Mbali 3
Kumasya Yakusawusya
‘Anonyelaneje mnope, pakuti cinonyelo cikusasisa ulemwa wejinji.’—1 Petulo 4:8
Patandite kutama ni ŵamkwawo, pacipagwa yakusawusya yakulekanganalekangana. Yeleyi mpaka yitendece ligongo lyakulekangana kaganisye, mwakusapikanila, soni mwakusawuwonela umi. Yakusawusyayo kombolekasoni kutyocela kwa ŵandu ŵane, soni komboleka kuŵa yakutendekwa yangayijembeceya.
Gwala kutenda yakuŵajilwa kuli kwangasawusya, nambo Baibulo jikusatusalila yakusosekwa kutenda patusimene ni yakusawusya. (Matayo 5:23, 24) Kamulicisya masengo maloŵe ga m’Baibulo mpaka kwakamucisye kumalana ni yakusawusya yawo.
1 ATAGULILANEJE NAGA PANA CAKUSAWUSYA
YAJIKUSASALA BAIBULO: “Pana . . . ndaŵi jakuŵeceta.” (Mlaliki 3:1, 7) Akoleje ndaŵi jakuŵecetena pakwamba ya cakusawusya. Ŵasalileje mwakuwona mtima ŵamkwawowo mwakupikanila wawojo, soni nganisyo syawo panganijo. Ndaŵi syosope “aŵeceteje yakuwona” kwa ŵamkwawo. (Aefeso 4:25) Atamose kuti nganijo jatumbilikasisye, akaganisya yakwaputa ŵamkwawowo. Kwanga mwakusamala mpaka kutendekasye kuti nganijo jikakula mnope mpaka kwikana pakuputana.—Miyambo 15:4; 26:20.
Atamose kuti ngakupikanganana, akusosekwape kuŵeceta mwakulosya kuti akusanonyela, soni kwacimbicisya ŵamkwawowo. (Akolose 4:6) Alinjeje kumasya cakusawusyaco mwacitema, soni akaleka kuŵecetana.—Aefeso 4:26.
YAMPAKA ATENDE:
Akoleje ndaŵi jakuŵajilwa jakuŵecetana pakwamba ya cakusawusya
Naga jili ndaŵi jakuti wawojo apikanile yakuŵeceta ŵamkwawo, aŵambale kwakata maloŵe. Ndaŵi jawo jakuti aŵecete cijiyice
2 APIKANILEJE, SONI APIKANICISYEJE
YAJIKUSASALA BAIBULO: “Mnonyelaneje jwine ni mjakwe, ni kwacimbicisya ŵane kupunda mumkusatendela mwasyene.” (Aloma 12:10) Kupikanila kuli kwakusosekwa. Alinjeje kupikanicisya nganisyo, soni mwakupikanila ŵamkwawo ni mtima ‘wacanasa . . . soni wakulinondiya.’ (1 Petulo 3:8; Yakobo 1:19) Akagamba kuwanicisya kuti akupikanila. Naga kuli kwakomboleka, alece kaje yakutenda pandaŵijo ni kuŵika nganisyo syawo pa ŵamkwawo, kapena ŵaŵende kuti aŵecetane ndaŵi jine. Naga akusiŵawona ŵamkwawo kuŵa mjawo jusyesyene ngaŵaga mmagongo jwawo, ‘ngasiŵatumbililaga mwacitema.’—Mlaliki 7:9.
YAMPAKA ATENDE:
Akusosekwa kuwugula nganisyo kuti apikanile, atamose yakupikanilayo yiŵeje yakuti ngayikwasangalasya
Apikanileje yakusaka ŵamkwawo. Pakuŵeceta, aloleje mwajikuwonecela ngope ja ŵamkwawowo, soni mwakuŵecetela
3 ATENDEJE YAKAMULENE
YAJIKUSASALA BAIBULO: “Kamula masengo mwamtawu kukusakamucisya, nambo kwamba kuŵeceta maloŵepe ngakukusakamucisya.” (Miyambo 14:23) Kwamba kwitika kuti amasye nganijo ngaŵa kwakwanila. Akusosekwa kutenda yakamulene kuti jwalijose atende. Kuti yeleyi yikombolece pakusosekwa mtawu. (Miyambo 10:4) Naga akutenda yindu mwakamulana, ‘cacipata mbote jambone’ ligongo lya mtawu wawo.—Mlaliki 4:9.
YAMPAKA ATENDE:
Aganicisye yampaka jwalijose atende pakumasya yakusawusya
Ndaŵi ni katema, aloleje naga akutenda yaŵakamulene