Misongano Jajikusalimbikasya “Kunonyelana ni Kutenda Yambone”

KWA YAKA mahandiledi gejinji, ŵandu ŵa Yehofa aŵele ali mkusongana pampepe. Kalakala ku Isalaeli, achalume wosope ŵajawulaga katatu ku Yelusalemu kukutenda yisangalalo yekulungwa. (Det. 16:16) Aklistu ŵa mu yaka 100 yandanda, ndaŵi syejinji ŵasonganaga mwakutamilichika m’nyumba sya ŵandu. (Fil. 1, 2) Lelo jino, tukusasangalalasoni kutenda misongano jampingo, ja dela, soni ja chigawo. Ligongo chichi ŵandu ŵa Mlungu akusasongana pampepe? Ligongo misongano jili mbali jakusosekwa mnope pa kulambila kwetu.—Sal. 95:6; Akolo. 3:16.

² Misongano jikusakamuchisyasoni ŵandu ŵakusasonganawo. Pakwamba ya Yisangalalo ya Masakasa, Mlungu ŵasalile Aisalaeli kuti, “Timwaŵilanje achalume wosope, achakongwe, ŵanache, ni achalendo ŵakutama m’misinda jenu, kuti jwalijose talipikanile jika malamusigo, soni kuti talijiganye kwajogopa Ambuje Mlungu jwenu, ni kugapikanila maloŵe gakwe mwakulupichika.” (Det. 31:12) Tukusasongana pampepe mnopemnope kuti ‘atujiganye Ambuje [“Yehofa,”NWT].’ (Yes. 54:13) Misongano jikusatukamuchisyasoni kuti tumanyigane chenene ni achimjetu soni tulimbikasyane nawo.

MISONGANO JAMPINGO

³ Ŵandu ŵaŵaŵele ŵakumkuya ŵa Yesu panyuma pa Pentekosite mu 33 C.E., ŵakuyaga ni mtima wosope yaŵajiganyaga ŵandumetume, soni ndaŵi syosope ŵaliji mkusongana kuti apikane yaŵajiganyaga ŵandumetume ŵala, soni “lisiku ni lisiku ŵasonganaga pampepe m’nyumba ja Mlungu jakupopelela.” (Mase. 2:42, 46) Aklistuŵa paŵasonganaga pampepe kuti alambile Mlungu, ŵaŵalangaga Malemba, soni yikalata yakulembedwa ni ŵandumetume soni ŵakumkuya ŵane ŵa Yesu. (1 Akoli. 1:1, 2; Akolo. 4:16; 1 Ates. 1:1; Yak. 1:1) Pasongangene ŵapopelagasoni. (Mase. 4:24-29; 20:36) Ndaŵi sine, ŵakambilanaga yachingangene nayo mu utumiki wa umishonale. (Mase. 11:5-18; 14:27, 28) Ŵakambilanagasoni yijiganyo ya m’Baibulo soni kwanilichikwa kwa yakulochesya. Ŵalijiganyaga yindu yakwakamuchisya kola ndamo syambone sya Chiklistu soni kuti aŵe ŵakulipeleka kwa Mlungu. Wosope ŵalimbikasyaga kuti aŵeje ŵakulimbichila pakulalichila ngani syambone.—Alo. 10:9, 10; 1 Akoli. 11:23-26; 15:58; Aef. 5:1-33.

⁴ Aklistu masiku agano, akusatenda misongano mpela muŵatendelega ŵandumetume kalako. Tukusapikanila maloŵe ga pa Ahebeli 10:24, 25 gakuti, “Kwende tukumbuchilaneje jwine ni mjakwe . . . . Kwende tukaleka ndamo syetu syakusongana pampepe mpela mwakusatendela ŵane. Mmalo mwakwe, kwende tulimbisyaneje mitima jwine ni mjakwe mnope, mnopemnope pakulola kuti Lisiku lya Ambuje likuŵandichila kwika.” M’masiku gambesi gakusawusyaga, tukusosekwa chilimbikasyo chachikusapatikana ligongo lyakusongana mwakutamilichika kuti tupitilisye kuŵa ŵakulimbangana mwausimu, soni kuti tuŵe Aklistu ŵakulupichika. (Alo. 1:11, 12) Aklistuwe, tukutamasoni sikati ja ŵandu ŵaunami ni ŵakwasokonasya achimjawo. M’weji tukusakana ndamo syangakamulana ni Mlungu. (Afi. 2:15, 16; Tito 2:12-14) Ana kwapisoni kwampaka tusonganeje kupunda kusongana ni ŵandu ŵa Yehofa? (Sal. 84:10) Ana panasoni chindu chine champaka chiŵe chakamuchisya kupunda kulijiganya, soni kukambilana Maloŵe ga Mlungu? Kwende tulole misongano jakulekanganalekangana jiŵajilinganyisye kuti jitukamuchisyeje.

