Yakobo Ni Esawu Ŵatamilikasisye Mtendele Pasikati Pawo

Yehofa ŵamsimicisye Yakobo kuti cacimteteya mpela muŵatendele ni Abulahamu soni Isaki. Yakobo ŵatamaga kumalo gakolanjikwa kuti Halani kwele ŵalombele ni kola liŵasa lyekulungwa, soni ŵaliji jwakusicila.

Nambo Yehofa ŵamsalile Yakobo kuti, ‘M’wujile kucilambo cakumangwenu.’ M’yoyo, jwalakwe ni liŵasa lyakwe ŵatandite ulendo welewu wakuwujila kumangwawo. Ali mkati mwa ulendowo ŵasimene ni acalume ni ŵamsalile kuti, ‘Acimwene ŵenu Esawu akwisa ali pampepe ni acalume ŵakwana 400.’ Yakobo ali apikene yeleyi wamkamwile woga, ŵaganisyaga kuti Esawu akusaka am’wulasye jwalakwe soni liŵasa lyakwe. Ni jwapopesile kwa Yehofa kuti, ‘Angulupusye kwa m’bale jwangu.’ Palisiku lyakuyicisya Yakobo ŵamtumicisye Esawu mtuka wa ngondolo, mbusi, ng’ombe, ngamila ni abulu.

Cilo cakwe Yakobo ali jika ŵaliweni lilayika. Lilayikalyo ni Yakobojo ŵatandite kulimbana. Jwalakwe ŵalimbene nalyo mpaka kundaŵi. Atamose kuti Yakobo ŵawulele nambo nganakunda kuti limlece. Lilayikalyo lyatite kuti, ‘Mundece njaje!’ Nambo Yakobo ŵajanjile kuti, ‘Iyayi, mpaka mli munjaliwe.’

Kaneko lilayikalyo lyamjaliwe Yakobo. Ni jwalakwe ŵayimanyi kuti Yehofa ngakunda kuti Esawu am’wulasye.

Kundaŵi kwakwe, Yakobo ŵam’weni Esawu ali ni acalume ŵakwana 400. Ni Yakobo jwalipundile liŵasa lyakwe ni kuja kusimangana ni Esawu ni ŵamjinamile maulendo gakwana 7. Esawu ŵam’wutucile Yakobo ni kumkumbatila. Acalume ŵaŵiliŵa ŵatandite kulililana jwine ni mjakwe ni ŵatamilikasisye mtendele. Ana mkuganisya kuti Yehofa ŵapikene wuli ni yaŵatesile Yakobo pakumasya ungapikangana?

Kaneko Esawu ŵawujile kumangwakwe soni Yakobo ŵapelengenye ni ulendo wakwe. Yakobo ŵakwete ŵanace ŵacalume ŵakwana 12. Mena gawo galiji, Lubeni, Simiyoni, Lefi, Yuda, Dani, Nafutali, Gadi, Asa, Isakala, Sebuloni, Yosefe ni Benjamini. Jumo mwa ŵanaceŵa jwali Yosefe, Yehofa ŵamkamulicisye masengo kuti akulupusye ŵandu ŵakwe. Ana mkumanyilila kuti ŵatesile wuli yeleyi? Kwende tulole.