Mkamulano wa Chiklistu

KWA yaka chiŵandika 1,500, Yehofa Mlungu ŵaŵele ali mkutenda yindu ni Aisalaeli mpela ŵandu ŵakwe. Kaneko Yehofa ‘ŵakumbuchile ŵandu ŵa mitundu jine, pakwasapula ŵane pasikati pawo kuti aŵe ŵandu ŵakumanyikwa ni lina lyakwe.’ (Mase. 15:14) Ŵandu ŵakumanyikwa ni lina lya Yehofaŵa ŵaliji mboni syakwe. Jemanjaji ŵaliji ŵakamulana nganisyo soni yitendo yawo mwangasamala kandu ya kuŵatyochelaga. Kamulanya ŵandu ŵakumanyikwa ni lina lya Mlungu kwaliji yakuyichisya ya masengo gele Yesu ŵalamwile ŵakumkuya ŵakwe kuti agatende paŵatite, “Ni ligongo lyakwe jemanja mjawule, mkajiganye ŵandu ŵa ngosyo syosope. Mkabatisyeje m’lina lya Atati, ni lya Mwanache, ni lya msimu weswela, ni kwajiganya yosope yele yinamlamulile. Nipo unejo ndili ni jemanja masiku gosope, mpaka mbesi ja chilambo chapasi chino.”—Mat. 28:19, 20.

² Kulipeleka kwawo kwa Yehofa soni kubatisidwa, kwatendekasisye kuti aŵe jwakulijiganya jwa Yesu Klistu. Wawojo ali mbali ja ŵandu ŵali mu mkamulano wa Chiklistu wa pachilambo chosope, ŵangakusakunda kuti kulekangana chilambo, mtundu, kapena kapate ka yipanje kalekanganye. (Sal. 133:1) Yeleyi yitendekasisye kuti ŵanonyeleje soni kwachimbichisya Aklistu achimjawo mumpingo. Ŵane mwa Aklistuwo mpaka aŵe ŵakulekangana nawo mtundu, kwakutyochela kapenasoni kalijiganye. Kombolekasoni kuŵa kuti munyuma nganakamulanaga nawo ligongo lya kulekangana kweleku. Nambo apano ali pa unasi wekulungwa kupunda unasi uliwose uŵakwete chinga ni achimjawo, ni ŵandu ŵa mu dini jaŵaliji, kapena ni ŵamwiŵasa mwawo.—Maliko 10:29, 30; Akolo. 3:14; 1 Pet. 1:22.

KUCHENGA NGANISYO SYETU

³ Naga ŵane yikwasawusya kumalana ni lusagu lwalukusayika ligongo lya kulekangana mitundu, magulu ga ndale, ndamo, kapena yindu yine yayatamilichiche mnope mumtima mwawo, mpaka atende chenene kuganichisya ya Aklistu ŵandanda ŵa Chiyuda, ŵaŵasosekwaga kumasya lusagu lwawo ni ŵandu ŵanganaŵa mu dini ja Chiyuda. Yehofa paŵamsalile Petulo kuti ajawule ku nyumba ja Koneliyo juŵaliji jwamkulungwa jwa asilikali ŵa Chiloma, mwachinonyelo ŵamkosechelesye kaje mkanajawule.—Masengo, chaputala 10.

⁴ M’mesomkulola, Yehofa ŵamsalile Petulo kuti awulaje ni kulya yinyama yine yayaliji yangaswejela mwakamulana ni ndamo ja Chiyuda. Petulo paŵakanile yeleyi, ŵapikene maloŵe kutyochela kwinani gachitiji, “Yindu yele Mlungu yayiswejesye, m’mwejo kasimyitenda kuti yangalumbana.” (Mase. 10:15) Yaŵatesile Mlunguyi yamkamuchisye Petulo kosechelesya nganisyo syakwe pa masengo gaŵajembecheyaga kupochela, gagaliji, kwawula kwa mundu jwanganaŵa Myuda. Pakupikanila yaŵamsalile Yehofa, Petulo ŵasalile wosope ŵaŵasongene kuti, “Jemanja mkumanyilila kuti malamusi ga mpingo wa Chiyuda gangakunda mundu jwa mtundu wa Chiyuda kuti akamulane kapena kumanyigana ni ŵandu ŵa mitundu jine. Nambo Mlungu amanyisye une kuti ngamkolanga mundu jwalijose kuti ali jwangajenela kapena jwangalumbana. Ni ligongo lyakwe yiche mwangakayichila pambikene kuŵilanga kwenu.” (Mase. 10:28, 29) Kaneko, Petulo ŵawuweni umboni wakuti Yehofa ŵamjitichisye Koneliyo ni liŵasa lyakwe.

