Yesu Akwenda Pamesi

Yesu nganagambaga kwaposya ŵakulwala soni kwimusya ŵawe, nambo jwalakwe jwalamulagasoni mbungo soni wula. Pambesi pa lipopelo lyakwe mwitumbi mula, Yesu paŵalolite ku Nyasa ja Galileya ŵaciweni cimbungo. Ŵandumetume ŵakwe ŵaliji mwiboti. Jemanjaji ŵalagaga kupalasa libotilyo ligongo lya cimbungoco. Kaneko Yesu ŵatulwice mwitumbimo ni ŵajesile pamesi acijawulaga ciŵandika libotilyo. Ŵandumetumewo cakwamba kum’wona mundu ali mkwenda pamesi, wakamwile woga. Nambo Yesu ŵasalile jemanjajo kuti, ‘Mkasimjogopa, ndili une.’

Petulo jwatite, ‘Ambuje naga yisyene ali wawojo, andamule kuti yice kwaliko.’ Yesu ŵamsalile Petulo kuti, ‘Myice.’ Cimbungo cila cili mkupuga yilayila, Petulo jwakopwece mwibotimo ni kwenda kwawula kuŵaliji Yesu. Nambo Petulo paŵagambile kum’ŵandicila Yesu, ni kuciwona mucapujilaga cimbungoco, wamkamwile woga. Kaneko jwaliwonaga ali mkutiŵila. Kaneko Petulo jwagumisile kuti, ‘Ambuje, angulupusye!’ Yesu ŵamkamwile Petulo pamkono ni ŵam’wusisye kuti, ‘Ligongo cici mkayicileje? Cikulupi cenu cili kwapi?’

Yesu ni Petulo ŵakwesile libotilyo, ni mwangakaŵa cimbungo cila calesile kupuga. Ana mkuganisya kuti ŵandumetume ŵala ŵapikene uli mumtima? Jemanjajo ŵatite, “Yisyene, wawojo ali Mwanace jwa Mlungu.”

Jeleji nganijiŵape ndaŵi jele Yesu ŵalekasisye cimbungo kupuga. Ndaŵi jine, Yesu ni ŵandumetume ŵakwe ali akwesile liboti ni kwawula mbali jine ja nyasa, Yesu ŵapite kugona kunyuma kwa libotilyo. Paŵaliji m’lugono, cimbungo camacili catandite kupuga. Matumbela gaputaga libotilyo, mwamti lyagumbele mesi. Kaneko ŵandumetume ŵala ŵamjimwisye Yesu mwagumila kuti, ‘Mwalimu, tusigele panandi kuwa! Atukamucisye!’ Yesu ŵajimwice ni kujisalila nyasajo kuti, “Mtulale!” Ndaŵi jijojo, cimbungo cila soni nyasa jatulele. Yesu ŵawusisye ŵandumetumewo kuti, ‘Ana cikulupi cenu cili kwapi?’ Ŵandumetume ŵala ŵasalilene jwine ni mjakwe kuti, “Atamose mbungo ni nyasa yikumpikanila.” Ŵandumetumeŵa ŵalijiganyisye kuti naga akulupilila Yesu ni mtima wosope, nganasosekwa kogopa cilicose.