Yampaka Tutende Kuti Tuŵe Ŵakulekangana ni Cilambo

1. Ana Yesu ŵagombelecesye mnope ya cici pacilo cakumalisya kuŵa pacilambo capasi mpela mundu?

PACILO cakumalisya kuŵa pacilambo capasi mpela mundu, Yesu ŵalosisye kuti ŵaganicisyaga mnope ya m’bujo mwa ŵakulijiganya ŵakwe. Jwalakwe ŵayikene pakujipopelela nganijo kwa Atati ŵakwe kuti: “Nganguŵenda kuti ŵatyosye jemanjaji pa cilambo capasi, nambo ngwaŵenda kuti ŵasunje cenene kwa Jwakusakala jula. Mpela une nganimba jwacilambo capasi, jemanjajo nganaŵa ŵacilambo capasi.” (Yohane 17:15, 16) M’lipopelo lyakwe lyakutyocela pasi pamtimali, Yesu ŵalosisye kuti ŵanonyelaga mnope ŵakulijiganya ŵakwe, soni ŵalosisye kusosekwa kwa maloŵe giŵasalile ŵane mwa jemanjajo pandanda kuti: ‘Nganim’ŵa ŵa cilambo capasi.’ (Yohane 15:14) Pelepatu Yesu ŵayiwonaga kuti yaliji yakusosekwa kuti ŵakulijiganya ŵakwe aŵe ŵakulekangana ni cilambo.

2. Ana maloŵe gakuti “cilambo capasi” gaŵasasile Yesu gakugopolela cici?

² Maloŵe gakuti “cilambo capasi” gaŵasasile Yesu, gakugopolela ŵandu ŵakutalikangana ni Mlungu, ŵakulamuligwa ni Satana, ŵali acikapolo ŵa kulinonyela, soni kupoka yayikusatyocela kwa Satanajo. (Yohane 14:30; Aefeso 2:2; 1 Yohane 5:19) Kusala yisyene, ‘kutenda uganja ni cilambo capasi uli uŵengani ni Mlungu.’ (Yakobo 4:4) Sano, ana ŵakusaka kwendelecela kuŵa m’cinonyelo ca Mlungu mpaka aŵe catuli ŵakulekangana ni cilambo capasi nambo ali mkutama m’cilambo cicoco? Citulole matala msano aga: Mwakuŵa ŵakulupicika pakamucisya Ucimwene wa Mlungu ni ngajinjilila nawo mu ndale sya m’cilambo, mwakukana msimu wacilambo, mwakuwala ni kulisalalisya mwakuŵajilwa, mwakutama ni umi wangasaka yejinji, soni mwakuwala yida yosope yapelece Mlungu.

KUŴA ŴAKULUPICIKA, SONI NGAJINJILILA NDALE

3. (a) Ligongo cici Yesu nganajinjililaga ndale mu ndaŵi jakwe? (b) Ligongo cici mpaka tusale kuti ŵakumkuya ŵa Yesu ŵasagulwe ni msimu ali ŵakwimilila Klistu? (Alolesoni maloŵe ga mumbesi.)

³ Mmalo mwakwinjilila ndale mu ndaŵi jakwe, Yesu ŵaŵisile nganisyo syakwe syosope pa kulalicila ya Ucimwene wa Mlungu, wawuli boma jakwinani jele Yesu ŵaliji jwakuti caciŵa Mwenye jwakwe. (Danieli 7:13, 14; Luka 4:43; 17:20, 21) Ni ligongo lyakwe Yesu paŵaliji pameso pa jwakulamulila Jwaciloma Pontiyo Pilato, ŵasasile kuti: “Ucimwene wangu nganiwuŵa kose wa cilambo capasi pano.” (Yohane 18:36) Ŵakumkuya ŵakwe ŵakulupicika akusajigalila cisyasyo cakwe mwakuŵa ŵakulupicika kwa Klistu, soni ku Ucimwene wakwe mwakulalicila ya Ucimwenewo pacilambo cosope capasi. (Matayo 24:14) Ndumetume Paulo ŵalembile kuti “Uwe tuli ŵakwimilila Klistu, . . . tukum’ŵenda m’lina lya Klistu; mkunde kwilanasoni ni Mlungu.”a​—2 Akolinto 5:20.

