Ana Luli Lunda Kujikulupilila Baibulo?

Paŵalasile kabuku akano, ana nganasimonga kuyiwona kuti yajikusasala Baibulo yili yakamulana ni sayansi? Ŵandu ŵajinji akuyiwonatu m’yoyo. Jemanjaji akusasimonga pamanyilile kuti Baibulo jangasala yindu yine yele dini syejinji sikusajiganya. Mwambone, ŵandu ŵane akusasala kuti Baibulo jikusajiganya kuti Mlungu ŵapanganyisye cilamboci soni yaumi yosope kwa masiku 6 ga maawala 24. Kusala yisyene, m’Baibulo mwangali malo galigose gakulosya kuti Baibulo jikusasisyana ni sayansi pakwamba ya yaka yacikwete cilamboci.a

Cindu cine cili cakuti, yajikusasala Baibulo mwakata pakwamba yaŵatite Mlungu pakuwupanganya umi pacilamboci, mpaka yakamucisye ŵa sayansi kuwungunya maumboni gakwe. Baibulo jikusasala kuti Mlungu ni juŵapanganyisye yindu yosope yaumi soni ŵayipanganyisye “mwakamulana ni mitundu jakwe.” (Genesis 1:11, 21, 24) Ciwundoci mpaka ciwonece mpela kuti cikusisyana ni yindu yine yakusasala ŵasayansi, nambo cangasisyana ni yisyesyene yakwe yapatile pakuwungunya. Mbili ja sayansi jikusalosya kuti kutandila kala yakusasala ŵasayansi yangatamilicika, nambo yisyesyene yakwe yapatile pakuwungunya yangacenga.

Pana ŵandu ŵajinji ŵakusatenda mbwaji kuwungunya yayili m’Baibulo ligongo lyakutenguka ni dini. Jemanjaji akusayiwona kuti mu dini mukusatendekwa yacinyengo yejinji soni jikusatandikasya ngondo. Ana yili yakuŵajilwa kujijimba Baibulo magambo ligongo lya yitendo ya ŵandu ŵane ŵakusasalaga kuti akusatendaga ya m’Baibulo? Ŵandu ŵajinji ŵacanasa soni ŵasayansi adandawile kuti ŵandu akusakamulicisya masengo cijiganyo cakuti yaumi yacenjile kutyocela ku yindu yine pakusaka kwanilisya yakulinga yawo ya lusagu. Ana mpaka yiŵe cenene kusala kuti cijiganyo cakuti yaumi yacenjile kutyocela ku yindu yine cili caumi ligongo lyakuti ŵandu ŵane akucikamulicisya masengo mwakulemweceka? Kusala yisyene, mpaka yiŵe cenene kuwungunya kaje ya cijiganyoci ni kulandanya ni maumboni gagapali.

Tukwalimbikasya kuti atende yakulandanayi ni Baibulo. Casimonje kumanyilila kuti yajikusajiganya Baibulo yili yakulekangana ni yagakusajiganya makuga gejinji ga dini. M’malo mwakulimbikasya ngondo soni ngalwe, Baibulo jikusasala kuti ŵakutumicila ŵa Mlungu ngakusajinjilila mu ya ngondo soni uŵengani wawukusatandikasya yaciwawa. (Yesaya 2:2-4; Matayo 5:43, 44; 26:52) Mmalo mwakwamba kakamila kulupilila yindu yangali maumboni, Baibulo jikusajiganya kuti tukusosekwa kulingalinga kuwungunya maumboni gakwanila, ligongo ni gampaka gatukamucisye kola cikulupi cakulimba. Soni ni gampaka gatukamucisye kuti tumtumicileje Mlungu ni mtima wosope. (Aloma 12:1; Ahebeli 11:1) Mmalo mwakwatendekasya ŵandu kuti akakola lung’wanu, Baibulo jikusatulimbikasya kuti tukaleka kuwungunya yiwusyo yakusosekwa mnope yatuŵele tuli mkuliwusya kwa ndaŵi jeleji.

Mwambone, ana pakwete paliwusisye kuti, ‘Naga kwana Mlungu, nambi ligongo cici jwalakwe akundile yakusakala kutendekwa?’ Baibulo jikusajanga ciwusyo celeci soni yiwusyo yine m’litala lyakuti m’weji mpaka tujikutile.b Tukwalimbikasya kuti ajendelecele kuwungunya usyesyene. M’Baibulo mwana kwanga kwakutesya lung’wanu, kwakusangalasya soni kwakupikanika cenene kwakutyocela pa maumboni gasyesyene. Soni kwangaku nganaŵa akupatile mwangosi.