Yehofa Nganamliŵalila Yosefe

Yosefe paŵaliji kundende, Falao mwenye jwa ku Iguputo jwasagamile sagamisi syakuti jwalijose nganakombolaga gopolela. Jumo mwa ŵakutumicila ŵakwe ŵamsalile kuti Yosefe mpaka apakombole gopolela sagamisisyo. Ndaŵi jijojo Falao ŵam’ŵilasisye Yosefe.

Falao ŵam’wusisye jwalakwe kuti, ‘Ana mpaka mgopolele sagamisi syangusi?’ Yosefe ŵamsalile Falao kuti, ‘Mu Iguputo muciŵa yakulya yejinji kwa yaka 7, kaneko yaka 7 yakuyicisya kuciŵa kwana sala. Asagule mundu jwalunda jwakuti mpaka akombole kusunga yakulya kuti msogolo ŵandu ŵawo akasasoŵa yakulya. Kaneko Falao ŵajanjile kuti, ‘Cinamsagule m’mwejo. Cim’ŵe jwaŵili kwa une.’ Ana Yosefe ŵamanyilile camtuli ngopolelo sya sagamisi sya Falao? Ligongo lyakuti Yehofa ŵamkamucisye Yosefe.

Kwa yaka 7, Yosefe ŵasungaga yakulya. Kaneko kwapali sala pacilambo cosope capasi mpela muŵaŵecetele Yosefe. Ŵandu ŵakutyocela m’yilambo yakulekanganalekangana ŵayikaga kukusuma yakulya kwa Yosefe. Yakobo, babagwe Yosefe, ŵapikene kuti ku Iguputo kwana yakulya, ni ŵatumisye ŵanace ŵakwe ŵakwana 10 kuti akasume yakulya.

Ŵanace ŵa Yakobo ŵala ŵapite kwa Yosefe. Ndaŵi jijojo jwalakwe ŵamanyilile jemanjajo. Nambo acakulugwewo nganammanyililaga Yosefejo. Ni ŵamtindiŵalile, mpela mwajwasagamilile Yosefe ali mwanace. Jwalakwe ŵasakaga kumanyilila naga acakulugwewo ŵaliji ciŵelape ŵakusawusya. Yosefe ŵasalile jemanjajo kuti, ‘Mli ŵakusonda. Mkusaka mmanyilile yakulopotoka ya cilambo cetu.’ Ni acakulugwewo ŵajanjile kuti, ‘Iyayi. M’weji tuli ŵandu 12 ŵapacibale ŵakutyocela ku Kanani. Jumo mwa m’weji jwawile, soni jwine jwamwana asigele ni baba ŵetu.’ Kaneko Yosefe jwatite, ‘Mkamjigale mpwenujo kuti namkulupilile jemanja.’ Ni jemanjajo ŵawujile kumangwawo.

Yakulya yila yili yimasile, Yakobo ŵatumisyesoni ŵanace ŵakwe ŵala ku Iguputo. Pandaŵiji, jemanjaji ŵamjigele Benjamini mpwawo jula. Yosefe pakusaka kwalinga acakulugwewo, ŵajigele kapu ja silifa ni kujisisa mu msaku wa tiligu wa Benjamini, ni kaneko ŵajimbile magambo gakwiŵa kapujo. Ŵakutumicila ŵa Yosefe ali ajisimene kapujo mu msaku wa Benjamini, acakulugwewo ŵasimonjile mnope. Jemanjajo ŵam’ŵendile Yosefe kuti ŵape cilango jemanjajo m’malo mwa Benjamini.

Sambano Yosefe jwamanyilile kuti acakulugwewo ŵacenjile ndamo syawo syakusakala. Jwalakwe nganasisa mwaŵapikanilaga mumtima. Jwatandite kulila ni jwatite, ‘Une ndili m’bale gwenu, Yosefe. Ana baba ŵangu ali ciŵela cijumi?’ Acakulugwewo ali apikene yeleyi ŵasimonjile mnope. Yosefe ŵasalile kuti, ‘Akasalijimba magambo payakusakala yaŵandendele. Mlungu ŵandumisye akuno kuti ngulupusye umi wawo. Sano anyakuce mwacitema akajigale baba kuti ayice akuno.’

Jemanjajo ŵapite kumangwawo kukwasalila baba ŵawo utenga wambonewu nambosoni kukwajigala kuti ajawule ku Iguputo. Panyuma pa yaka yejinji, Yosefe ni babagwe ŵaŵelesoni yimpepe.