Kapanganye ni Kajendesye ka Mpingo

MU CHIKALATA chakwe chandanda cha kwa Akolinto, ndumetume Paulo ŵasasile usyesyene wakusosekwa wakwamba Mlungu. Jwalakwe ŵatite, ‘Mlungu ngakusosa chisokonasyo, nambo mtendele.’ Pakusala yakwamba misongano jampingo, ŵajonjechesye kuti, “Yindu yosope yitendekwe mwakulongosoka.”—1 Akoli. 14:33, 40.

² Kundanda kwa chikalata chichocho, ndumetume Paulo ŵajamwiche Aklistu ŵa ku Kolinto ligongo lya ungapikangana uwatendekwaga mumpingomo. Paulo ŵalimbikasisye Aklistuwo kuti ‘aŵecheteje mwakamulana,’ soni kuti ‘aŵeje ŵakamulana ni ŵa mtima umpepe ni nganisyo syakulandana.’ (1 Akoli. 1:10, 11) Kaneko, ŵajamwiche pangani syakulekanganalekangana syasyasokonasyaga mkamulano wa mpingowo. Pakamulichisya masengo chiwanichisyo cha chilu cha mundu, jwalakwe ŵalosisye kusosekwa kwa kuŵa ŵakamulana. Paulo ŵalimbikasisye wosope ŵa mumpingomo kuti asamaleje ya jwine ni mjakwe mwachinonyelo. (1 Akoli. 12:12-26) Naga pasikati pa Aklistu pana mkamulano mpela welewu, yikusakamuchisya kuti mpingowo ujendeje chenene.

³ Nambo, ana mpingo wa Chiklistuwo ŵawupanganyisye chamtuli? Ana ŵani ŵaŵawupanganyisye? Ana upanganye wakwe waliji wamtuli? Ana ŵani ŵaŵakwete maudindo? Kuti tumanyilile chenene kwanga kwa yiwusyoyi, kwende tulole yajikusasala Baibulo.—1 Akoli. 4:6.

WAPANGANYIDWE MWAKAMULANA NI ULAMUSI WA MLUNGU

⁴ Mpingo wa Chiklistu ŵawutamilikasisye pa lisiku lya Pentekosite mu 33 C.E. Ana mpaka tulijiganye chichi pakwamba ya mpingo wa mu yaka 100 yandandawu? Mpingowu ŵawupanganyisye, soni ŵawujendesyaga mwakamulana ni ulamusi (m’Chigiliki, kraʹtos) wa Mlungu (the·osʹ). Maloŵe gachigiliki gaŵiliga ŵagakolasile kuti “machili” soni “Mlungu” pa lilemba lya 1 Petulo 5:10, 11. Yayatendekwe ku Yelusalemu yaka chiŵandika 2,000 yipiteyo, yikutusimichisya kuti Mlungu ni juŵawutamilikasisye mpingo wa Aklistu ŵasagulwe. (Mase. 2:1-47) Mpingowo waliji nyumba jakwe, soni ŵandu ŵamwiŵasa mwakwe. (1 Akoli. 3:9; Aef. 2:19) Mpingo wa Chiklistu wa masiku agano ukusapanganyidwa, soni kuwujendesya mwakulandana ni muyaŵelaga mu yaka 100 yandanda.

⁵ Mpingo wandanda watandite ni ŵandu ŵakwana 120. Jemanjaji ŵaliji ŵandanda kupochela msimu weswela pakwanilisya lilemba lya Yoweli 2:28, 29. (Mase. 2:16-18) Nambo pa lisiku lilyolyo, ŵandu ŵane ŵakwana 3,000 ŵabatisidwe m’mesi ni kwinjila mumpingo wa Aklistu ŵasagulwe ni msimu. Jemanjaji ŵapochele maloŵe gakwamba ya Klistu soni ‘ndaŵi syosope ŵapikanilaga yiŵajiganyaga ŵandumetume ŵala.’ Kaneko, Yehofa “ŵaliji mkwajonjechesya ŵandu ŵane ŵakupochela chikulupusyo.”—Mase. 2:41, 42, 47.

⁶ Mpingo wa ku Yelusalemu wakusile mnope mwamti jwambopesi jwamkulungwa jwa Chiyuda ŵadandawile kuti ŵakulijiganyawo agumbesye yijiganyo yawo mu Yelusalemu. Ŵakulijiganya ŵasambano ŵa ku Yelusalemu ŵapwatikagapo ŵambopesi ŵa Chiyuda ŵaŵajinjile mumpingowo.—Mase. 5:27, 28; 6:7.

