Elisabeti Akwete Mwanace

Jwambopesi jwine jwakolanjidwa Sekaliya yalumo ni ŵamkwakwe ŵatamaga ciŵandika msinda wa Yelusalemu. Jwalakwe jwapali pali pamasile yaka yakupunda 400 citaŵile lutenje lwa Yelusalemu. Jemanjaji ŵaliji ŵalombane kwa yaka yejinji, nambo nganakola mwanace. Lisiku line Sekaliya paŵapelekaga mbopesi m’nyumba jakulambilila, lilayika lyakolanjidwa kuti Gabuliyele lyawonecele kwa jwalakwe. Sekaliya wamkamwile woga, nambo lilayika lila lyamsalile kuti, ‘Mkajogopa, namjigalile utenga wambone kutyocela kwa Yehofa. Ŵamkwenu cacikola mwanace jwamlume soni lina lyakwe liciŵa Yohane. Yehofa amsagwile Yohane kuti akamule masengo gapajika.’ Sekaliya ŵaliwusisye lilayika lila kuti, ‘Ana mpaka ngulupilile camtuli yeleyi? Ŵamkwangu ni une tuli ŵakalambale mnope mwamti ngaŵa mkola mwanace.’ Gabuliyele ŵatite, ‘Mlungu ni jwandumile kukumsalila utengawu. Nambo ligongo lyakuti ngamkungulupilila, cim’ŵe jwangaŵeceta mpaka pacacipagwa mwanacejo.

Palisikuli Sekaliya jwatamilisye m’cipinda ceswela kupunda mwaŵatendelaga. Kaneko ali akopwece kusa, ŵandu ŵaŵamjembeceyaga ŵasakaga kumanyilila yayamtendecele. Nambo jwalakwe nganakombola kuŵeceta, mwamti jwatandite kuŵeceta ni makono. Ni ŵanduwo ŵayimanyi kuti Sekaliya jwapocele utenga wakutyocela kwa Mlungu.

Mkupita kwandaŵi, Elisabeti jwakwete citumbo ni jwaŵelece mwanace jwamlume mpela mulyaŵecetele lilayika lila. Acimjakwe soni acanasi ŵa Elisabeti ŵayice kukumlola mwanacejo. Jemanjaji ŵaliji ŵakusangalala mnope. Elisabeti ŵatite, ‘Lina lyakwe caŵe Yohane.’ Ni jemanjajo ŵatite, ‘Mwiŵasa mwenu pangali mundu jwakwete lina lyelelyo. Mumpe lina lya ŵamkwenu lyakuti Sekaliya.’ Nambo Sekaliya jwalembile maloŵe gakuti, ‘Lina lyakwe lili Yohane.’ Kutandila pelepo, Sekaliya jwatanditesoni kuŵeceta. Ngani jakwamba mwanacejo jawandile mu Yudeya mosope. Ni ŵanduwo ŵaliwusyaga kuti, ‘Ana mwanaceju pacacikula caciŵa mundu jwamtuli?’

Kaneko Sekaliya jwagumbalilwe ni msimu weswela. Jwalakwe jwasasile mkanipaŵe kuti, ‘Yehofa acimbicikwe. Jwalakwe jwatesile cilanga ni Abulahamu kuti cacitumisya mkulupusyo, jucaciŵa Mesiya jucacitukulupusya. Yohane caciŵa jwakulocesya soni cacikolosya litala lya Mesiya.’

Nambo patendekwesoni cindu cine capajika kwa Maliya juŵaliji m’balegwe Elisabeti. Citumanyilile yeleyi mumtwe wakuyicisya.