MSONGANO WA KUMBESI KWA WIKI

⁵ Mbali jandanda pa msongano wa kumbesi kwa wiki jikusaŵa ngani jakutyochela m’Baibulo. Akusajilinganya kuti jakamuchisye ŵandu wosope, atamose ŵandu ŵakuti akutanda kwene kusongana. Nganiji jikusakamuchisya mnope ŵandu ŵachasambano, soni Aklistu ŵa mumpingo pa yakusosechela yawo yausimu.—Mase. 18:4; 19:9, 10.

⁶ Yesu Klistu ni ŵandumetume ŵakwe, soni ŵakulijiganya ŵane wa Yesu, ŵaŵechetaga ngani sya wosope mpela mwakusatendela m’mipingo ja ŵandu ŵa Yehofa masiku agano. Mwangakayichila, Yesu ŵaliji jwamkulungwa kupunda ŵandu ŵaŵapali pachilambo chapasi pa ngani jakuŵecheta ngani. Pakusala ya jwalakwe ŵane ŵaŵechete kuti, “Pangali mundu jwine ni kalakose juŵaŵechetepo yindu mpela yaŵechete jwalakwe.” (Yoh. 7:46) Yesu ŵaŵechetaga mpela mundu jwaulamusi, soni ŵaŵechetaga mwakwayika ŵandu pamtima. (Mat. 7:28, 29) Ŵandu ŵajinji ŵaŵakuyaga yiŵajiganyaga Yesu, yakamuchisye mnope. (Mat. 13:16, 17) Nombenawo ŵandumetume ŵakwe ŵajigalile chisyasyo chakwe. Pa Masengo 2:14-36, tukusaŵalanga ya ngani jakamula mtima jiŵaŵechete Petulo palisiku lya Pentekosite mu 33 C.E. Nganiji jalimbikasisye ŵandu ŵajinji kutenda yindu yaŵapikene. Pali papite ndaŵi, Paulo ŵaŵechete ngani ku Atene jajatendekasisye ŵandu kuti aŵe ŵakulupilila.—Mase. 17:22-34.

⁷ Masiku aganosoni, ngani sya wosope syasikusaŵechetedwa wiki jilijose m’mipingo, soni ngani sine syasikusaŵechetedwa m’misongano ja dela ni ja chigawo, sikusakamuchisya ŵandu ŵajinji. Nganisi sikusatukamuchisya kumanyilila yijiganyo ya Chiklistu, soni kuŵa ŵakulimbichila pa masengo ga Uchimwene. Naga tukwaŵilanjila ŵandu ŵachidwi kukupikanila ngani ja wosope, nikuti tuchakamuchisya mnope ŵandu kumanyilila yijiganyo yakusosekwa ya m’Baibulo.

⁸ Mitwe ja ngani sya wosope jikusaŵa jakulekanganalekangana. Nganisi sikusasala ya yijiganyo ni yakulochesya ya m’Baibulo, malamusi ga m’Baibulo soni yindu yampaka yikamuchisye maŵasa, yakusawusya yakulimbana nayo ŵachinyamata, soni ndamo sya Chiklistu. Ngani sine sikusasala ya yindu yakusimonjesya yaŵayipanganyisye Yehofa, soni sine sikusasala yampaka tulijiganye kutyochela kwa ŵandu ŵa m’Baibulo ŵaŵalosisye chikulupi, kulimba mtima, soni kulupichika.