⁷ Yesu ŵatite, “Timchindendela umboni ku Yelusalemu, ku Yudeya ni ku Samaliya kosope, mpaka kumbesi kwa chilambo.” (Mase. 1:8) Ni yatendekwe kuti panyuma pa chiwa cha Sitefano, ŵandu ŵatandite kwalagasya mnope ŵakulijiganya ŵaŵatamaga ku Yelusalemu, ni ŵatilile ku Yudeya ni ku Samaliya kosope. Nambo kulikose kuŵapiteko, ŵapitilisye kulalichila ngani syambone soni kwajiganya ŵandu ŵajinji, kupwatikaposoni ŵane ŵa ku Samaliya. (Mase. 8:1-13) Kaneko, ngani syambone syalalichidwe kwa ŵandu ŵangawumbala, ŵanganaŵa Ayuda. (Mase. 10:1-48) Masengo gakulalichilaga gakamuchisye kuti apanganye ŵakulijiganya ŵajinji soni kuti mipingo jasambano jitamilikasidwe kusa kwa Yelusalemu.—Mase. 11:19-21; 14:21-23.

⁸ Ana ŵatesile yamtuli pakusaka kulolechesya kuti mpingo uliwose wasambano awujendesyeje mwakamulana ni ulamusi wa Mlungu? Kupitila mwa msimu weswela, ŵalinganyisye kuti paŵe ŵakuchinga ŵamwana ŵakuti asamalileje ngondolosyo. M’mipingo jele Paulo ni Banaba ŵajijendele pa ulendo wawo wandanda wa umishonale, ŵaŵisile ŵandu ŵane kuti aŵe achakulungwa ŵa mumpingo. (Mase. 14:23) Jwakulemba Baibulo Luka ŵalembile yayatendekwe pa msongano uŵatesile Paulo ni achakulungwa ŵa mumpingo wa ku Efeso. Paulo ŵasalile kuti, “Mlisamaleje mwachimsyene, nipo soni msamale mpingo wosope wele msimu weswela wampele kuti m’wuloleleje. Msamale mpingo wa Mlungu uŵawusumile ni miasi ja mwanagwawo.” (Mase. 20:17, 28) Jemanjajo ŵaŵajilwe kuŵa achakulungwa ŵa mumpingo ligongo lyakuti ŵakwanilisyaga yagakusasala malemba. (1 Tim. 3:1-7) Tito, jwamasengo mjakwe jwa Paulo ŵampele udindo wakuti aŵicheje achakulungwa m’mipingo ja ku Kilete.—Tito 1:5.

⁹ Mu yaka 100 yandanda mipingo jejinji pajapagwaga, ŵandumetume, soni achakulungwa ŵaŵaliji mu Yelusalemu ŵapitilisye kuŵa ŵakulolela mpingo wa Chiklistu wawawandaga m’yilambo yine. Ŵatumichilaga mpela likuga lyakulongolela lya mpingo wa Chiklistuwo.

¹⁰ Paŵawulembelaga mpingo wa ku Efeso, ndumetume Paulo ŵasasile kuti naga Aklistu akutenda yindu mwakamulana ni msimu wa Mlungu, soni akumpikanila Yesu Klistu jwali mtwe, nikuti mpingo wa Chiklistu mpaka upitilisye kuŵa wakamulana. Ndumetume Paulo ŵalimbikasisye Aklistuwo kusya msimu wakulinandiya, soni kuti apitilisye “kusunga umpepe wa msimu” pakutama mwamtendele ni Aklistu wosope mumpingo. (Aef. 4:1-6) Kaneko, jwalakwe ŵakamwile maloŵe ga pa Salimo 68:18 pakusala ya chikamuchisyo chatupele Yehofa cha achalume ŵausimu ŵakuŵajilwa kutumichila mumpingo mpela ŵandumetume, ŵakulochesya, ŵakulalichila, ŵakuchinga, soni ŵakwiganya. Pakuŵa achalumeŵa ŵaliji mpela mituka jakutyochela kwa Yehofa, ŵalimbikasisye mpingo wosope kuŵa wakomangala mwausimu. Yeleyi yaliji yakumsangalasya Mlungu.—Aef. 4:7-16.

