Ŵakulijiganya Akupocela Msimu Weswela

Ŵakulijiganya ŵa Yesu ŵapocele msimu weswela panyuma pa masiku 10, Yesu ali awujile kwinani. Yeleyi yatendekwe pa Pentekosite m’caka ca 33 C.E. Ŵandu ŵayice ku Yelusalemu kutyocela m’mikuli jejinji kukutenda cindimba ca Pentekositeci. Ŵakulijiganya ŵa Yesu ciŵandika 120 ŵasongene m’cipinda camwinani. Mwacisisimucisya, patendekwe cindu cakusimonjesya. Cindu cine mpela lilamba lya moto cawonecele penani pa mtwe wa jwakulijiganya jwalijose, soni jemanjajo ŵatandite kuŵeceta yiŵeceto yakulekanganalekangana. Kaneko m’nyumbamo mwagumbele masegwe gampela cimbungo camacili.

Acalendo ŵakutyocela m’mikuli jine ŵaŵayice ku Yelusalemu ŵapikene masegwego mwamti ŵawutucile kunyumba kula kukulola yayatendekwaga. Jemanjaji ŵasimonjile paŵapikene ŵakulijiganya ŵala ali mkuŵeceta yiŵeceto ya ŵanduwo. Acalendowo ŵatiga, ‘Nambo ŵanduŵa ali ŵakutyocela ku Galileya, ni akombola camtuli kuŵeceta yiŵeceto yetu?’

Kaneko Petulo ni ŵandumetume ŵane ŵajimi kusogolo kwa likuga lya ŵanduwo. Petulo ŵasalile ŵanduwo mwaŵawulajidwile Yesu soni kuti Yehofa ŵamjimwisye ku ŵawe. Petulo ŵatite, ‘Sambano Yesu ali kwinani kumkono wamlyo wa Mlungu, soni jwalakwe apungulile msimu weswela mpela muŵaŵecetele pakupeleka cilanga. Ali ni ligongo lyakwe myiweni soni mpikene yakusimonjesyayi.’

Yaŵaŵecete Petuloyi, yakwayiye mnope ŵandu ŵala, mwamti ŵawusisye kuti, “Ni tutende cici?” Petulo ŵatite, ‘Apitikuce ni kuleka yakulemwa yawo ni kubatiswa m’lina lya Yesu. Cacipocelasoni mtuka wa msimu weswela.’ Palisikuli, ciŵandika ŵandu 3,000 ŵabatiswe. Kutandila palisikuli kwawula msogolo, ciŵalanjilo ca ŵakulijiganya cajendelecele kutupa mnope mu Yelusalemu. Ni cikamucisyo ca msimu weswela, ŵandumetume ŵala ŵatamilikasisye mipingo jejinji. Ŵatendaga yeleyi pakusaka kuti ŵajiganyeje ŵakulijiganya ŵala yindu yosope yaŵalamulile Yesu.