⁹ Kuti ngani sya wosope siŵe syakamuchisya kwa m’weji, tukusosekwa kupikanila mwakusamala yayikuŵechetedwayo, soni tuloleje ni kuyaga nawo pakuŵalanga malemba jwakuŵecheta nganijo. (Luk. 8:18) Patusimichisye yindu yayikuŵechetedwayo, tuchiŵa ŵakusachilila mnope kuyikamulichisya masengo.—1 Ates. 5:21.

¹⁰ Naga ŵakuŵecheta ngani apali ŵajinji, mwangakayichila nikuti mumpingo mpaka muŵechetedweje ngani ja wosope wiki jilijose. Ndaŵi syejinji, yeleyi yikusakomboleka mwakwaŵilanga ŵakuŵecheta ngani kutyochela ku mipingo jakuŵandichila. Nambo naga pangali ŵakuŵecheta ngani ŵakwanila, mipingo jikusosekwa kulingalingaga kola nganisi mwampaka jikombolele.

¹¹ Mbali jaŵili pa msongano wa kumbesi kwa wiki jikusaŵa lijiganyo lya Sanja ja Mlonda. Lijiganyoli likusatendekwa pakukambilana ngani ja mu Sanja ja Mlonda jakulijiganya pakamulichisya masengo yiwusyo. Kupitila mu lijiganyo lya Sanja ja Mlonda, Yehova akusatupa chakulya chausimu chapandaŵi jakwe.

¹² Ndaŵi syejinji ngani syakulijiganya sikusasala mwampaka tukamulichisye masengo yajikusasala Baibulo pa umi wetu lisiku lililyose. Nganisi sikusakamuchisyasoni Aklistu mwampaka aŵambalile “msimu wa chilambo,” soni ndamo syakusakala. (1 Akoli. 2:12) Kupitila mu lijiganyo lya Sanja ja Mlonda tukusakombola kulola chenene lilanguka lya yijiganyo soni yakulochesya ya m’Baibulo yayikusatukamuchisya kuti tupikanichisyeje chenene usyesyene, soni kuti tujendejepe m’litala lya chilungamo. (Sal. 97:11; Mis. 4:18) Kusimanikwa pa lijiganyo lya Sanja ja Mlonda, soni kujigala nawo mbali, kukusatukamuchisya kuti tusangalaleje patukwembecheya chilambo chapasi chasambano, mwamuchiŵa m’mangwakwe mwachilungamo. (Alo. 12:12; 2 Pet. 3:13) Kusimanikwa pamisongano kukusatukamuchisyasoni kola ndamo syele msimu ukusakoposya soni kuti tusachilileje mnope kumtumichila Yehofa mwakulimbichila. (Aga. 5:22, 23) Kukusatukamuchisyasoni kuti tuŵe ŵakulimba patukulinjidwa, soni kuliwunjichila yipanje ‘yakutamilisya yele tiyichitukamuchisya msogolo,’ kuti ‘tukapochele umi wawuli umi usyesyene.’—1 Tim. 6:19; 1 Pet. 1:6, 7.

¹³ Ana mpaka tuwukamulichisye chamtuli upile wa chakulya chausimuchi? Tukusosekwa kosechela lijiganyolyo mkanipaŵe, chinga pajika kapena mpela liŵasa. Patukosechela tukusosekwa kulolagasoni malemba ganganagakamula maloŵe, soni yachitukajile pakwanga m’maloŵe getu pamisongano. Yeleyi yichitukamuchisya kuti usyesyene utamilichiche mumtima mwetu, soni kuti yikalimbikasye ŵane ŵachakapikaneje kwanga kwetu kwa chikulupi. Patukwapikanila ŵane mwachidwi pakwanga, tuchiwuwona umbone wa lijiganyolyo wiki jilijose.

MSONGANO WA MKATI MWA WIKI

¹⁴ Wiki jilijose mpingo ukusasongana m’Nyumba ja Uchimwene kukutenda msongano wakolanjikwa, Utumiki ni Umi Wetu wa Chiklistu. Msonganowu ukwete mbali sitatu syaŵasilinganyisye kuti situkamuchisye ‘kuŵajilwa’ kuŵa ŵakutumichila ŵa Mlungu. (2 Akoli. 3:5, 6) Ndandanda soni mabuku gakamulichisya masengo akusayisala mu kabuku ka Utumiki ni Umi Wetu wa Chiklistu—Pologalamu ja Misongano kakakusakopoka mwesi uliwose. Mu kabukuka mukusasimanikwasoni yisyasyo ya kalalichile yampaka tuyikamulichisye masengo mu utumiki.

