Yajikusasala Baibulo Pangani ja Kumasya Ulombela, Soni Kulekangana Kaje Ulombela

Yehofa akusasaka kuti ŵalombane aŵeje ŵakulupicika pa cilanga caŵasasile pa lisiku lya ulombela wawo. Paŵalombesyaga Adamu ni Hawa, Yehofa ŵaŵecete kuti: ‘Jwamlume . . . akusalumbikana ni ŵamkwakwe ni kuŵa cilu cimo.’ Kaneko, Yesu Klistu ŵaŵecetesoni maloŵega ni ŵajonjecesye kuti: “Sambano yindu yele Mlungu yayilumbikenye pampepe, mundu jwine akayilekanganya.” (Genesis 2:24; Matayo 19:3-6) M’yoyo, Yehofa ni Yesu akusawuwona ulombela kuŵa mkamulano wa umi wosope wawukusamalaga naga jwine mwa jemanjajo awile. (1 Akolinto 7:39) Ulombela uli cindu capajika, m’yoyo kuwumasya jili ngani jekulungwa. Yehofa akusaŵengana ni kumasya ulombela pali pangali magongo ga m’Malemba.​—Malaki 2:15, 16.

Ana ulombela mpaka umale pa magongo gapi ga m’Malemba? Yehofa akusaŵengana ni cikululu soni msese. (Genesis 39:9; 2 Samueli 11:26, 27; Salimo 51:4) Msese ukusamsakalisya mnope jwalakwe mwati akusakunda ŵalombane kumasya ulombela naga jwine atesile ya msese. (Kuti amanyilile yawukusagopolela msese, alole Mtwe 9, ndime 7 m’bukuji.) Yehofa akusamkunda jwanganalemwajo kwendelecela kuŵa paulombela ni jwatesile cakulemwajo kapena kumasya ulombelawo. (Matayo 19:9) M’yoyo, naga jwanganalemwajo akumasya ulombelawo, ngaŵa kuti akulemwa pameso pa Yehofa. Nambosoni, mpingo waciklistu wangalimbikasya jwalijose kuti amasye ulombela. Nambope, mpaka paŵe magongo gane gampaka gamtendekasye jwanganalemwajo kwendelecela kuŵa pa ulombela ni mjakwe jwatesile cakulemwajo, mnopemnope naga jwalemwisyejo apitikwice mtima yisyesyene. Atamose yili m’yiyi, ŵandu ŵakwete magongo ga m’Malemba gakumacisya ulombela, akusosekwa kusagula jika kumasya ulombelawo, soni kwiticisya yakuyicisya yampaka yipagwe ligongo lya yasagwileyo.​—Agalatia 6:5.

Muyakutendekwa yakusawusya mnope, Aklistu ŵane asagwile kulekangana kaje ulombela kapena kumasya kwene ulombela atamose kuti mjawojo nganatenda cikululu. Muyakutendekwa yeleyi Baibulo jikusasala kuti jwakumleka mjakwejo “atame jwangalombedwasoni kapena ajilane ni ŵamkwakwewo.” (1 Akolinto 7:11) Mklistu jweleju ali jwangagopoka kulombanasoni ni mundu jwine. (Matayo 5:32) Kwende tulole yakutendekwa yekulungwa yayikusatendekasya ŵane kulekangana kaje ulombela.

Ngasamalila liŵasa mwamele. Liŵasa komboleka kulagaga mnope, nikusoŵaga yindu yakusosekwa mnope pa umi ligongo lyakuti jwamlume asagwile mwamele kuti akalisamalilaga liŵasalyo, atamose kuti jwalakwe mpaka akombole kulisamalila. Baibulo jikusati: “Naga mundu jwine ngakwakamucisya acalongo acimjakwe, mnopemnope ŵamwiŵasa mwakwe, jwalakwejo ajasile cikulupi, soni kusakala kwakwe kuli kwakupunda mundu jwangakulupilila.” (1 Timoteo 5:8) Naga jwamlumejo akukana kucenga ndamoji, jwamkongwejo mpaka asace kusamalila umi wakwe, soni wa ŵanace ŵakwe mwakulekangana kaje ulombela ni jwamlumejo. Nambope, acakulungwa ŵa mumpingo akusosekwa kusamala kuti amanyilile naga yakusala jwamkongwejo kuti jwamlume ngakusamalila liŵasa yili yisyene. Mundu mpaka amtyosye mumpingo naga akukana kusamalila liŵasa lyakwe.

Kutenda ngalwe. Jwine mwa ŵalombane mpaka amtendeleje ngalwe mjakwe mwati umi wa mjakwejo ni kuŵa pangosi. Naga jwangalwejo ali Mklistu, acakulungwa ŵa mumpingo akusosekwa kuwungunya kuti amanyilile naga yili yisyene. Mundu komboleka kumtyosya mumpingo naga akusapya mtima, soni naga ali jwangalwe.​—Agalatia 5:19-21.

Kuŵika pangosi umi wausimu wa jwine. Jwine mwa ŵalombane mpaka amlekasyeje mjakwe kulambila kusyesyene kapena kumtendekasya mjakwe kuti akase malamusi ga Mlungu. Muyakutendekwa yeleyi, jwakulagasidwajo komboleka kusagula kuti ‘ampikanile Mlungu kupunda kumpikanila mundu,’ mwakulekangana kaje ulombela ni mjakwejo.​—Masengo 5:29.

Muyakutendekwa yatusasileyi, pangali mundu jwakusosekwa kumkanganicisya jwakulagasidwajo kuti alekangane kaje ulombela ni ŵamkwakwe, kapena kuti ajendelecele kutama nawo pampepe. Atamose kuti Aklistu ŵakomangale mwausimu, soni acakulungwa ŵa mumpingo mpaka ŵape cikamucisyo ca m’Malemba, jemanjaji ngaŵa mkumanyilila yosope yayikutendekwa pasikati pa ŵalombanewo. Yehofape ni jwakumanyilila yayikutendekwayo. Jwamkongwe kapena jwamlume jwaciklistu mpaka aŵe ali mkunyosya Mlungu, soni kunyosya ulombela naga akukandapasya yakusawusya ya mwiŵasa mwawo pakwamba kusaka kupatilapo upile wakuti alekangane kaje ni mjakwe jwa mwiŵasa. Atamose tulinje kusisa catuli, Yehofa akusamanyilila naga tulinganyisye mwamele yakumleka kaje mjetu. ‘Pangali cakusisika pameso pa Mlungu, soni akusaciwona cilicose pacikutendekwa. M’yoyo tucijanga yosope yitutesile.’ (Ahebeli 4:13) Nambo naga yakusawusya yikwendelecela mnope, pangali mundu jwakusosekwa kumjamuka Mklistu jwele pambesi pa yosope asagwile kulekangana kaje ulombela ni ŵamkwakwe. Soni tukumbucile kuti, “wosope ŵene tucijima pameso pa Mlungu kuti atulamule.”​—Aloma 14:10-12.