4. Ana Aklistu ŵasyesyene wosope alosisye catuli kukulupicika kwawo ku Ucimwene wa Mlungu? (Alole libokosi pa peji 52.)

⁴ Ŵandu ŵakusakamula masengo gakwimila cilambo cawo m’cilambo cine, ŵangajinjilila nawo ya ndale, soni yakutendekwa yine ya m’cilambo calico. Nambo ŵakwimililaŵa akusakamula masengo gakamucisya boma ja cilambo cakucijimila. Yeleyi yikulandana ni yakusatenda ŵakumkuya ŵa Klistu ŵasagulwe ni msimu, ŵele ‘kumangwawo kusyesyene ni kwinani.’ (Afilipi 3:20) Tukusayamicila jemanjaji ligongo lya mtawu wawo pakulalicila ya Ucimwene. Yeleyi yikamucisye ŵandu ŵajinji ŵa “ngondolo sine” sya Klistu “kwilanasoni ni Mlungu.” (Yohane 10:16; Matayo 25:31-40) Ŵangondolo sineŵa akusakamucisya acabale ŵa Yesu ŵasagulwe ni msimu. Mpela likuga lyakamulana pakukamucisya Ucimwene wa Mesiya, makuga gaŵiliga gangajinjilila nawo ndale sya m’cilambo ata panandi.​—Aŵalanje Yesaya 2:2-4.

5. Ana Aklistu ŵangajinjilila nawo ndale pa ligongo linesoni lyapi?

⁵ Aklistu ŵakulupicikaŵa ŵangajinjilila ndale ngaŵape ligongo lyakusaka kuŵa ŵakulupicika kwa Klistu. Nambo ligongo line lili lyakuti, jemanjaji akwete mkamulano wa ŵakulambila ŵa cilambo cosope capasi. (Matayo 28:19; 1 Petulo 2:9) M’yoyo, naga tukaŵe mkukamucisya likuga lya ndale, ngamkanitukola upile wakulalicila ya Ucimwene wa Mlungu, soni mkamulano wetu wa Ciklistu ukasokonecele mnope. (1 Akolinto 1:10) Konjecesya pelepa, mu ndaŵi ja ngondo, mpaka tumenyaneje ni ŵakulambila acimjetu ŵele Baibulo jikusatulamula kuti twanonyeleje. (Yohane 13:34, 35; 1 Yohane 3:10-12) Ni ligongo lyakwe Yesu ŵasalile ŵakulijiganya ŵakwe kuti akaputaga ngondo. Soni ŵayikene pakwasalila jemanjajo kuti ŵanonyeleje acimmagongo ŵawo.—Matayo 5:44; 26:52; alole libokosi lyakuti “Ana Ngangwinjilila Nawo Ndale?” pa peji 55.

6. Ana kulipeleka kwawo kwa Mlungu kukusakamulana catuli ni kupikanila kwawo Mwenye?

⁶ Aklistu ŵasyesyenewe nganitulipeleka kwa mundu, ku ciwanja cinecakwe kapena ku cilambo, nambo twalipelece kwa Mlungu ni umi wosope. Lilemba lya 1 Akolinto 6:19, 20 likusati, “Umi umkwetewo nganiwuŵa wenu nambo wa kwa Mlungu. Mlungu ŵamsumile ni mtengo wapenani.” Ni ligongo lyakwe pakupeleka kwa “Mwenye” yakuŵajilwa kumpa, mpela ucimbicimbi, misongo, soni kumpikanila, ŵakumkuya ŵa Yesu ‘akusapelekasoni yayili yakwe ya Mlungu kwa Mlungujo.’ (Maliko 12:17; Aloma 13:1-7) Yeleyi yikusapwatikapo kumlambila, kumnonyela ni umi wosope, soni kumpikanila mwakulupicika Mlungujo. Jemanjaji akusakunda kuwa ligongo lyakumpikanila Mlungu.​—Luka 4:8; 10:27; aŵalanje Masengo 5:29; Aloma 14:8.

