Yesu Akuŵa Mesiya

Yohane ŵaliji mkulalicila kuti, ‘Jwine jwakupunda une akwisa.’ Ali akwete yaka ciŵandika 30, Yesu ŵatyosile ku Galileya kwawula ku Lusulo lwa Yolodani kwele Yohane ŵabatisyaga ŵandu. Yesu ŵasacililaga kuti abatiswe ni Yohane, nambo Yohane ŵatite, ‘Nganguŵajilwa kwabatisya wawojo. Nambo wawojo ambatisye une.’ Yesu ŵamsalile Yohane kuti, ‘Yehofa akusaka kuti mmwejo mumbatisye une.’ Kaneko jemanjajo ŵajinjile m’Lusulo lwa Yolodanilo, ni Yohane ŵacitiŵisye m’mesi cilu cosope ca Yesu.

Paŵagambile kumcuwula, Yesu ŵapopesile. Pakatema keleko, kwinani kwawugwice soni msimu wa Mlungu wakuwoneka mpela ngunda watusile pa jwalakwe. Kaneko Yehofa ŵaŵecete kutyocela kwinani kuti, “Aju ali Mwanangu jwakunonyelwa, jwangusasangalala najo.”

Msimu wa Yehofa pawayice pa Yesu, jwalakwe jwaŵele Klistu kapena kuti Mesiya. Sambano jwaliji jwakoseka kutanda kamula masengo pacilambo capasi gaŵamtumile Yehofa.

Ali agambile kubatiswa, Yesu ŵapite m’cipululu muŵatemi kwa masiku 40. Paŵawusile, ŵapite kukumlola Yohane. Yesu paŵam’ŵandicile, Yohane ŵatite, ‘Aju ali Mwanace jwa Ngondolo jwa Mlungu jucacityosya yakulemwa ya ŵandu pacilambo capasi.’ Ni maloŵe gelega, Yohane ŵakamucisye ŵandu kumanyilila kuti Yesu ŵaliji Mesiya. Ana mkumanyilila cacamtendecele Yesu paŵaliji m’cipululu mula? Kwende tulole.