¹⁵ Mbali jandanda ja msonganowu jakolanjikwa, Chipanje Chakusimanikwa m’Maloŵe ga Mlungu, jikusatukamuchisya kumanyilila chenene ngani sya m’Baibulo soni kulijiganya mwampaka tusikamulichisye masengo. Msonganowu ukusapwatikapo kuŵecheta ngani, kuŵalanga Baibulo soni kukambilana kutyochela mu kuŵalanga Baibulo kwa wiki jilijose. Mu kabuku ka Utumiki ni Umi Wetu wa Chiklistu—Pologalamu ja Misongano mukusasimanikwasoni yiwulili soni yakuti tutende yakamuchisya pakwiganya ngani sya m’Baibulosi. Yeleyi yichitukamuchisya kumanyilila chenene mwampaka Baibulo jitukamuchisye paumi wetu soni pakwiganya, kuti tuŵe ‘ŵakuŵajilwa chenene soni ŵakoseka mwakwanila kamula masengo galigose gambone.’—2 Tim. 3:16, 17.

¹⁶ Mbali jaŵili ja msonganowu jakolanjikwa, Kulipeleka mu Utumiki wa Mumgunda ŵajilinganyisye kuti jitujiganyeje kukusya luso lwakulalichila soni kwiganya patuli mu utumiki. Kupwatikapo pa mbali syakusakolaga ŵakulijiganya, pakusaŵagasoni mafidiyo ga yisyasyo ya kalalichile. Mbali ja msonganoji jikusatukamuchisya kulijiganya “yakwenela kuŵecheta” kuti ‘tugamanye maloŵe gakulimbikasya mtima ŵandu ŵangalii machili.’—Yes. 50:4.

¹⁷ Mbali jatatu jakuti Umi Wetu Wachiklistu, jikusasala mwampaka tukamulichisye masengo malamusi gakutulongola ga m’Baibulo pa umi wetu lisiku lililyose. (Sal. 199:105) Mu mbali jatatuji tukusatenda Lijiganyo lya Baibulo lya Mpingo. Mpela mwalikusatendechela Lijiganyo lya Sanja ja Mlonda, nombe nalyo Lijiganyo lya Baibulo lya Mpingo likusatendekwa pakukamulichisya masengo yiwusyo.

¹⁸ Mwesi uliwose patupochele kabuku ka Utumiki ni Umi Wetu wa Chiklistu—Pologalamu ja Misongano jwakulondesya masengo ga achakulungwa, kapena jwamkulungwa jwakusamkamuchisya, akusakalola chenene ni kulinganya ndandanda. Wiki jilijose, jwamkulungwa jwa mumpingo jwine jwakusajinganya chenene jwele likuga lya achakulungwa limjitichisye, chachiŵa cheyamani jwa msonganowu. Udindo wakwe uli kulolechesya kuti msonganowu ukutanda soni kumala mundaŵi jakwe soni kwayamichila ni kwajamuka ŵakwete ngani.

¹⁹ Patukukosechela chenene Msongano wa Utumiki ni Umi Wetu wa Chiklistu, kusimanikwapo, soni kujigala nawo mbali, tukusagamanyilila chenene Malemba, tukusapikanichisya malamusi gakutulongola ga m’Baibulo, tukusalimba mtima patukulalichila ngani syambone, soni tukusaŵa ŵalunda pakupanganya ŵakulijiganya. Yindu yakulimbikasya mwausimu yakusakambilana abale ni alongo yikusiyakamuchisyasoni ŵandu ŵanganabatisidwe ŵakusasimanikwa pa msonganowu. Kuti tukosechele chenene msonganowu, mpaka tukamulichisye masengo Watchtower Library, JW Library^®, LAIBULALE JA PA INTANET^™ (naga yipali m’chiŵecheto chawo), soni mabuku gagakusasimanikwa m’chipinda chakusunjila mabuku cha pa Nyumba ja Uchimwene. Chipinda chakusunjila mabuku cha pa Nyumba ja Uchimwene chikusakola mabuku gagapali ga Mboni sya Yehofa, mpela mabuku gakuwungunyila ngani ga Watch Tower Publichations Index, Kabuku Kakamuchisya Kuwungunya Ngani ka Mboni sya Yehofa, Mabaibulo gakulekanganalekangana, soni mabuku gane gakamuchisya pakuwungunya ngani. Jwalijose komboleka kamulichisya masengo mabukuga misongano mkanijitande kapena pajimasile.

