Kapolo Juŵampikanilaga Mlungu

Yosefe ŵaliji jumo mwa ŵanace ŵacinandipile ŵa Yakobo. Acakulugwe ŵamanyililaga kuti baba ŵawo ŵamnonyelaga mnope Yosefejo. Ana mkuganisya kuti jemanjaji ŵapikanaga wuli mumtima ligongo lya yeleyi? Ŵamtendelaga jelasi soni ŵam’ŵengaga. Yosefe naga asagamile yakusimonjesya, ŵasalilaga acakulugwewo. Jemanjajo ŵaganisyaga kuti sagamisisyo syagopolelaga kuti lisiku line cacimtindiŵalila Yosefejo, ni ŵam’ŵengaga mnope kulekangana ni pandanda.

Lisiku line, acakulugwe Yosefe ŵapite kukulisya ngondolo ciŵandika msinda wa Sekemu. Ni Yakobo ŵamtumile Yosefe kuti akalole acakulugwewo. Jemanjajo ali am’weni Yosefe ali mkwika, ŵatandite kuŵecetana kuti, ‘Jwakusagamila jula akwika. Kwende tum’wulaje.’ Ni ŵamkamwile ni kumponya mwisimbo lyakusokoka mnope. Nambo Yuda, jumo mwa acakulugwe ŵasalile acimjakwewo kuti, ‘Tukam’wulaga. Nambo kwende tugambe kumsumisya kuti aŵe kapolo.’ M’yoyo, jemanjajo ŵamsumisye ni mbiya syakwana 20 sya silifa kwa ŵamalonda ŵa ku Midiyani ŵaŵajawulaga ku Iguputo.

Kaneko acakulugwe Yosefe ŵala ŵajigele mkanjo wa Yosefe ni ŵawuloŵece m’miyasi ja mbusi ni ŵapite nawo kwa baba ŵawo. Ni ŵawusisye kuti, ‘Ana awu nganiwuŵa mkanjo wa mwanagwawo?’ Ali awuweni mkanjowo, Yakobo ŵaganisyaga kuti Yosefe akamwilwe ni cinyama. Jwalakwe ŵatengwice mnope. Pangali mundu juŵapakombwele kum’myalasya.

Ali ayice ku Iguputo, Yosefe ŵamsumisye mpela kapolo kwa mundu jwine jwakumanyika mnope lina lyakwe Potifala. Nambo Yehofa ŵamkamucisyaga Yosefe. Potifala ŵayiweni kuti Yosefe jwaliji jwakulipeleka pamasengo soni jwakulupicika. Kaneko jwalakwe ŵam’ŵisile Yosefe kuŵa jwakulolela yindu yakwe yosope.

Ŵamkwakwe Potifala, ŵayiweni kuti Yosefe jwaliji jwakuwoneka cenene soni jwakwete cilu cambone. M’yoyo, lisiku lililyose ŵamsalilaga jwalakwejo kuti agone najo. Ana Yosefe ŵatesile cici? Jwalakwe jwatite, ‘Iyayi! Kweleku kuli kulemwa. Ambuje ŵangu akusangulupilila, soni wawojo ali ŵamkwawo. Naga ngugona ni wawojo cinamlemwecesye Mlungu!’

Lisiku line ŵamkwakwe Potifala ŵamkanganicisye Yosefe kuti agone najo. Ŵamkamwile Yosefe cakuwala cakwe, nambo jwalakwe jwalikulupwile ni kutila. Potifala ali ayice panyumba, ŵamkwakwewo ŵamsalile kuti Yosefe ŵasakaga kumkamulila. Nambo welewu waliji unami. M’yoyo, Potifala ŵatumbile mnope mwamti ŵam’ŵisile Yosefe mundende. Nambope Yehofa nganamliŵalila Yosefe.