Kucimbicisya Mbendela, Kusagula Ŵakulamulila ŵa Ndale, Soni Kukamula Masengo Gane Mmalo mwa Kwinjila Usilikali

Kucimbicisya Mbendela. Ŵa Mboni sya Yehofa akusakulupilila kuti kutindiŵalila mbendela pampepe ni kwimba nyimbo jakulumba cilambo (nyimbo ja fuko) kukusalosya kuti cikulupusyo cikusatyocela ku cilambo kapena kwa ŵakulamulila ŵa m’cilamboco, ngaŵaga kwa Mlungu. (Yesaya 43:11; 1 Akolinto 10:14; 1 Yohane 5:21) Cisyasyo ca jwakulamulila jwele ŵandu ŵamkulupililaga kuti akwete cikulupusyo cili ca Mwenye Nebukadinesala jwa ku Babiloni. Pakusaka kulosya macili, soni mtawu wakwe pa dini, jwalakwe ŵapanganyisye ciwanicisyo cekulungwa ni ŵakanganicisyaga ŵandu kuti acitindiŵalileje ŵane ali mkwimba nyimbo jakulumba cilambo cawo. Nambo anyamata ŵatatu ŵa Cihebeli: Sadilaki, Mesaki ni Abedinego ŵakanile kutindiŵalila ciwanicisyo atamose paŵasalile kuti ciŵawulaje.​—Danieli, caputala 3.

Pakwamba ya moŵa agano, jwakulemba mbili jwine, lina lyakwe Carlton Hayes ŵalembile kuti, “Mbendela jili cimanyilo cakulosya kuti ŵandu akusanonyela, soni kuti ali ŵakulupicika ku cilambo cawo. Mundu pakupita ni mbendela pasikati pa ŵandu, acalume akusawula yisoti. Soni pakucimbicisya mbendela, ŵandu ŵane akusalemba ndakatulo, nambosoni ŵanace akusajimba nyimbo.” Jwalakwe ŵajonjecesye kuti, ŵandu ŵakusanonyela mnope cilambo cawo, akusakola “masiku gapajika” gakusakumbucila ŵandu ŵaswela mtima ni malo gawo gakulambilila, soni ŵandu ŵaŵakamucisye kuti ŵandu agopoce ku ulamusi wa ngalwe m’cilamboco. Pa cakutendekwa cine ca boma ku Brazil, jwamkulungwa jwa asilikali jwaŵecete kuti: “Ŵandu akusacimbicisya, soni kulambila mbendela . . . mpela mwakusalambilila cilambo cawo.” Soni buku jine jasasile kuti, “Mbendela jili japajika mpela mwawuŵelele msalaba.”​—The Encyclopedia Americana.

Pacangakaŵapa, buku jatujisasile jila jasasile kuti nyimbo jakulumba cilambo “jikusakola maloŵe gakulosya kunonyela mnope cilambo, soni gakuŵenda cikamucisyo kwa Mlungu kuti ŵalongoleleje ni kwacenjela ŵanduwo kapena ŵakulamulila ŵawo. M’yoyo, ŵa Mboni sya Yehofa akusaŵa kuti akuganisya mwakuŵajilwa pakuyiwona yakutendekwa yakucinonyela cilambo mpela kucimbicisya mbendela, soni kwimba nyimbo jakulumba cilambo cawo, kuŵa kulambila. Pakusala ya ŵanace ŵa sukulu ŵa Mboni sya Yehofa ku United States ŵakusakana kucimbicisya mbendela, soni kulumbila kuti caciŵa ŵakulupicika ku cilambo cawo, buku jine jasasile kuti: “Ligongo lya winji wa magambo gakwayana ni mteto wakuwandawu, Luŵala Lwekulungwa lwa Magambo, lwasimicisye kuti mtetowu uli wakwayana ni dini.”

Atamose kuti ŵa Mboni sya Yehofa ŵangatenda nawo yindu yangakamulana ni malembayi, jemanjaji akusacimbicisya yakusasagula ŵane pa nganiji. Jemanjaji akusajiwonasoni mbendela mpela cimanyilo ca cilambo, soni akusiŵawona ŵakulamulila ŵaŵapatile ukumu wawo mwakuŵajilwa kuŵa “acakulungwa ŵakulamulila,” ŵakukamula masengo mpela “ŵakutumicila ŵa Mlungu.” (Aloma 13:1-4) M’yoyo, ŵa Mboni sya Yehofa akusapopelela “ayimwene ni wosope ŵakwete ulamusi.” Lisosa lyetu lili lyakuti “tutameje mu umi wakutulala ni wa mtendele, kulosya kulipeleka ni ucimbicimbi pameso pa Mlungu ni kutama mwakulungama.”​—1 Timoteo 2:2.