MISONGANO JAKOSECHELA UTUMIKI WA MUMGUNDA

²⁰ Pandaŵi syakulekanganalekangana mkati kapena kumbesi kwa wiki, tumagulu twa utumiki tukusachingangana kwandaŵi jamnono kuti tutende msongano wakosechela utumiki wa mumgunda. Misongano jeleji jikusatendechela mnopemnope ku nyumba sya abale kapena malo galigose gambone. Mpaka akombolechesoni kutendela msonganowu mu Nyumba ja Uchimwene. Kola tumagulu twa utumiki mmalo gakulekanganalekangana mpaka kukamuchisye ŵakulalichila kuti asimanikweje mwachitema pamisongano jakosechela utumiki, soni ku dela jakuja kukulalichilajo. Yeleyi mpaka yikamuchisye kuti ŵakulalichila ŵagaŵe mwachitema ni kwinjila mu dela jachakalalichile. Yikusakamuchisyasoni kuti jwakulolela kagulu ŵaloleleje chenene ŵa m’kagulu kakwe. Atamose kuti yikusaŵa yambone kuti tumagulu twa utumiki tuchinganganeje m’malo gakulekanganalekangana, nambo pamagongo gane tumagulutu mpaka tuchinganganeje pamalo gamo. Mwachisyasyo, naga mkati mwa wiki ŵakulalichila ŵakusayika mu utumiki ali ŵamnono, mpaka yiŵe yakamuchisya kwamba kupwatikanya tumaguluto pampepe, kapena wosope mpaka achingangane m’Nyumba ja Uchimwene kapena malo galigose gambone. Yeleyi yichikamuchisya ŵakulalichila kupata mjawo jwakwenda najo mu utumiki. Mpaka yiŵe yakamuchisyasoni kuti mpingo wosope uchinganganeje pamo m’masiku gele ŵandu akusapumula kamula masengo [maholide]. Mpingo mpaka utendelesoni pampepe msongano wakosechela utumiki pambesi pa lijiganyo lya Sanja ja Mlonda.

²¹ Naga tumagulu tuchingangene pajikapajika, jwakulolela kagulu kalikose ni jwakusatendesya msongano wakosechela utumiki wa mumgunda. Ndaŵi sine, jwakulolela kagulu mpaka aŵende jwakamuchisya jwakwe kapena m’bale jwakuŵajilwa kuti atendesye msonganowu. Jwakutendesya msonganojo akusosekwa kosechela yindu yampaka yiŵe yakamuchisya mu utumiki. Pamasile, m’bale jumo jwa mu gulumo akusosekwa kupeleka lipopelo. Kaneko gulujo jikusajinjila mu utumiki. Misonganoji jikusosekwa jitendekweje kwa maminisi 5 kapena 7, nambo mpaka anandiye ndaŵiji naga panasoni mpingo wachiwukamulichisye masengo maloga. Misonganoji jikusosekwa kuŵa jakulimbikasya, soni jakamuchisya ŵakulalichila kumanyilila yachakatende pakulalichila. Ŵandu ŵachasambano kapena ŵane ŵakusosekwa chikamuchisyo komboleka kulalichila yimpepe ni ŵakulalichila ŵasyoŵelele kulalichila kuti ŵakamuchisye.

MWAJIKUSATENDECHELA MISONGANO M’MIPINGO JASAMBANO KAPENA JAMWANA

²² Ŵakulijiganya pakutupa, chiŵalanjilo cha mipingo chikusatupasoni. Jwakulolela dela akusatumisya chikalata chakuŵendela mpingo wasambano ku ofesi ja nyambi. Ndaŵi sine mpaka yiŵe yakamuchisya kuti tumagulu tusonganeje ni mpingo wapakuŵandika.

