Ana Kusongana ni Aklistu Acimjetu Kukusatukamucisya Catuli?

Ndaŵi syosope tukusajawula kumisongano jetu ja Ciklistu atamose kuti cinga tukusosekwa kwenda mu citekete cakuwutala kapena kusa nganikuca cenene. Ligongo cici m’weji ŵa Mboni sya Yehofa tukusalingalinga kusongana ni ŵakulupilila acimjetu, atamose kuti tukusasimana ni yakusawusya pa umi, soni tukusapela ligongo lyakamula masengo?

Kukusatukamucisya kola umi wambone. Pakuŵeceta ya ŵandu ŵatukusasongana nawo mumpingo, Paulo ŵalembile kuti: “Tukumbucilaneje jwine ni jwine.” (Ahebeli 10:24) Maloŵega gakugopolela “kuganicisyana mnope,” kwakuli kusaka kumanyigana. M’yoyo maloŵe ga ndumetumeju gakutulimbikasya kuti tuganicisyeje ya ŵane. Naga tukugamanyilila cenene maŵasa gane ga Ciklistu, tukusayimanya kuti maŵasa gane galimbene cenene ni yakusawusya yakulandana ni yatukwete, soni mpaka atukamucisye kuti tumalane nayo cenene.

Kukusatukamucisya kola maunasi gakulimba. Pamisongano jetu, tukusasongana ni likuga lya acimjetu ŵasyesyene, ngaŵa ni ŵandu ŵakwamba kumanyiganape. Ndaŵi sine tukusasongana kuti tutende yakusangalasya yambone. Ana kusongana kweleku kukwete umbone watuli? Kukusatukamucisya kuti twawoneje acimjetu kuŵa ŵakusosekwa mnope, soni yeleyi yikusatutendekasya kuti tunonyelaneje mnope. M’yoyo, naga acimjetu akusimana ni yakusawusya, tukusakamucisya ligongo tukusaŵa tuli mkunonyelana mnope kala. (Miyambo 17:17) Patukusyoŵekana ni Aklistu wosope mumpingo mwetu, tukusalosya kuti ‘tukusasamalana mwakulandana.’—1 Akolinto 12:25, 26.

Tukwalimbikasya wawojo kuti asagule acimjawo ŵakutenda lisosa lya Mlungu. Komboleka kwapata acimjawo mpela ŵeleŵa pasikati pa Mboni sya Yehofa. Akakunda kuti cilicose calepelekasye kusyoŵekana ni m’weji.

• Ligongo cici kusongana pampepe kukusatukamucisya mnope?

• Ana wawojo mpaka asace kumanyigana ni m’weji pamisongano jetu ja mpingo cakaci?