KUWUKANYA “MSIMU WA CILAMBO CAPASI”

7, 8. Ana “msimu wacilambo capasi” uli cici, soni ‘ukusakamula’ catuli masengo mwa mundu?

⁷ Aklistu akusaŵasoni ŵakulekangana ni cilambo capasi mwakukanya msimu wakwe wakusakala. Paulo ŵalembile kuti, “Uwe nganitupocela msimu wacilambo capasi pano, nambo twapocele msimu weswela wakutyocela kwa Mlungu.” (1 Akolinto 2:12) Jwalakwe ŵasalilesoni Aklistu ŵa ku Aefeso kuti, “Pandaŵi jelejo mwatendaga yakusakala pakuya . . . cilambo capasi cino, ni kumpikanila Satana. Jwele jwakulamulila cilambo capasi nipo msimu wakwe wangalumbana ukamula masengo pasikati pa ŵandu ŵakwimucila Mlungu.”​—Aefeso 2:2, 3.

⁸ Msimu wa cilambo capasi uli macili gangawonecela gakwakanganicisya ŵandu kuti akampikanilaga Mlungu, soni ukusalimbikasya ‘yakumbila ya m’cilu, soni yindu yagakusakumbila meso.’ (1 Yohane 2:16; 1 Timoteo 6:9, 10) Msimuwu ‘ukusalamulila’ cilambo capasi mwa kucilamulila cilu cakulemwa, mwakwatega ŵandu mwaukalamusi. Ukusalimbikasya ŵandu kuti ajendelecele kutenda yakusakala, soni uli wakuwanda mnope mpela mbungo. Konjecesya pelepa, msimuwu ‘ukusakamula masengo’ mwa mundu mwakumtendekasya mwapanandipanandi kola ndamo syangaŵajilwa mpela kulinonyela, kulitulumbasya, kutunduka, nganisyo syakusaka kulisagulila jika yakutenda, soni kwimucila.b Pelepa mpaka tugambe kusala kuti msimu wa cilambo ukusatendekasya kuti yitendo ya Satana yikuleje mumtima mundu.​—Yohane 8:44; Masengo 13:10; 1 Yohane 3:8, 10.

9. Ana msimu wacilambo mpaka ujinjile catuli munganisyo, soni mumtima wetu?

⁹ Ana msimu wa cilambo capasi mpaka utamilicice mumtima, soni munganisyo mwawo? Komboleka, naga tuli tuwukundile msimuwo ligongo lyangalicenjela. (Aŵalanje Miyambo 4:23.) Yeleyi mpaka yitendekwe mwakusisika, mwine ligongo lyakukunguluka ni ŵandu ŵakusawoneka mpela ŵambone nambo ali ŵangamnonyela Yehofa. (Miyambo 13:20; 1 Akolinto 15:33) Mpaka ajigalilesoni msimu wakusakala mwakuŵalanga mabuku gangaŵajilwa, kulolela yindu yakuŵagula, kuŵalanga yindu ya ŵakusapuka pa Intaneti, kutenda yakusangalasya yangaŵajilwa, soni mang’asi gele ŵandu ŵakwe akusalimbanaga mnope, kapena tugambe kuti jwalijose kapena cilicose campaka citutendekasye kola nganisyo sya Satana kapena sya yakutendekwa ya m’cilambo cakwe cakusakalaci.