⁵ Saulo jwa ku Taliso, juŵaliji Mfalisi jwamlijiganye mnope, ŵasosekwaga kulinandiya soni kamulana ni ŵandu wamba ŵele pandanda nganasosekwaga kamulana nawo. Jwalakwe ŵasosekwagasoni kuti ŵandu ŵeleŵa amkamuchisye. (Mase. 4:13; Aga. 1:13-20; Afi. 3:4-11) Mpaka tuganichisyesoni muŵachenjele nganisyo ŵandu ŵane mpela Seligiyo Paulo, Diyonisiyo, Damalisi, Filimoni, Onesimo, soni ŵane paŵapochele ngani syambone ni kuŵa ŵakulijiganya ŵa Yesu Klistu.—Mase. 13:6-12; 17:22, 33, 34; Fil. 8-20.

KUPITILISYA KUSUNGA MKAMULANO WETU WA PACHILAMBO CHOSOPE

⁶ Mwangakayichila, chinonyelo cha abale ni alongo mumpingo chakamuchisye kuti amŵandichile Yehofa soni gulu jakwe. Achiweni chimanyilo chisyesyene cha Aklistu chachili chinonyelo chachikusamanyikasya ŵakulijiganya ŵasyesyene ŵa Yesu Klistu. Yesu ŵasalile ŵakulijiganya ŵakwe kuti, “Ngumpa jemanja lilamusi lyasambano lyakuti, mnonyelaneje jwine ni mjakwe. Mpela munamnonyelele une mula, jemanja akuŵajilwasoni kuti anonyelaneje jwine ni mjakwe. Naga mkunonyelana jwine ni mjakwe, pelepo ŵandu wosope tachimanyilila kuti jemanja mli ŵakulijiganya ŵangu.” (Yoh. 13:34, 35) Wawojo ŵatandite kumyamichila mnope Yehofa ni gulu jakwe paŵamanyilile kuti chinonyelo cha ŵandu mumpingo chikwamba kulosya mwakusanonyelelana abale ni alongo pachilambo chosope. Akukuwonasoni kukwanilichikwa kwa yakulochesya ya m’Baibulo yakwasonganganya ŵandu m’masiku gambesi kuti alambileje Yehofa mwamtendele soni mwakamulana.—Mika 4:1-5.

⁷ Paganichisya ya yindu yejinji yakulekanganya ŵandu yayipali masiku agano, ana ŵani ŵakaganichisye yakuti mpaka yikomboleche kamulanya ŵandu “ŵakutyochela ku mitundu josope ja ŵandu, ngosyo syosope, yilambo yosope ni soni ŵa yiŵecheto yosope”? (Chiw. 7:9) Aganichisye ya kulekangana kwakupali pasikati pa ŵandu ŵakusakamulichisya masengo yindu yapenani ni ŵandu ŵakusakuyape misyungu jakala. Aganichisyesoni ya maukangani gagakusapagwa ligongo lyakulekangana dini pasikati pa ŵandu ŵakulandana mtundu soni yilambo yakutyochela. Ŵandu ŵajinji pakusachilila mnope kulijimila pajika pa ngani syandale, yitendekasisye kuti aŵe ŵagaŵikangana. Kuganichisyasoni ya kulekangana pa kapate ka yipanje soni ya yindu yine yejinji yayikusalekanganya ŵandu, mpaka kututendekasye kumanyilila kuti Mlungu Jwamachiligose ni jwampaka akombole kwakamulanya ŵandu ŵakulekangana yilambo yatyochele, yiŵecheto, soni mitundu kuti anonyelaneje mnope soni kuti aŵe pamtendele.—Sak. 4:6.

