Kumasya Ungapikangana Pangani sya Malonda

Pa lilemba lya 1 Akolinto 6:1-8, ndumetume Paulo ŵasasile ya magambo ga pasikati pa Aklistu. Jwalakwe ŵasasile kuti yili yakutesya canasa kuti Aklistu ŵane ŵa ku Kolinto ‘ŵajawulaga ku nganya sya ŵakulamula ŵele nganaŵa ŵakulupilila.’ (1 Akolinto 6:1) Paulo ŵasasile magongo gakupikanika cenene gele Aklistu nganasosecelaga kukatilana yisamani ku nganya, nambo mmalo mwakwe ŵasosekwaga kumasya ungapikanganawo mwakukuya yawukusajendela mpingo. Kwende tulole gane mwa magongo gagamtendekasisye Paulo kulemba yeleyi, kaneko tulole yakutendekwa yine yampaka tukamulicisyesoni masengo yaŵalembile Pauloyi.

Naga ngatukupikangana ni jwakulupilila mjetu pangani ja malonda, candanda tukusosekwa kutenda yindu mwakamula ni nganisyo sya Yehofa ngaŵaga syetu. (Miyambo 14:12) Yesu ŵalosisye kuti kuli kwambone kumasya ungapikangana mwacitema yindu mkaniyiyice pakusawusya. (Matayo 5:23-26) Nambo yakutesya canasa yili yakuti Aklistu ŵane akusayikana pakukangana, soni mpaka kwawusyana ku nganya. Paulo ŵasasile kuti: “Kwimbana magambo kwa jemanja acimsyene kukulosya kuti mlepele mwacimsyene.” Ligongo cici? Ligongo lyekulungwa lili lyakuti kutenda yeleyi kukusasakasya mbili jambone ja mpingo, soni Mlungu jwatukusamlambila. M’yoyo, tukusosekwa kuganicisya ya ciwusyo ca Paulo cakuti: “Ana ngaŵa mpaka yiŵe yambone kuti ŵandu amlemwecesye?”​—1 Akolinto 6:7.

Paulo ŵalosisyesoni kuti Yehofa awupele mpingo litala lyambone lyakumacisya ungapikangana. Acakulungwa ŵa mumpingo ali acalume ŵakwete lunda ligongo akusamanyilila cenene usyesyene wa m’Malemba. Paulo ŵasasile kuti jemanjaji “mpaka ajilanyeje magambo sikati ja Aklistu” pangani jakwayana ni “yindu ya umi awuno.” (1 Akolinto 6:3-5) Yesu ŵalosisye kuti naga Mklistu amlemwecesye mnope mjakwe mpela kumsogoda, soni kumtendela yindu yangali cilungamo, mpaka amasye nganiji pakamulicisya masengo matala gatatu gakuyicisyaga: litala lyandanda, alinjelinje kumasya nganijo kwa ŵaŵilipe; lyaŵili, naga litala lyandandalyo nganilikamucisya, aŵilanje mboni jimo kapena siŵili; soni lyatatu, naga lyaŵili nganilikamusisyasoni, ajijigalile nganijo kwa acakulungwa ŵa mumpingo.​—Matayo 18:15-17.

Acakulungwa ŵa mumpingo nganaŵa ŵakwimila ŵandu pamagambo kapena ŵamalonda soni ukumu wawo nganiwuŵa kwakamucisya ŵandu pangani sya malonda. Jemanjaji ngakusatamilikasya malamusi gakumacisya ungapikangana wa Aklistu pangani sya malonda. M’malo mwakwe akusalingalinga kwakamucisya Aklistuwo kuti akamulicisyeje masengo malemba kuti amasye ungapikanganawo mwamtendele. Pangani syakusawusya mnope, acakulungwaŵa akusakomboleka kupata cikamucisyo kwa jwakulolela mkuli kapena ku ofesi ja nyambi ja Mboni sya Yehofa. Nambope, pana yakutendekwa yine yanganayisala Paulo m’maloŵe gakwe. Ana yine mwa yakutendekwayi ni yapi?

Muyakutendekwa yine, kwawula ku nganya mpaka kuŵe litala lyakuŵajilwa lyakumacisya cenene yakusawusya mwamtendele, soni mwakamulana ni malamusi. Mwambone, kwawula ku nganya mpaka kuŵe litala lyambone lyakumacisya ulombela, lyakumjiticisya jumo mwa ŵalekangene ulombela kuti atameje ni ŵanace soni kuti ŵasamalileje, lyakulola naga jumo mwa ŵalekangene ulombela akusosekwa kumpa mjakwe mbiya, lyakupocelela mbiya kutyocela ku yiwanja yayikusalipila mbiya syakamucisya naga patendekwe ngosi, lyakupocelela mbiya syanganiŵapaga pamasengo gakamwileje, soni lyakusimicisya kuti yalembile pa cikalata cakusala ya ŵakusosekwa kupocela cipanje ca mundu jwawile yili yisyesyene. Panasoni yakutendekwa yine yele Mklistu mpaka ayiwone kuŵa yakuŵajilwa kuja kukata cisamani kuti alicenjele ku magambo.a

Naga mundu akwawula kukata cisamani pa ngani mpela syelesi nambo mwangasaka ya ukangani, ngaŵa kuti akutenda yindu yakusisyana ni yaŵasasile Paulo.b Nambope, cindu candanda cele Mklistu akusosekwa kulolecesya cili kuswejesya lina lya Yehofa, soni kulimbikasya mtendele ni mkamulano wa mumpingo. Ŵakumkuya Klistu akusamanyikwa ni cinonyelo, soni “cinonyelo . . . cangalinonyela.”​—1 Akolinto 13:4,  5; Yohane 13:34, 35.