Kusagula ŵakulamulila ŵa cilambo. Aklistu ŵasyesyene akusacimbicisya yakusagula ya ŵane pa ngani jakusagula ŵakulamulila ŵa cilambo. Jemanjaji ngakusiŵalekasya ŵandu kusagula ŵakulamulila, nambo akusapikanila ŵandu ŵasagulidwe. Nambope, jemanjaji ngakusajigala nawo mbali pa yakutendekwa ya ndale. (Matayo 22:21; 1 Petulo 3:16) Ana Aklistu mpaka atende cici naga m’cilambo cawo akusakanganicisya ŵandu kuti asaguleje ŵakulamulila kapena naga akusiŵalagasya ŵandu ŵangajawula kumalo kwakusagulila ŵakulamulila? Pakumbucila kuti Sadilaki, Mesaki ni Abedinego ŵayikene pakwawula ku Dula gagaliji malo gatyatyatya, Mklistu jwakusimana ni yakutendekwa mpela yeleyi, mpaka asagule kwawula ku malo gakusagulilago naga cikumbumtima cakwe cikumkunda. Nambope, jwalakwe cacilolecesya kuti akasasagula nawo. Jwalakwe akusosekwa kuganicisya songa syakuyicisyasi:

1. Ŵakumkuya Yesu ‘nganaŵa ŵa cilambo capasi.’​—Yohane 15:19.

2. Aklistu akusajimila Klistu ni Ucimwene wakwe.​—Yohane 18:36; 2 Akolinto 5:20.

3. Mpingo waciklistu ukusakulupilila yindu yakulandana, soni cinonyelo mpela ca Klistu cikusakamucisya ŵandu ŵakwe kuŵa ŵakamulana.​—1 Akolinto 1:10; Akolose 3:14.

4. Ŵandu ŵasagwile mundu kuti aŵe jwakulamulila ni ŵakusakola magambo pa yiliyose yakutenda jwakulamulilajo.​—Aganicisye yamaloŵe gagali pa 1 Samueli 8:5, 10-18; soni 1 Timoteo 5:22.

5. Ayisalayeli paŵasacile kuti mundu ŵalamulileje, Yehofa ŵayiweni yeleyi mpela akumkana.​—1 Samueli 8:7.

6. Mklistu pakuŵecetana ni ŵandu ŵakusatenda yandale pakwamba ya Ucimwene wa Mlungu, akusosekwa aŵeceteje yeleyo mwagopoka.​—Matayo 24:14; 28:19, 20; Ahebeli 10:35.

Kamula masengo gane mmalo mwakwinjila usilikali. M’yilambo yine, Boma jikusasaka kuti ŵandu ŵakanile kwinjila usilikali, akamuleje masengo gane gakamucisya cilamboco kwakandaŵi. Naga tukusimana ni yeleyi, tukusosekwa kujipopelela nganiji, mwine kuwusya nganisyo kwa Mklistu jwamkomangale mwausimu, kaneko ni kusagula yindu mwakamulana ni cikumbumtima cetu.​—Miyambo 2:1-5; Afilipi 4:5.

Maloŵe ga Mlungu gakusatusalila kuti ‘twapikanileje ŵakulamula ni ŵakwete ulamusi, soni tuŵeje ŵacile kutenda masengo galigose gambone . . . tuŵeje ŵakuŵeŵa.’ (Tito 3:1, 2) Pakuganicisya yeleyi, komboleka kuliwusya yiwusyo yakuyicisyayi: ‘Ana kunda kuti ngamuleje masengo galamwilega ngasikundendekasya kuti njinjilile nawo ndale kapena mu yakutendekwa ya dini jaunami?’ (Mika 4: 3, 5; 2 Akolinto 6:16, 17) ‘Ana kamula masengo gelega kucingamucisya kuti ngomboleceje kwanilisya maukumu gangu gaciklistu kapena iyayi?’ (Matayo 28:19, 20; Aefeso 6:4; Ahebeli 10:24, 25) ‘Nambosoni, ana kamula masengo gelega kucimbaga lipesa lyakonjecesya yakutenda pa yindu yausimu, mpela kutenda undumetume wandaŵi syosope?’​—Ahebeli 6:11, 12.

Naga cikumbumtima ca Mklistu cikumkunda kamula masengo gane kuti akajawula ku ukayidi, Aklistu ŵane akusosekwa kucimbicisya yasagwile Mklistujo. (Aloma 14:10) Nambo naga akuyiwona kuti jwalakwe ngaŵa mkamula masengogo, Aklistu ŵane akusosekwa kucimbicisyasoni yasagwile.​—1 Akolinto 10:29; 2 Akolinto 1:24.