⁸ Mkamulano welewu uli usyesyene, soni wawojo palipeleche ni kuŵa Mboni ja Yehofa jebatisidwe, akusaŵa mu mkamulano welewu. Ligongo lyakuti mkamulanowu uli wakamuchisya, akusosekwa kamuchisya kuti upitilisye. Mpaka tutende yeleyi pakuya maloŵe ga Paulo gagali pa Agalatia 6:10 gakuti, “Ndaŵi syosope naga tukupata lipesa, kwende twatendeleje ŵandu ŵane wosope yindu yambone, mnopemnope ŵakulupilila achimjetu.” Tukusosekwasoni kuya maloŵe aga, “Mkatendaga kandu ni mtima wakulinonyela, kapena wakulikwesya. Nambo mŵeje ŵakulinondiya, soni jwalijose amwoneje mjakwe kuti ali jwakumpunda jwalakwejo. Mkagamba kusaka yindu yayikumnonyelesya mmwejo jikape, nambosoni yayikwanonyelesya ŵane.” (Afi. 2:3, 4) Naga tukulingalinga kuti twawoneje abale ni alongo ŵetu mwakusiŵawonela Yehofa ngaŵaga mwakamulana ni kawoneche kawo, tuchipitilisya kusangalala ni mkamulano wetu wamtendele soni wakusangalasya.—Aef. 4:23, 24.

TUGANICHISYANEJE

⁹ Chiwanichisyo chaŵachisasile ndumetume Paulo, chikulosya kuti Aklistu mumpingo nganaŵa ŵagaŵikana nambo akusaganichisyana jwine ni mjakwe. (1 Akoli. 12:14-26) Yili yisyene kuti tukusatama mwakutalikangana mnope ni abale ni alongo ŵane ŵali mu mkamulano wa pachilambo chosopewu, nambope tukusaganichisyana jwine ni mjakwe. Naga abale ŵetu ŵane akulagasidwa, wosopewe tukusalaga mnope munganisyo. Nagasoni abale ŵetu ŵane akusoŵa yindu yakwakamuchisya paumi, kapena asimene ni ngosi sya m’chilengedwe, kapenasoni ngondo, wosopewe tukusalingalinga kupata matala gakuti twakamuchisye mwausimu soni mwakuchilu.—2 Akoli. 1:8-11.

¹⁰ Wosopewe tukusosekwa kwapopelelaga abale ŵetu lisiku lililyose. Ŵane akusalinjidwa kuti atende yakusakala. Ŵane akusimana ni yakusawusya yakuwonechela kwa ŵandu wosope. Ndaŵi sine ŵandu ŵakamula nawo masengo, soni ŵandu ŵakuŵandikana nawo nyumba akusiŵasisya mwangawonechela. (Mat. 10:35, 36; 1 Ates. 2:14) Tukusosekwa kwaganichisyaga abale ŵetuŵa ligongo lyakuti wosopewe tuli mu mkamulano wa pachilambo chosope. (1 Pet. 5:9) Pasikati petu panasoni abale ŵane ŵakumtumichila Yehofa mwakulimbichila, mpela ŵakulongolela masengo gakulalichila soni mumpingo. Ni panasoni ŵane ŵakwete udindo wakulolela masengo gakulalichila pachilambo chosope. Tukusosekwa kwapopelelaga wosopeŵa. Patukutenda yeleyi tukusalosya kuti tukusanonyela soni kwaganichisya abale ŵetuŵa, atamose kuti ndaŵi sine ngaŵa mkombola kwakamuchisya abaleŵa.—Aef. 1:16; 1 Ates. 1:2, 3; 5:25.

