Ana Mklistu Jwamkongwe Akusosekwa Kuwala Kandu Kumtwe Payakutendekwa Yapi, Soni Ligongo Cici?

Mwakamulana ni yajikusasala Baibulo, ana Mklistu jwamkongwe akusosekwa kuwala kandu kumtwe pandaŵi japi? Kwende tulole yaŵasasile ndumetume Paulo panganiji. Jwalakwe ŵasasile yampaka yitukamucisye kusagula cenene yakutenda yampaka yimcimbicisye Mlungu. (1 Akolinto 11:3-16) Paulo ŵasasile yindu yitatu yatukusosekwa kuyiganicisya yayili: (1) yakutendekwa yele jwamkongwe mpaka asosekwe kuwala kandu kumtwe, (2) mwayiŵele yindu pamalopo, soni (3) ligongo lyakwe akusosekwa kuwala kandu kumtwe.

Yakutendekwa. Paulo ŵasasile ya yakutendekwa yiŵili, yayili; ‘kupopela ni kulocesya.’ (1 Akolinto 11:4, 5) Yisyene kuti kupopela kuli mbali jakulambila jatukusaŵecetana ni Yehofa. Lelo jino, kulocesya mpaka kugopolele kutenda masengo galigose gakwiganya Baibulo gele ndumetume jwaciklistu akusagatenda. Ana pelepa nikuti Paulo ŵalosisye kuti jwamkongwe jwaciklistu akusosekwa kuwala kandu kumtwe pandaŵi jilijose jakupopela kapena jakwiganya usyesyene wa m’Baibulo? Iyayi. Mwayiŵelele yindu pamalopo mpaka yilosye naga jwalakwe akusosekwa kuwala kandu kumtwe kapena iyayi.

Mwayiŵelele yindu pamalopo. Paulo ŵalosisye kuti jwamkongwe mpaka awale kandu kumtwe pa yakutendekwa yiŵili, yayili yakutendekwa ya peŵasa, soni ya mumpingo. Jwalakwe ŵasasile kuti: “Jwamlume ali mtwe wa ŵakongwe . . . Nambo jwamkongwe naga akupopela kapena kulalicila maloŵe ga Mlungu, [“kulocesya,” NW] ali jwangawala kandu kumtwe kwakwe nikuti jwalakwejo akwalusya mtwe wakwe [jwakwete ukumu].” (1 Akolinto 11:3, 5) Mwiŵasa, Yehofa ŵampele jwamlume ukumu wakuŵa mtwe wa jwamkongwe. Naga jwamkongwejo ngakucimbicisya ulamusi wa ŵamkwakwe, mwakutenda masengo gapelece Yehofa kwa ŵamkwakwe, nikuti jwalakwe akwajalusya ŵamkwakwewo. Mwambone, naga jwamkongwe akusosekwa kuti atendesye lijiganyo lya Baibulo ŵamkwakwe ali papopo, jwalakwe mpaka alosye kucimbicisya ukumu wa ŵamkwakwe mwakuwala kandu kumtwe. Jwamkongwejo mpaka atende yeleyi cinga ŵamkwakwewo ali ŵabatiswe kapena iyayi, ligongo jwamlumejo ni jwali mtwe wa liŵasa.a Naga akupopela kapena kwiganya Baibulo pameso pa mwanagwe jwamlume jwam’batiswe, jwalakwe akusosekwasoni kuwala kandu kumtwe, ngaŵaga ligongo lyakuti mwanacejo ali mtwe wa liŵasa, nambo ligongo lyakuti mumpingo waciklistu, acalume ŵabatiswe ni ŵakwete ukumu wakwiganya.