10. Ana mpaka tuwukanye catuli msimu wacilambo?

¹⁰ Ana mpaka tuwukanye catuli msimu wakogoya wacilambo ni kulisunga mu cinonyelo ca Mlungu? Mwakukamulicisya masengo yindu yausimu yiliyose yatupele Yehofa, soni kuŵendaga msimu weswela kuti utukamucisye. Yehofa akwete macili mnope kupunda Satana kapena cilambo cakwe cakucilamulila. (1 Yohane 4:4) M’yoyo tukusosekwa kum’ŵandicilaga Yehofa mwipopelo.

KUWALA, SONI KULISALALISYA MWAKUŴAJILWA

11. Ana Msimu wa cilambo ukwayiye catuli kawale ka ŵandu?

¹¹ Kawale, soni kalisalalisye ka mundu kakusalosya msimu wawukumlamulila mundujo. M’yilambo yejinji, kuwala mwakulicimbicisya kukunondipilanondipila mwati mundu jwine jwakusagulusya maloŵe pa TV ŵasasile kuti pacangakaŵapa ciyiŵeje yakusawusya kulekanganya pasikati pa acakongwe ŵakulijesya ni ŵangalijesya. Nyusipepala jine jasasile kuti, atamose ŵanace ŵacakongwe akunonyela ndamo jakuwala yakuwala “yakunyambatila mnope cilu, soni yejipi.” Konjecesya pelepa, panasoni ndamo jakuwala mwakutesya sooni jajikusalosya msimu wakwimucila, soni kusoŵa kwa kulicimbicisya.

12, 13. Ana malamusi gapi ga ndamo syambone gampaka gatukamucisye pa kawale, soni kalisalalisye?

¹² Mpela ŵakutumicila ŵa Yehofa tukusosekwa kuwonekaga cenene, yayikugopolela kuwala yakuwala yetakate, yakupeleka ucimbicimbi, soni yakuŵajilwa pa cakutendekwa cilicose. Kawale ketu kakusosekwa ndaŵi syosope kalosyeje ‘kulicimbicisya, lunda, soni kaŵeje kakwenela.’ Kutenda yeleyi pampepe ni “masengo gambone,” kukusatendekasya wosope, cinga acalume kapena acakongwe kuŵajilwa kuŵa “ŵakumlambila Mlungu.” Yosopeyi tukusatenda ngaŵa pakuliganicisya jika, nambo pakusaka kuti ‘tulisunje m’cinonyelo ca Mlungu.’ (1 Timoteo 2:9, 10; Yuda 21) Kusala yisyene, tukusaka kuti kulisalalisya kwetu kuŵeje kwa ‘umi wamkati . . . , wawuli wamtengo wapenani pameso pa Mlungu.’​—1 Petulo 3:3, 4.

¹³ Tukumbucilejesoni kuti yakuwala yetu, soni kalisalalisye ketu mpaka kakwaye mwakusakuwonela ŵandu kulambila kusyesyene. Maloŵe ga Cigiliki gaŵagagopelele kuti “mwakwenela,” naga tukugasala pakwamba ya ndamo, gakusagopolela kwacimbicisya mnope ŵane, kwajogopa, soni kucimbicisya nganisyo sya ŵane. Cakusosekwa kwa m’wejo ciŵeje kuganicisya mnope ya yikumbumtima ya ŵane ngaŵaga kwamba kuwala catukusaka. Kupunda yosopeyi, tukusaka tucimbicisyeje Yehofa ni ŵandu ŵakwe, soni kulilosya kuti tuli ŵakutumicila Mlungu, ‘mwakutenda yosope kuti tumcimbicisye Mlungu.’​—1 Akolinto 4:9; 10:31; 2 Akolinto 6:3, 4; 7:1.