¹¹ Mu ndaŵi ja mbesiji, chilambo chigumbele ni yakusawusya yejinji, myoyo ŵandu ŵa Yehofa akusosekwa kuŵa ŵakoseka kamusyangana. Ndaŵi sine, pasitendekwe ngosi sya m’chilengedwe mpela yifomelesi soni yikumba ya mesi mpaka pasosekwe kupeleka chikamuchisyo chakuchilu chapawinji soni kukamula masengo gamakulungwa pakwakamuchisya abale ŵetu. Aklistu ŵa mu yaka 100 yandanda ŵalosisye chisyasyo chambone pa nganiji. Pakumbuchila yaŵasasile Yesu, ŵakulijiganya ŵa m’yilambo yine mwakusangalala ŵatumichisye chikamuchisyo abale ŵa ku Yudeya pandaŵi jele m’chilambomo mwapali sala. (Mase. 11:27-30; 20:35) Ndumetume Paulo ŵalinganyisye yakuti ŵandu apeleche chikamuchisyochi mwakulongosoka. (2 Akoli. 9:1-15) Masiku agano, abale ŵetu pasimene ni yakusawusya yine soni naga pakusosechela chikamuchisyo chakuchilu, gulu soni Aklistu ŵane akusalinganya yakwatumichisya chikamuchisyo chakusosechela.

ŴATUSAGWILE KUTI TUTENDEJE CHAKULINGA CHA YEHOFA

¹² Gulu jetu ja abale ŵakamulana pachilambo chosope jalinganyidwe kuti jitendeje chakulinga cha Yehofa. Apanopano, chakulinga cha Yehofa chili chakuti ngani syambone syakwamba Uchimwene silalichidwe pachilambo chosope chapasi kuti ŵandu ŵa mitundu josope asipikane. (Mat. 24:14) Yehofa akusasaka kuti patukutenda masengoga, tutendeje yindu mwakamulana ni ndamo syakwe syapenani. (1 Pet. 1:14-16) Tuŵeje ŵakusachilila kupikanilana jwine ni mjakwe soni kutenda yakomboleka kuti tujawusye pasogolo masengo gakulalichila ngani syambone. (Aef. 5:21) Kupundana ni kala kose, ajino ngaŵa ndaŵi jakwambaga kuganichisya yakusaka yetu, nambo jakuŵika Uchimwene wa Mlungu pa malo gandanda pa umi wetu. (Mat. 6:33) Kumbuchila yeleyi patukukamula masengo gakulalichila ngani syambone pampepe ni abale ŵetu, kuchitukamuchisya kuti tusangalaleje soni kuti chitupochele yindu yambone yangamala msongolo.

¹³ Mpela Mboni sya Yehofa, tuli ŵandu ŵapajika, ŵatwasagulidwe pasikati pa ŵandu kuti tuŵe ŵandu ŵandamo syambone, ŵakumtumichila Mlungu mwakulimbichila. (Tito 2:14) Kulambila kwetu Yehofa kukusatutendekasya kuti tuŵeje ŵakulekangana ni ŵane wosope. Ngatukusagamba kukamula masengo yimpepe ni abale ŵetu pachilambo chosope, nambo tukusaŵechetasoni chiŵecheto chimo cha usyesyene soni tukusatenda yindu mwakamulana ni usyesyene watukusaŵecheta. Yehofa ŵalochesye yeleyi kupitila mwa jwakulochesya Sefaniya kuti, “Tinjapitikusya [“kuchenga chiŵecheto,” NWT] ŵandu ŵa mitundu josope, nipo tachilumba une jikape ngaŵa milungu jine. Wosope ŵene tachilumbaga une.”—Sef. 3:9.

¹⁴ Kaneko Yehofa ŵamsalile Sefaniya kuti asale yakwamba mkamulano wa Aklistu wapachilambo chosope wawuŵele usyesyene masiku agano kuti, “Ŵandu ŵa ku Isalaeli uŵasigele ngasalemwa soni ngasaŵecheta yaunami kapena kulambusya. Yindu tichajendelaga chenene soni tachiŵa pambone, pangali jwine jwakumjogopa.” (Sef. 3:13) Kupikanichisya Maloŵe ga Yehofa ga usyesyene, soni kuchenga umi wetu ni kutamaga mwakamulana ni ndamo sya Yehofa, kukusatukamuchisya kuti tukamuleje masengo mwakamulana. Tukusakombola kutenda yindu yele ŵandu akusayiwona kuti nganituŵa tuyikombwele mwakamulana ni kalole ka umundu. Kusala yisyene, m’weji tuli ŵandu ŵa Mlungu ŵapajika, ŵatukusayikasya uchimbichimbi kwa jwalakwe pachilambo chosope.—Mika 2:12.