Pangali Cacikalekasisye

Mundu jwine jwangakombola kwenda jwatamaga pacipata ca nyumba ja Mlungu ni kuŵendaga mbiya. Nambo lisiku line musi, jwalakwe jwam’weni Petulo ni Yohane ali mkwinjila m’nyumba ja Mlungu. Kaneko jwalakwe jwatite, ‘Conde angayile mbiya.’ Nambo Petulo jwatite, ‘Ngwete cindu cambone mnope kupunda mbiya cacinampe. M’lina lya Yesu, mjimuce ni mjende!’ Kaneko Petulo ŵamkamucisye mundujo kuti ajime, ni mundujo jwatandite kwenda. Ŵandu ŵajinji ŵasangalele ni cakusimonjesyaci mwamti ŵaŵele ŵakulupilila.

Nambo ŵambopesi ni Asaduki ŵatumbile. Jemanjaji ŵakamwile ŵandumetumewo, ni kwajawusya ku nganya ja magambo ni ŵawusisye kuti, ‘Ana ŵani ŵampele macili gakumposya jwele munduju?’ Petulo ŵajanjile kuti, ‘Twapocele macili kutyocela kwa Yesu Klistu, jwele jemanja mwam’wuleje.’ Nambo acimlongola ŵa dini ŵagumisile kuti, ‘Mkaŵecetaga yakwamba Yesu!’ M’yoyo, ŵandumetume ŵala ŵatite, ‘Tukusosekwa kuŵeceta ya jwalakwe, soni ngasituleka.’

Nambo Petulo ni Yohane ali agopoledwe, ŵajawile kwa ŵakulijiganya ŵane ni kwasalila yayatendekweyo. Jemanjaji ŵapopesile pampepe ni ŵam’ŵendile Yehofa kuti, ‘Conde atukamucisye kuti tuŵe ŵakulimba mtima kuti tujendelecele kutenda masengo gawo.’ Yehofa ŵapele jemanjaji msimu wakwe weswela, mwamti ŵajendelecele kulalicila soni kuposya yilwele. Ŵandu ŵajinji ŵaŵele ŵakulupilila. Nambo Asaduki ŵatendaga jelasi mwamti ŵataŵilesoni ŵandumetumewo ni kwaŵika m’nyumba ja ukayidi. Nambo cilo cine, Yehofa ŵatumisye lilayika lyalyawugwile matanga ga nyumba ja ukayidijo. Kaneko lilayika lila lyasalile ŵandumetumewo kuti, ‘Wujilani kunyumba ja Mlungu ni mkajiganye ŵandu kweleko.’

Lisiku lyakuyicisya lyakwe, ŵandu ŵane ŵajisalile nganya ja magambo ja acimlongola ŵa dini kuti, ‘Milango ja nyumba ja akayidi jili jewugale, nambo acalume ŵaŵataŵidwe ŵala mwangalimo. Jemanjajo akwajinganya ŵandu kunyumba ja Mlungu.’ Kaneko ŵandumetume ŵala ŵakamwile ni kwajawusyasoni kunganya ja magambo. Kweleko jwamkulungwa jwa ŵambopesi jwatite, ‘Twamlamwile jemanja kuti mkasim’ŵecetasoni ya Yesu!’ Nambo Petulo ŵajanjile kuti, “Tukusosekwa kumpikanila Mlungu mpela jwakulamula ngaŵaga ŵandu.”

Acimlongola ŵa diniwo ŵatumbile mnope mwamti ŵasakaga kwawulaga ŵandumetumewo. Nambo Mfalisi jwine jwakolanjidwa Gamaliyele jwajimi ni jwatite, ‘Asamale! Mlungu komboleka kuŵa ni jemanjaji. Ana kapena akusaka kulimbana ni Mlungu?’ Jemanjajo ŵampikanile. Ali ŵakwapwile yikoti ŵandumetuwo, ŵalamwilesoni kuti alece kulalicila, ni kaneko ŵagopwele. Nambo yeleyi nganiyatendekasya ŵandumetumewo kuleka kulalicila. Ŵajendelecele kulalicila utenga wambone mwakulimba mtima, m’nyumba ja Mlungu, soni kunyumba ni nyumba.