²³ Ndaŵi sine, m’mipingo jamwana mpaka mugambe kuŵa alongope. Naga yili myoyo, mlongo jwakusapeleka lipopelo kapena kutendesya misongano, akusosekwa kutendaga yeleyi ali awete kandu kumtwe kwakwe, mwakamulana ni yagakusasala Malemba. (1 Akoli. 11:3-16) Ndaŵi syejinji, jwalakwe akusosekwa kutama pasi kusogolo mwakulolegana ni ŵanduwo. Alongo ŵangaŵecheta ngani sya wosope, nambo akusagamba kujiŵalanga ni kukambilanaga ya munganijo kapena mpaka ajitende mwachilosyo. Ofesi ja nyambi jikusasagula mlongo jumo kuti alembeje soni kupochela yikalata, soni kuti alinganyeje misongano. Mkupita kwandaŵi, naga abale akuŵa achakulungwa ŵa mumpingo kapena ŵakutumichila ŵakamuchisya, jemanjaji ni ŵachachisamalilaga maudindoga.

MISONGANO JA DELA

²⁴ Pa chaka chilichose, pakusatendekwa misongano jiŵili ja lisiku limo mu dela jilijose. Ndaŵi jakusangalasyaji jikusapa ŵandu upile wakuti ‘awugule mitima’ jawo pakunguluka kwa Chiklistu. (2 Akoli. 6:11-13) Gulu ja Yehofa jikusalinganya ngani sya m’Malemba soni mbali sine syakulekanganalekangana sya msongano pakusaka kutukamuchisya pa yindu yatukusosechela. Pamsonganopo pakusaŵa ngani, yilosyo, kulosya yayatendekwe, kuŵecheta jika, soni kuwusya ŵandu. Ngani sya pandaŵi jakwesi sikusalimbikasya wosope ŵasimanikwe. Pamisonganoji, ŵachasambano akusakola upile wakubatisidwa pakulosya kulipeleka kwawo kwa Yehofa.

MISONGANO JA CHIGAWO

²⁵ Misongano jekulungwa jikusatendekwa kamo pa chaka chilichose. Ndaŵi syejinji mipingo ja m’madela gakulekanganalekangana jikusatenda msonganowu kwa masiku gatatu. Nyambi syamwana mpaka sikuwone kuŵa kwakamuchisya kuti mipingo josope jajili mu dela ja nyambisyo jitendele msongano wa chigawo pampepe. M’yilambo yine, misonganoji mpaka jitendekweje mwakulekanganalekangana mwakamulana ni mwayiŵelele yindu kapena pakuya yajisasile gulu. Ndaŵi sine, m’yilambo yine mukusatendekwa misongano ja m’yilambo, kapena misongano japajika. Pamisonganoji pakusayika Mboni syejinji kutyochela m’yilambo yine. Kwa yaka yejinji, ŵandu ŵajinji alijiganyisye ngani syambone sya Uchimwene kupitila m’misongano jekulungwa ja Mboni sya Yehofa jeleji.

²⁶ Ŵandu ŵakulipeleka ŵa Yehofa, akusajiwona misonganoji kuŵa ndaŵi jakusangalasya jakulambila Yehofa mwakamulana. Misonganoji jikamuchisye kuti lilanguka lya usyesyene liwonechele mnope. Pa misongano jine mabuku gasambano gakusakopoka kuti mundu aŵalanjeje pajika, tugakamulichisyeje masengo palijiganyo lya Baibulo lya mpingo, kapena mu utumiki. Pa misonganoji pakusaŵasoni ubatiso. Misongano jikusatukamuchisya kuti tukuleje mwausimu, kapena jikusalosya kuti mkamulano wa ŵandu ŵa Yehofa uli wapachilambo chosope, soni kuti ŵandu ŵakwe ali Aklistu ŵakulipeleka ŵakwete chimanyilo chakuti ali ŵakulijiganya ŵa Yesu Klistu.—Yoh. 13:35.

²⁷ Kusimanikwa pamisongano ja mpingo, ja dela, soni ja chigawo jakusatenda ŵandu ŵa Yehofa, kukusatulimbikasya kuti tutendeje yakusasaka Yehofa. Misonganoji jikusatuchenjela ku yindu yakusakala ya m’chilambochi, yampaka yijonanje chikulupi chetu cha Chiklistu. Pamisonganoji tukusapeleka uchimbichimbi, soni kumlumba Yehofa. (Sal. 35:18; Mis. 14:28) Tukusosekwa kumyamichila Yehofa ligongo lyakutupa misongano kuti jilimbikasyeje mwausimu ŵandu ŵakwe ŵakulipeleka m’masiku gambesiga.