Paulo ŵasasile mwayikusosecela kwendela yindu mumpingo. Jwalakwe ŵaŵecete kuti: “Nambo naga jwine jwalijose akusaka kusisya yeleyi, ni nguti uwe nambosoni mipingo ja Mlungu nganitukola msyungu wine akaŵe uwuwu pewu.” (1 Akolinto 11:16) Mumpingo waciklistu, acalume ŵabatiswe ni ŵakusakola ukumu wakulongolela. (1 Timoteo 2:11-14; Ahebeli 13:17) Acalumepe ni ŵakusasagulidwa ni Mlungu kuŵa acakulungwa ŵa mumpingo, soni ŵakutumicila ŵakamucisya kuti asamalile likuga lya ngondolo sya Mlungu. (1 Petulo 5:1, 2) Nambo ndaŵi sine, Mklistu jwamkongwe mpaka asosekwe kamula masengo gakusatendega Mklistu jwamlume jwam’batiswe jwakuŵajilwa. Mwambone, jwalakwe mpaka asosekwe kutendesya msongano wakosecela undumetume wa mu mgunda naga pangali Mklistu jwamlume jwam’batiswe jwakuŵajilwa. Mklistu jwamkongwe mpaka atendesye lijiganyo lyakwe lya Baibulo atamose papite yalumo ni Mklistu jwamlume jwam’batiswe.b Nambo ligongo lyakuti masengo gakwiganya gali mbali ja mpingo waciklistu, jwamkongwejo mpaka asosekwe kuwala kandu kumtwe pakulosya kuti akusamanyilila kuti masengo gakutendago gali ga acalume ŵaciklistu.

Nambope, pana mbali syejinji syakulambila syele jwamkongwe jwaciklistu jwangasosekwa kuwala kandu kumtwe. Mwambone, jwalakwe ngakusosekwa kuwala kandu kumtwe pakwanga pamisongano ja Ciklistu, pakulalicila ku nyumba ni nyumba ni ŵamkwakwe, kapena pakulijiganya kapena kupopela pampepe ni ŵanace ŵakwe ŵangabatiswa. Nambo mpaka paŵe yine yakuti jwamkongwe jwaciklistujo ngakuyipikanicisya. Jwalakwe mpaka asosekwe kuwungunya kuti amanyilile yangakuyipikanicisyayo.c Nambope naga pana yine yakuti ngakuyipikanicisyape, soni cikumbumtima cakwe ngacikumkunda kuti akawala kandu kumtwe, jwalakwe ngasalemwa kuwala kandu kumtwe, mpela mwayiŵelele pa ciwulilipo.

Magongo gakwe. Pa 1 Akolinto 11:10, pana magongo gaŵili gampaka gamtendekasye jwamkongwe jwaciklistu kuwala kandu kumtwe. Lilembali likusati, “Ligongo lya malayika, jwamkongwe awaleje kandu kumtwe, kulosya kuti ali pasi pa ulamusi wa mundu jwine.” Maloŵe gakuti, “kulosya kuti ali pasi pa ulamusi wa mundu jwine,” gakulosya kuti jwamkongwe pawete kandu kumtwe akusacimbicisya ulamusi wapelece Yehofa mumpingo kwa acalume ŵabatiswe. Jwamkongwe pawete kandu kumtwe akusalosya kuti akusamnonyela, soni kumpikanila Yehofa Mlungu. Jwamkongwe akusawalasoni kandu kumtwe “ligongo lya malayika.” Ana jwamkongwe pawete kandu kumtwe yikusakwaya catuli malayika?

Malayika gakusakola lung’wanu pagakuwona kuti ulamusi wa Mlungu ukucimbicisidwa mu likuga lya Yehofa lya kwinani, soni lya pacilambo capasi. Jemanjaji yikusiyakamucisya pakwawona ŵandu ŵangali umlama ali mkucimbicisya ulamusi wa Yehofa. Nombe jemanjaji akusosekwa kumpikanila Yehofa, mwakulekanga ni malayika gane kalakako gagalepele kumpikanila Yehofa. (Yuda 6) Malayika gakusalijiganya yejinji pagakwawona acakongwe ŵaciklistu ŵakusakombola kutenda cenene yindu yine, soni ŵalunda kupunda acalume ŵane ŵebatiswe ali mkupikanila ulamusi wa acalumewo. Soni yikusakomboleka kuti jwamkongwejo ali Mklistu jwamsagulwe jucacilamulila yalumo ni Klistu. Jwamkongwejo cacikola ukumu wapenani kupunda wa malayika, ni kulamulilaga yalumo ni Yesu kwinani. Malayika gakusalola cisyasyo camboneci. Welewu uli upile wekulungwa kwa acakongwe ŵaciklistu wakulosya kulinandiya mwakupikanila ulamusi mwakulupicika pameso pa malayika gejinji gakulupicika.