14. Pangani ja kawonece, soni casa, ana tukusosekwa kuliwusya yiwusyo yapi?

¹⁴ Kuwala cenene, kulisalalalisya, soni kuŵa ŵacasa kuli kwakusosekwa mnope patukwawula kukulalicila kapena ku misongano ja Ciklistu. Aliwusye jika kuti: ‘Ana kawonece kangu kakusikasimonjesya ŵandu? Ana kakusikatendekasya sooni ŵane? Ana ngani ja kuwala ni kulisalalisya ngusajiwona kuŵa jakusosekwa mnope kulekangana ni kuti mbajilwe maukumu ga mumpingo?’​—Salimo 68:6; Afilipi 4:5; 1 Petulo 5:6.

15. Ligongo cici Maloŵe ga Mlungu gangasala malamusi galigose pakwamba ya mtundu wa yakuwala, kulisalalisya, soni casa ca mundu?

¹⁵ Baibulo jangasala malamusi galigose pakwamba ya mtundu wa yakuwala, kulisalalisya, soni casa ca mundu. Yehofa jwangasaka kutusumula upile wetu wakusagula kapena wakukamulicisya masengo lunda lwetu pa ngani jeleji. Nambo, jwalakwe akusasaka kuti tuŵe ŵandu ŵakomangale, ŵakupakombola kukamulicisya masengo malamusi ga ndamo syambone, soni ‘kupitila mu kulijiganya kwetu tumanyilileje kulekanganya yindu yambone ni yindu yangalumbana.’ (Ahebeli 5:14) Cakusaka mnope Mlungu ni cakuti cinonyelo citulongoleleje kumnonyela jwalakwe, soni acimjetu. (Aŵalanje Maliko 12:30, 31) Yeleyi yikulosya kuti mpaka paŵe kawale, soni kalisalalisye kakuŵajilwa kakulekanganalekangana. Yeleyi yikusawonecela pamisongano jekulungwa ja ŵandu ŵa Yehofa ŵakusawala cenene kulikose kwasongangene.

KUŴIKA NGANISYO SYOSOPE PA CINDU CIMO

16. Ana msimu wa cilambo ukusatenda yatuli yakulekangana ni yaŵajiganyisye Yesu, soni ana tukusosekwa kuliwusya yiwusyo yapi?

¹⁶ Msimu wa cilambo uli wakulambusya, soni ukusiwakanganisya ŵandu ŵajinji kuti asosesoseje mnope mbiya, soni yipanje kuti aŵe ŵakusangalala. Nambo Yesu ŵasasile kuti, “Pakuti atamose mundu akole yipanje yejinji, yeleyo ngaŵa mkukulupusya umi wa mundujo.” (Luka 12:15) M’malo mwakwalimbikasya ŵandu kuti alijimeje mwakupundanganya mnope, Yesu ŵajiganyisye kuti “ŵandu ŵakulaga m’mitima mwawo mu usimu,” soni ŵakwete “meso” gakulola pa cindu cimo, kugopolela kuŵika nganisyo syawo syosope pa cindu cimo, akusakola cisangalalo cisyesyene. (Matayo 5:3; 6:22, 23) Aliwusye jika kuti: ‘Ana ngusakulupilila yaŵajiganyisye Yesuyi, kapena “atati ŵawunami wosope” ni ŵakulamulila nganisyo syangu? (Yohane 8:44) Ana yangusaŵeceta, yangusasaka kutenda, yangusayiwona kuŵa yakusosekwa, soni yangusatenda pa umi wangu yikusalosya kuti ndili mundu jwatuli?’​—Luka 6:45; 21:34-36; 2 Yohane 6.

