Ucimwene Wakulandana ni Citela Cekulungwa

Lisiku line cilo, Nebukadinesala ŵasagamile sagamisi syakutesya woga. Jwalakwe ŵaŵilasile acalume ŵalunda ŵaŵamtumicilaga kuti amsalile ngopolelo jakwe. Nambo pangali jwalijose juŵapakombwele gopolela yaŵasagamileyo. Pambesi pakwe, mwenyejo jwamsalile Daniyele yaŵasagamileyo.

Nebukadinesala ŵamsalile Daniyele kuti, ‘Mu sagamisi syangu, naciweni citela. Citelaco cakusile mnope mpaka cayice m’mawunde. Citelaco cawonecelaga kulikose pacilambo capasi. Cakwete masamba gakusalala soni yisogosi yejinji. Yinyama yapumulaga pa m’bwilili wakwe, soni yijuni yataŵile yisusi munyambi syakwe. Kaneko lilayika lyayice kutyocela kwinani. Lyagumisile kuti, “Agwisye citelaco, soni akatanye nyambi syakwesyo. Nambo akatyosya cisici ni miciga jakwe, soni acitaŵe cisicico ni ngwambala sya cisyano ca ayiloni ni kopa. Mtima wa citelaco ucicenga kutyocela ku mundu ni kuŵa wacinyama camwitinji, soni akunde kuti ndaŵi 7 simale. Ŵandu wosope cacimanyilila kuti Mlungu ali Jwakulamulila soni mpaka apelece ucimwene kwa mundu jwalijose jwakusaka kumpa.”’

Yehofa ŵamsalile Daniyele ngopolelo sya sagamisisyo. Daniyele ali apikanicisye ngopolelo sya sagamisisyo wamkamwile woga. Jwalakwe jwatite, ‘Mwenye ŵangu, yikaliji cenene sagamisi sikakwaye acimmagongo ŵawo, nambo sikwaya wawojo. Citela cekulungwa cacagwisidweco cikwimila wawojo. Ngasaŵa mwenye, soni cacilya manyasi mpela yinyama yamwitinji. Nambo ligongo lyakuti lilayikalyo lyaŵecete kuti akatyosya cisici ni miciga jakwe, wawojo caciŵasoni mwenye.’

Pali pamasile caka, lisiku line Nebukadinesala ŵajendaga penani panyumba jakwe ja ucimwene, kwineku ali mkuwulumba msinda wa Babulo. Ni ŵaŵecetaga kuti, ‘Alole msinda wakusalala undaŵile. Ŵani ŵampaka alandane ni une!’ Paŵaŵecetaga yeleyi, kwapikanice maloŵe gakutyocela kwinani kuti, ‘Nebukadinesala! Kutandila apano nganim’ŵasoni mwenye.’

Ndaŵi jijojo lunda lwamtyocele Nebukadinesala, mwamti ŵatandite ganisya mpela nyama ja mwitinji. Jwalakwe jwatyosile kunyumba jakwe ja ucimwene ni kuja kutamaga ni yinyama yakwitinji. Wumbo sya Nebukadinesala syakusile mpela mang’omba ga cimbanga, soni ngalaŵesa syakwe syaliji mpela sya yijuni.

Pali pamasile yaka 7, nganisyo sya umundu syam’yicilesoni mwamti Yehofa ŵam’ŵisilesoni jwalakwe kuŵa mwenye jwa ku Babulo. Kaneko Nebukadinesala jwatite, ‘Ngumlumba Yehofa, Mwenye jwa kwinani. Sambano nayimanyi kuti Yehofa ali Jwakulamulila. Jwalakwe akusasangalala ni ŵandu ŵakulinandiya, soni mpaka apelece ucimwene kwa jwalijose jwakumsaka kumpa.’