CHAKULYA CHALIGULO CHA AMBUJE

²⁸ Mipingo ja Mboni sya Yehofa pachilambo chosope jikusatenda Chikumbuchilo cha chiwa cha Yesu Klistu, kapena kuti Chakulya cha Ligulo cha Ambuje kamo pachaka. (1 Akoli. 11:20, 23, 24) Msongano wawukusatendekwa kamo pachakawu, uli wakusosekwa mnope kwa ŵandu ŵa Yehofa. Tukusosekwa kutenda Chikumbuchilochi ligongo ŵatulamwile mwapajika kuti tutendeje.—Luk. 22:19.

²⁹ Lisiku lyatukusatenda Chikumbuchilo likusalandana ni lisiku liŵatendaga Pasaka kala mu ndaŵi ja m’Baibulo, lyalikusasimanikwa m’Malemba. (Eks. 12:2,  6; Mat. 26:17, 20, 26) Aisalaeli ŵatendaga Pasaka kamo pachaka pakumbuchila kutyoka kwawo ku Iguputo mu 1513 B.C.E. Ndaŵiji, Yehofa ŵasagwile lisiku lya 14 lya m’mwesi wandanda pa kalendala ja Aisalaeli kuti jemanjajo alye mwanache jwangondolo jwa Pasaka soni kuti atyoche ku ukapolo ku Iguputo. (Eks. 12:1-51) Lisikuli likusamanyikwa mwakuŵalanga masiku 13 kutandila palukopweche lwesi ku Yelusalemu. Lisikuli likusaŵa m’mwesi wa Malichi kapena mu Epulo. Chaka chilichose Chikumbuchilo chikusatendekwa palisiku lyandanda lyaluwoneche lwesi lwamtundu m’mwesi wa Malichi kapena Epulo.

³⁰ Lilemba lya Mateyu 26:26-28 likusasala yiŵasasile Yesu pakwamba ya mwatukusosechela kutendela Chikumbuchilo. Pa Chikumbuchilochi ngapakusatendekwa yindu yakusimonjesya nambo pakusaŵa chakulya chakuwanichisya chakusalya awopewo ŵasagulidwe kuti akalamulile yimpepe ni Yesu Klistu mu Uchimwene wakwe wakwinani. (Luk. 22:28-30) Aklistu ŵane wosope, soni ŵandu ŵane ŵachidwi akusiŵalimbikasya kuti asimanikwe pa Chakulya Chaligulo cha Ambuje kuti akalolele. Pasimanikwe pa Chikumbuchilochi, akusalosya kuyamichila yiŵatesile Yehofa Mlungu yakwakamuchisya ŵandu wosope kupitila mwa mwanagwe, Yesu Klistu. Pachikuŵandichila Chikumbuchilo, pakusaŵasoni ngani ja wosope japajika jajikusalimbikasya ŵandu kola chidwi chakusimanikwa pa Chikumbuchilocho soni lwakusachilila kulijiganya Baibulo.

³¹ Mboni sya Yehofa sikusajembecheya mwakusangalala kuchingangana pampepe pa misongano, kuti ‘sikumbuchilaneje jwine ni mjakwe ni kamuchisyana jwine ni mjakwe pakulosya kunonyelana ni kutenda yambone.’ (Ahe. 10:24) Kapolo jwakulupichika ni jwalunda ali jwakoseka kutulinganyila misonganoji mwakamulana ni yatukusosechela mwausimu. Ŵakutumichila ŵa Yehofa wosope, soni ŵandu ŵachidwi akwalimbikasya kuti akamulichisyeje masengo upile wosope pakusimanikwa pa misonganoji mwakutamilichika. Ŵakutumichila ŵa Mlungu akusaŵa ŵakamulana pakulosya kuyamichila kwawo ni mtima wosope yindu yapeleche Yehofa kupitila mu gulu jakwe. Chakusosekwa mnope chili chakuti, tukusamlumba soni kumchimbichisya Yehofa.—Sal. 111:1.