17. Asale maumbone gakusapata ŵandu ŵakusaŵika nganisyo syawo pa cindu cimo.

¹⁷ Yesu ŵaŵecete kuti: “Lunda lwa Mlungu lukusawoneka kuti luli lwakuwona malinga ni yitendo yakwe.” (Matayo 11:19) Agambe kuganisya ya maumbone gakusapata ŵandu ŵakusaŵika nganisyo syawo pa cindu cimo. Akusapata cipumulisi cisyesyene mu undumetume wawo. (Matayo 11:29, 30) Ngakusalagasika mnope nganisyo, yayikusiyatendekasya kuti aŵambale yipwetesi yejinji m’mitima mwawo. (Aŵalanje 1 Timoteo 6:9, 10.) Ligongo lyakwikutila ni yakwete pa umi, jemanjaji akusakola ndaŵi jejinji jakutendela yindu pampepe ni liŵasa lyawo, soni Aklistu acimjawo. M’yoyo, akusagonaga lugono lwambone. (Mlaliki 5:12) Akusasangalala pakwagaŵila acimjawo yindu yiliyose mwampaka akombolele. (Masengo 20:35) ‘Cembeceyo cawo cikusajendelecela kukula,’ akusakola mtendele wa mumtima, soni akusaŵa ŵakwikutila ni yakwete. (Aloma 15:13; Matayo 6:31, 32) Kusala yisyene, maumbone gelega gali gapenani mnope!

KUWALA “YIDA YOSOPE YA MLUNGU”

18. Ana Baibulo jikusasala yatuli pakwamba ya mmagongo jwetu, matala gakusakamulicisya masengo pakulimbana nawe, soni mtundu wa ngondo jetu?

¹⁸ Ŵandu ŵakusalisunga m’cinonyelo ca Mlungu akusasangalalasoni ligongo lyakuti Mlungu akusiŵacenjela kwa Satana. Satana jwangasakape kuti Aklistu akaŵa ŵakusangalala, nambo akusasakasoni kuti akapata upile wakupata umi wangamala. (1 Petulo 5:8) Paulo ŵalembile kuti, “Ngatukulimbana ni ŵandupe iyayi. Nambotu tukulimbana ni maucimwene, ŵakulamulila ni macili ga cipi ga cilambo capasi cino, niposoni ni misimu jakusakala jamwinani.” (Aefeso 6:12) Maloŵe gakuti ‘kulimbana’ gakulosya kuti ngondo jakwe ngaŵa jakumenyana mwakutalikangana kapena mwakusisika, nambo jakumenyana mwakuŵandikana kapena kuti meso ni meso. Konjecesya pelepa, maloŵe gakuti “maucimwene,” soni ‘ŵakulamulila ŵa cilambo capasi’ gakulosya kuti misimu jakusakala jikusalinganya cenene ngondo syakwe, soni mwamele.

19. Asale yida yosope yausimu ya Mklistu, soni masengo gakwe.

¹⁹ Atamose kuti ŵanduwe tukwete yakulemweceka, soni yakulepela yejinji, mpaka tupunde pa ngondoji. Mwatuli? Mwakuwala “yida yosope ya Mlungu.” (Aefeso 6:13) Pakusala ya yida yeleyi, lilemba lya Aefeso 6:14-18 likusati: “Jimani sambano, mli m’wete usyesyene mpela lamba m’ciwunu mwenu, walani cilungamo mpela malaja ga cisyano gakucinjilicisya pamtima penu, nipo cangu cenu pakulalicila Ngani Syambone syamtendele ciŵe mpela sapato syenu. Ndaŵi syosope m’ŵeje ni cikulupi mpela cakulicinjilicisya cenu cele citimcipakombola naco kusimicisya mapanga gosope gakolela moto wa Satana jula. Pocelani cikulupusyo mpela cisoti cenu, ni maloŵe ga Mlungu mpela upanga wele msimu weswela ukumpa. Mtendeje yosopeyi mwakupopela, ni kuŵenda cikamucisyo ca Mlungu ndaŵi syosope. Ndaŵi jilijose mpopeleje mwakulongoleledwa ni msimu weswela.”

