Ligongo Chichi Mlungu Akusakunda Yakusakala Soni Yipwetesi?

1. Ana yakusakala yatandite chamtuli?

Yakusakala yatandite pachilambo chapasi ligongo lya unami wandanda waŵasasile Satana. Pandanda pene Satana ŵaliji lilayika lya mlama. Nambo jwalakwe “nganaŵa kose ni usyesyene.” (Yohane 8:44) Jwalakwe ŵatandite kusaka kuti ŵandu amlambileje m’malo mwa Mlungu. Satana ŵamlambwisye jwamkongwe jwandanda, Hawa, soni ŵamlimbikasisye kuti ampikanile jwalakwe ngaŵaga Mlungu. Adamu nganampikanila Mlungu mpela Hawa. Yaŵasagwile kutenda Adamu yatendekasisye kuti paŵe yipwetesi ni chiwa.​—Aŵalanje Genesesi 3:1-6, 19.

Satana paŵamtendekasyaga Hawa kuti akapikanila Mlungu, jwalakwe ŵatandisyaga kwimuchila ulamusi wa Mlungu. Ŵandu ŵajinji akamulene ni Satana pakumkana Mlungu mpela jwakulamulila jwawo. Myoyo, Satana ni jwali ‘jwakulamulila jwa chilambo chapasi.’​—Aŵalanje Yohane 14:30; 1 Yohane 5:19.

2. Ana Mlungu nganayipanganya chenene yindu?

Masengo gosope ga Mlungu gali gamlama. Mlungu ŵapanganyisye ŵandu ni malayika kuti gakombolecheje kumpikanila chenene. (Detulonomo 32:4, 5) Mlungu ŵatupanganyisye ni ufulu wakusagula kutenda yambone kapeni yakusakala. Ufuluwu ukusatupa upile wakulosya chinonyelo chetu kwa Mlungu.​—Aŵalanje Yakobo 1:13-15; 1 Yohane 5:3.

3. Ligongo chichi Mlungu ayikundile yipwetesi mpaka lelo jino?

Kwa kandaŵi, Yehofa akundile kuti ulamusi wakwe ujimuchilidwe. Ana ligongo chichi? Pakusaka kulosya kuti kulingalinga kulikose kwakulilamulila jika kwampaka ŵandu akutende ngaŵa mkwenda chenene naga pali pangali Mlungu. (Jwakulalichila 7:29; 8:9) Umboni ukuwonechela pelanga, malingana ni mbili ja ŵandu ja yaka 6,000. Ulamusi wa ŵandu ulepele kumasya ngondo, ungapikanila malamusi, ungali chilungamo, kapena ulwele.​—Aŵalanje Yelemiya 10:23; Aloma 9:17.

Mwakulekangana ni ulamusi wa ŵandu, ulamusi wa Mlungu ukusiwakamuchisya ŵandu ŵakusawukunda. (Yesaya 48:17, 18) Pachangakaŵapa, Yehofa chachimasya maboma gosope ga ŵandu. Ŵandupe ŵasagwile kulamuligwa ni Mlungu ni ŵachachitama pachilambo chapasi.​—Yesaya 11:9.​—Aŵalanje Daniele 2:44.

Alolele fidiyo jakuti Ana Ligongo Chichi Mlungu Akuyikunda Yipwetesi?

4. Ana kuwusimana mtima kwa Mlungu kukusatukamuchisya chamtuli?

Satana akusasala kuti pangali jwampaka atumichile Yehofa pamagongo gakuŵajilwa. Ana mpaka akombole kusisya unami welewu? Elo mpaka akombole. Kuwusimana mtima kwa Mlungu kukusatukamuchisya kuti tulosye naga tukusanonyela kulamulidwa ni Mlungu kapena ŵandu. Yitendo yetu pa umi mpaka yilosye yatusagwile panganiji.​—Aŵalanje Yobu 1:8-12; Misyungu 27:11.

5. Ana mpaka tusagule chamtuli Mlungu kuŵa Jwakulamulila jwetu?

Komboleka kusagula Mlungu kuŵa jwakulamulila jwetu mwa kusosasosa, soni kutendaga yayikusosekwa pakulambila kusyesyene mwakamulana ni yajikusasala Baibulo. (Yohane 4:23) Komboleka kumkana Satana kuŵa jwakulamulila jwetu mwa kuŵambala kutenda nawo yandale, soni ngondo, mpela muŵatendele Yesu.​—Aŵalanje Yohane 17:14.

Satana akusakamulichisya masengo machili gakwe mwakulimbikasya ndamo jakusakala, soni yitendo yakogoya. Patukuŵambala yindu yeleyi, achimjetu, soni achanasi ŵetu chachitulagasya kapena kutusisya. (1 Petulo 4:3,  4) Myoyo tukusosekwa kusagula yakutenda. Ana tuchikamulana ni ŵandu ŵakusamnonyela Mlungu? Ana tuchipikanila malamusi gakwe gachinonyelo? Naga, tukutenda yeleyo tuchilosya kuti Satana ŵalambusyaga paŵasalaga kuti pangali jwampaka atende yakusasala Mlungu pakusimana ni yipwetesi.​—Aŵalanje 1 Akolinto 6:9, 10; 15:33.

Chinonyelo cha Mlungu kwa ŵandu chikusalosya kuti yakusakala, soni yipwetesi yichimala. Ŵandu ŵakusalosya kuti akusakulupilila yeleyi chachisangalala ni umi pachilambo chapasi kwangamala.​—Aŵalanje Yohane 3:16.