu ŵane pakusaka kwasangalasya. Ŵandu ŵa Yehofa ngakusosekwa kwambaga kogopa cilicose campaka atende Satana ni yiwanda yakwe. Mmalo mwakwe tukusosekwa kwegamila kwa Yesu ligongo Yehofa ampele macili gampaka gatukamucisye. (Ahebeli 12:2) Yesu nganaŵecetaga ngani sya yiŵanda pakusaka kwasangalasya ŵakulijiganya ŵakwe. Jwalakwe jwagambaga kwasalila utenga wa Ucimwene soni “yindu yekulungwa ya Mlungu.”—Masengo 2:11; Luka 8:1; Aloma 1:11, 12.
22. Ana ali ŵakusimicisya kutenda cici?
22 Tukaliŵalila kuti cakulinga ca Satana cili konanga unasi wetu ni Yehofa. Jwalakwe akutenda yiliyose pakusaka kuti yeleyi yikombolece. Nambo wosopewe tukumanyilila matala ga Satana soni tukusosekwa kuŵa ŵakusimicisya kuti tukatendaga nawo yiliyose yakwaya ni yiŵanda. ‘Tukampa malo Satana’ kuti anandiye cikulupi cetu. (Aŵalanje Aefeso 4:27.) Naga tukukombola kulimbana ni Satana, tucigopoka ku yitega yakwe nikuŵa ŵakusunjika kwa Yehofa.—Aefeso 6:11.