Nganatindiŵala

Panyuma pakuti Nebukadinesala asagamile sagamisi syakwamba ciwanicisyo, jwalakwe jwapanganyisye ciwanicisyo cekulungwa ca golidi. Jwalakwe ŵacijimice ciwanicisyoco m’ciŵata ca ku Dula. Kaneko jwaŵilasile ŵandu ŵakusosekwa mnope m’cilambomo kupwatikapo Sadilaki, Mesaki ni Abedinego, kuti asongane pameso pa ciwanicisyoco. Mwenyejo jwalamwile kuti, ‘Pacapikane lisegwe lya yitolilo, yakwimbila yampela gitala, soni yakwimbila yine, atindiŵalile ciwanicisyoco. Jwalijose jwacakane kutindiŵala caponyedwe m’cilangali ca moto.’ Ana Ahebeli ŵatatu ŵala akacitindiŵalile ciwanicisyoco, kapena akalambilaga Yehofape basi?

Kaneko mwenye jwalamwile kuti nyimbo sitande. Ŵandu wosope ŵacitindiŵalile ciwanicisyoco, nambo Sadilaki, Mesaki ni Abedinego ŵakanile. Acalume ŵane paŵayiweni yeleyi ŵamsalile mwenye kuti, ‘Ahebeli ŵatatuwo akanile kulambila ciwanicisyo cila.’ Nebukadinesala jwapite kwa jemanjajo ni jwatite, ‘Cinape upile wine wakumalisya kuti alambile ciwanicisyoci. Naga akane, cinaponye m’cilangali ca moto. Pangali mlungu jwalijose jwampaka ŵakulupusye jemanja m’miyala mwangu.’ Anyamatawo ŵajanjile kuti, ‘Akatupasoni upile wine. Mlungu jwetu mpaka atukulupusye. Nambo atamose akatukulupusya, tukwasimicisya mwenye kuti nganituŵa tulambile ciwanicisyoci.’

Nebukadinesala jwatumbile mnope. Jwalakwe jwasalile ŵakutumicila ŵakwe kuti ‘Akwisilile cilangali ca moto maulendo 7. Kaneko mwenyejo jwalamwile asilikali ŵakwe kuti, ‘Ŵataŵe anyamatawo ni kwaponya mwelemo.’ Motowo wakolele mnope mwamti asilikali ŵaŵaponyaga anyamatawo paŵagambile kuŵandicila cilangalico ŵawile ndaŵi jijojo. Ahebeli ŵala ŵaponyisye pamoto. Nambo Nebukadinesala pajwalingulile m’cilangalimo, ŵaweni acalume mcece ali mkwenda mkatimo m’malo mwa ŵatatu ŵala. Jwalakwe wamkamwile woga mwamti ŵasiwusisye nduna syakwe kuti, ‘Ana nganitwaponya acalume ŵatatu m’cilangali ca moto? Ngwawona ŵandu mcece soni jwinejo akuwoneka mpela lilayika.’

Nebukadinesala ŵaŵandicile cilangali ca motoco ni kuŵilanga kuti, ‘Mkopoce mwelemo ŵakutumicila ŵa Mlungu Jwakwinani Mnope.’ Jwalijose jwasimonjile kum’wona Sadilaki, Mesaki ni Abedinego ali akopwece m’cilangali ca moto ali ŵangawulala palipose. Yilu yawo, wumbo syawo, soni yakuwala yawo, nganiyipya soni ngananungaga lyosi.

Nebukadinesala jwatite, ‘Mlungu jwa Sadilaki, Mesaki ni Abedinego ali jwamkulungwa. Atumisye lilayika ni kwakulupusya jemanjajo. Pangali mlungu jwine jwampaka alandane ni Mlungu jwawo.’

Mwakulandana ni anyamata ŵatatu ŵacihebeli ŵala, ana mmwejo mli ŵakoseka kuŵa jwakulupicika kwa Yehofa mwangasamala kandu ya yindu yayikutendekwa?