Yohane Akulalicila Yakwika kwa Yesu

Yohane, mwanace jwa Sekaliya ni Elisabeti pajwakusile, jwaŵele jwakulocesya. Yehofa ŵamkamulicisye masengo Yohane kuti ŵajiganye ŵandu yakwika kwa Mesiya. Nambo m’malo mwakwiganya ŵandu kunyumba syakupopelela kapena m’matawuni, Yohane jwalalicilaga m’cipululu. Ŵandu ŵayikaga kutyocela ku Yelusalemu soni ku Yudeya kuti akajiganyidwe ni Yohane. Jwalakwe ŵajiganyaga ŵandu kuti naga akusaka kumsangalasya Mlungu, ŵasosekwaga kuleka kutenda yakusakala. Ali apikene yeleyi, ŵajinji ŵapitikwice mtima ni kuleka yakulemwa yawo, kaneko Yohane ŵabatisye mu Lusulo lwa Yolodani.

Yohane ŵatamaga ni umi wangasaka yejinji. Ŵawalaga yakuwala yakupanganyidwa kutyocela kumanyunya ga ngamila soni ŵalyaga sombe ni uci wa mwitinji. Ŵajinji ŵatendaga lung’wanu ni Yohane. Atamose Afalisi ni Asaduki ŵaŵaliji ŵandu ŵakupoka ŵayikaga kukumlola. Yohane ŵasalile kuti, ‘Mkusosekwa kucenga yitendo yanu ni kupitikuka mtima. Mkaganisyaga kuti mli ŵapajika pakuŵa mli ŵanace ŵa Abulahamu. Yeleyi ngayikugopolela kuti mli ŵanace ŵa Mlungu.’

Ŵajinji ŵayikaga kwa Yohane ni kum’wusya kuti, ‘Ana tukusosekwa kutenda cici kuti tumsangalasye Mlungu?’ Yohane ŵajanjile jemanjajo kuti, ‘Naga akwete malaja gaŵili, ajigale gamo ampe jwanganakola.’ Ana mkumanyilila ligongo lyakwe ŵaŵecete yeleyi? Jwalakwe jwasakaga kuti ŵakumkuya ŵakweŵa amanyilile kuti naga akusaka kumsangalasya Mlungu, akusosekwa kwanonyelaga ŵane.

Yohane ŵaŵecete kwa ŵakomesya msongo kuti, ‘M’ŵeje ŵakulupicika soni mkajiŵilaga ŵandu.’ Jwalakwe ŵasalile asilikali kuti, ‘Mkatendaga yacinyengo soni mkaŵecetaga yaunami.’

Nombenawo Ŵambopesi ni Alefi ŵayice kwa Yohane ni kum’wusya kuti, ‘Ana mmwe mli ŵani? Jwalijose akusaka kummanyilila mmwejo.’ Yohane jwatite, ‘Une ndili maloŵe ga m’cipululu, ngwalongolela ŵandu kwa Yehofa mpela muŵalocesye Yesaya.’

Ŵandu ŵayinonyelaga yaŵajiganyaga Yohane. Ŵajinji ŵaganisyaga kuti Yohane ŵaliji Mesiya. Nambo jwalakwe ŵasalile kuti, ‘Jwine jwamkulungwa mnope kupunda une akwika. Une nganimba jwambone mnope kuti mpaka ngombole gopola ngonji sya sapato syakwe. Une ngusabatisya ni mesi, nambo jwalakwe cacabatisya ni msimu weswela.’