Kupagwa kwa Ŵanace Kukusacenga Yindu mu Ulombela

Papagwile mwanace, ŵandu ŵalombane mpaka asangalaleje, soni pane kusoŵaga cakutenda. Sambano mpela acinangolo, mpaka asimonjeje kuti akumalila ndaŵi , soni macili gejinji pakusamalila mwanace jwawojo. Kugona mwangakwanila, soni kulaga ni nganisyo mpaka yisokonasye unasi wawo. Wawojo ni ŵamkwawo casosekwe kucenga yindu yine paumi wawo kuti asamalileje mwanacejo, soni kuti alimbisye ulombela wawo. Ana yajikusasala Baibulo mpaka yakamucisye catuli pandaŵi jeleyi?

1 AMANYILILEJE KUTI KOLA MWANACE KUKUSACENGA UMI WAWO

YAJIKUSASALA BAIBULO: ‘Cinonyelo cili cakuwusimana mtima, cakulisinga, cangalinonyela, soni cangatumbila.’ (1 Akolinto 13:4, 5) Sambano pakuŵa ali mama, caganicisyeje mnope ya mwanace jwawojo. Ŵamkwawo mpaka atande kuliwona kuti ngakwakosya, m’yoyo akaliŵalilaga kuti nombe nawo akusaka kuti ŵasamaleje. Mwakulitimalika, soni mwakuwusimana mtima, mpaka ŵakamucisye kuliwona kuti ali ŵakusosekwa, soni kuti mpaka akamucisye nawo pakusamala mwanacejo.

“Jemanja acalume ŵalombele, mtameje mwakwapikanila cenene aciŵamkwenu.” (1 Petulo 3:7) Amanyilileje kuti ŵamkwawo camalileje macili gawo pakumsalama mwanace. Ŵalakwewo akwete ukumu wasambano wakusamala mwanacejo, m’yoyo mpaka akoleje nganisyo, kupela kapena kuŵa ŵangasangalala. Ndaŵi sine, mpaka awoneceje kuti ngakusangalala ni wawojo, nambo alinje kuwusimana mtima, ligongo “mundu jwangatumbila citema ali jwambone kupunda mundu jwamacili.” (Miyambo 16:32) Ŵapikanicisyeje ŵamkwawowo, soni ŵapeje cikamucisyo cakusosecela.​—Miyambo 14:29.

YAMPAKA ATENDE:

• Mwanja baba: Ŵakamucisyeje ŵamkwawo kusamalila mwanace, atamose cilo. Anandiyeje ndaŵi jakusatendela yindu yine kuti amalileje ndaŵi jejinji ali pampepe ni ŵamkwawo, soni mwanace jwawo

• Mwanja mama: Naga ŵamkwawo akusaka kwakamucisya kusamalila mwanace, akakanaga. Naga ngakukombola kumsamalilako, akasiŵakalipila, nambo mwakuwusimana mtima ŵalosye mwampaka atendele

2 ALIMBISYE MKAMULANO WAWO

YAJIKUSASALA BAIBULO: “Caciŵa cilu cimo.” (Genesis 2:24) Atamose kuti mwiŵasamo mupagwile mwanace, akumbucilejepe kuti wawojo ni ŵamkwawo ali “cilu cimo.” Atendeje yiliyose yakomboleka kuti alimbisye mkamulano wawo.

Acakongwe, mwayamicileje aciŵamkwenu ligongo lya cikamucisyo cawo. Maloŵe gawo gakuyamicila mpaka ‘gaposye.’ (Miyambo 12:18) Acalume, mwasalileje aciŵamkwenu kuti mkusimwanonyela, soni kuti ali ŵakusosekwa mnope. Ŵayamicileje ŵamkwawo ligongo lya masengo gakusatenda pakulisamalila liŵasa lyawo.—Miyambo 31:10, 28.

“Mundu akagambaga kulisosela jika yambone, nambo mnopemnope ŵasoseleje acimjakwe yambone.” (1 Akolinto 10:24) Ndaŵi syosope ŵatendeleje yambone ŵamkwawo. Mpela liŵasa, akoleje ndaŵi jakuŵecetana, kuyamicilana, soni kupikanilana. Akaŵa ŵakulinonyela pakwamba ya kugonana. Aganicisyejesoni yakusaka ŵamkwawo. Baibulo jikusati: “Mkakananaga jwine ni mjakwe, nambo mli mjiticisyene kwa kandaŵi.” (1 Akolinto 7:3-5) M’yoyo, aŵecetaneje ngani jeleji mwakuwona mtima. Kuwusimana mtima, soni kupikanicisya kwawo kucilimbisya mkamulano wawo.

YAMPAKA ATENDE:

• Akoleje ndaŵi jakunguluka ŵaŵilipe, wawojo ni ŵamkwawo

• Atendeje yindu yamwanamwana yakwalosya ŵamkwawo kuti akusiŵanonyela, mpela kwatumicisya utenga kapena kwapa kanekakwe

3 KWIGANYA MWANACE JWAWO

YAJIKUSASALA BAIBULO: “Kutandila pamwaliji mwanace mwagamanyilile Malemba ga Mlungu, gele gampaka gakombole kumpa lunda lwakulupucila nalo.” (2 Timoteo 3:15) Akosecele yacacitendaga pakumjiganya mwanace pacacipagwapo. Mwanace akusakombola kulijiganya yindu atamose mkanapagwe. Atamose pali m’citumbo, mwanace mpaka apikane maloŵe gawo, soni mpaka amanyilile naga wawojo asangalele kapena atumbile. Am’ŵalanjileje atamose pali likandi. Atamose kuti jwalakwejo ngaŵa mkupikanicisya yakum’ŵalanjilayo, nambope mpaka yimkamucisye kuti pacacikulapo canonyeleje kuŵalanga.

Mwanacejo nganaŵa jwamnandi mnope mwati ngaŵa mkupikana pakuŵeceta ya Mlungu. Jwalakwejo apikaneje pamkupopela kwa Yehofa. (Deuteronomo 11:19) Atamose pakukunguluka najo, amsalileje ya yindu yiŵapanganyisye Mlungu. (Salimo 78:3, 4) Mwanacejo pakukula, cacimanyilila kuti wawojo akusamnonyela Yehofa ni nombe najo cacimnonyelaga.

YAMPAKA ATENDE:

• Apopeleje kuti Mlungu ŵape lunda lwakwiganyila mwanace jwawo

• Mwakuwilisyawilisya, amsalileje mwanacejo maloŵe, soni yindu yakusosekwa mnope kuti atande kulijiganya mwacitema