MUŴATENDELAGA ŴANDUMETUME

¹¹ Masiku agano, mipingo ja Mboni sya Yehofa jikusajigalila muŵatendelaga ŵandumetume. Mipingo josope pampepe jikusapanganya mpingo wakamulana wa pachilambo chosope wele chilimbilimbi chakwe chili Aklistu ŵasagulwe ni msimu. (Sak. 8:23) Yesu Klistu ni jwakutendekasya kuti yeleyi yikomboleche. Pakwanilisya yaŵasasile, jwalakwe mwakulupichika aŵele yimpepe ni ŵakulijiganya ŵakwe ŵasagulwe ni msimu “masiku gosope mpaka mbesi ja chilambo chapasi chino.” Ŵandu ŵakusajinjila mumpingo wa Chiklistu wawukulilakulilape akusapochela ngani syambone sya Mlungu, kulipeleka kwa Yehofa ni mtima wosope, soni kubatisidwa ni kuŵa ŵakulijiganya ŵa Yesu. (Mat. 28:19, 20; Maliko 1:14; Mase. 2:41) Akusamanyilila kuti Yesu Klistu jwali mkuchinga jwambone, ali Mtwe wa gulu josope ja ngondolo, jajipanganyidwe ni Aklistu ŵasagulwe, soni ŵa “ngondolo sine.” (Yoh. 10:14, 16; Aef. 1:22, 23) “Likuga limo” lyeleli likusaŵa lyakamulana ligongo likusamanyilila kuti Yesu ali mtwe, soni likusapikanila ‘kapolo jwakulupichika ni jwalunda’ juŵasagulilwe ni Yesu kuŵa litala lyakuti alikamulichisyeje masengo. Kwende tulikulupilileje ni mtima wosope litala lyeleli masiku agano.—Mat. 24:45.

MASENGO GA YIWANJA YA M’GULU JA MLUNGU

¹² Yiwanja yine ŵayitamilikasisye pakusaka kupeleka chakulya chausimu pa ndaŵi jakwe, soni pakusaka kulolechesya kuti ngani syambone syakwamba ya Uchimwene silalichidwe mbesi mkanijiyiche. Yiwanjayi yili yakundidwa ni malamusi ga m’yilambo yakulekanganalekangana, soni yikusatenda yindu mwakamulana. Yiwanjayi yikusajawusya pasogolo masengo gakulalichila ngani syambone pachilambo chosope chapasi.

MWAJIKUSAJENDELA NYAMBI

¹³ Ali atamilikasisye ofesi ja nyambi, achakulungwa ŵatatu kapena kupunda pelepo akusasagulidwa kuti aloleleje masengo ga m’chilambocho, kapena ga m’yilambo yine yayikulongoleledwa ni nyambijo. Jemanjaji akusakolanjidwa kuti Komiti ja Nyambi. Jumo mwa jemanjaji akusatumichilaga mpela jwakulondesya masengo ga Komiti ja Nyambi.

¹⁴ Mipingo jajili pasi pa nyambi jilijose jikusapanganya madela. Madelega gakusalekangana ukulu wakwe pakujigalila mwakuŵelele kumaloko, chiŵecheto, soni chiŵalanjilo cha mipingo jajili kumaloko. Akusasagula jwakulolela dela kuti atumichileje m’mipingo jajili mu dela jilijose. Ofesi ja Nyambi jikusijapa ŵakulolela madela yakusosekwa kuya pakukamula masengo gawo.

¹⁵ Mipingo jikusakuya yajilinganyisye gulu pakusaka kwakamuchisya wosope. Jikusajitichisya kusagulidwa kwa achakulungwa ŵakusalolela masengo ga panyambi, m’madela, soni m’mipingo. Mipingoji jikusadalila kapolo jwakulupichika ni jwalunda kuti jipochele chakulya chausimu pa ndaŵi jakwe. Nombe najo kapolo jwakulupichika akusakuya mnope umtwe wa Klistu, malamusi gakutulongolela ga m’Baibulo, soni yawukumlongolela msimu weswela. Wosopewe patukukamula masengo mwakamulana, tukusasangalala ni yakuyichisya yakulandana ni yayatendechele Aklistu ŵa mu yaka 100 yandanda yayili pa Masengo 16:5 papakusati, “Myoyo, chikulupi cha mipingo chaliji mkulimbangana mnope, nipo lisiku ni lisiku ŵandu ŵajinjilaga ŵajinji m’mipingomo.”