20. Ana ngondo jetu jikusalekangana catuli ni ja msilikali jusyesyene?

²⁰ Ligongo lyakuti yida yausimuyi yili yakutyocela kwa Mlungu, tukwete cikulupi kuti yicitucenjela naga tukuyiwala ndaŵi syosope. Mwakulekangana ni asilikali ŵasyesyene ŵakusakola ndaŵi sine syakupumulila kuputa ngondo, Aklistu ali pa ngondo jangapumulila, ja umi kapena ciwa jajicimala pa ndaŵi jele Mlungu cacijonanga cilambo ca Satanaci, soni kujiwugalila misimu josope jakusakala kwisimbo kwangali mbesi. (Ciunukuko 12:17; 20:1-3) M’yoyo, akapela naga akulimbana ni yakulepela kapena nganisyo syakusaka kutenda yakulemweceka. Wosope tukusosekwa ‘kulilimbisya kapena kuti kuliputa’ kuti tuŵe ŵakulupicika kwa Yehofa. (1 Akolinto 9:27) Kusala yisyene, naga ngatukulinjilila kulimbana ni yakulepela yetu, pelepo yikusosekwa kutukwaya mnope.

21. Ana mpaka tupunde catuli pangondo jetu jausimu?

²¹ Konjecesya pelepa, m’wejo ngaŵa mkupakombola kupunda ngondoji ni macili getu. Ni ligongo lyakwe Paulo akutukumbusya kusosekwa kwa kupopela kwa Yehofa ‘ndaŵi jilijose mwakulongoleledwa ni msimu weswela.’ Soni tukusosekwa kupikanila Yehofa mwakulijiganya Maloŵe gakwe, soni kusongana ni “asilikali” acimjetu pandaŵi syosope, ligongo ngondoji ngatukuputa jika. (Filimoni 2; Ahebeli 10:24, 25) Ŵandu ŵali ŵakulupicika pa yosopeyi cacipunda ngondoji, soni cacipakombola kucenjela cikulupi cawo naga acingangene ni yakulinga cikulupico.

AŴE ŴAKOSEKA KUCENJELA CIKULUPI CAWO

22, 23. (a) Ligongo cici tukusosekwa kuŵa ŵakoseka kucenjela cikulupi cetu, soni ana yiwusyo yapi yatukusosekwa kuliwusya? (b) Ana mu mtwe wakuyicisya tucilijiganya ya cici?

²² Yesu ŵasasile kuti, ‘Jemanja nganim’ŵa ŵacilambo capasi, . . . ni ligongo lyakwe akum’ŵenga.’ (Yohane 15:19) M’yoyo, Aklistu akusosekwa ndaŵi syosope kuŵa ŵakoseka kucenjela cikulupici cawo, nambo atendeje yeleyi mwaucimbicimbi ni mwakuwusimana mtima. (Aŵalanje 1 Petulo 3:15.) Aliwusye jika kuti: ‘Ana ngusapikanicisya ligongo lyakwe ndaŵi sine ŵa Mboni sya Yehofa, akusatenda yindu mwakulekangana ni nganisyo sya ŵandu ŵajinji? Naga ngusagula kutenda yindu yakulekangana ni nganisyo sya ŵandu ŵajinji, ana ngusasimicisya kuti yajikusasala Baibulo, soni yakusasala kapolo jwakulupicika yili yisyene? (Matayo 24:45; Yohane 17:17) Soni pangani jakutenda yakumsangalasya Yehofa, ana ngusaŵa jwakoseka kuŵa jwakulekangana ni ŵane, soni ngusasangalala ni kulekanganako?’​—Salimo 34:2; Matayo 10:32, 33.

²³ Ndaŵi syejinji kuŵa kwetu ŵakulekangana ni cilambo kukusatutendekasya kuti tulinjikweje m’matala gakusisika. Mwambone, mpela mwatulijiganyile kala, Satana akusalingaga kwatega ŵakutumicila ŵa Yehofa kuti aŵe mbali ja cilambo capasi pakamulicisya masengo yakusangalasya yakusakala. Ana mpaka tusagule catuli yakusangalasya yambone, yampaka yitulece tuli mkusangalala, soni cikumbumtima cetu cili ceswela? Tucilijiganya yeleyi mu mtwe wakuyicisya.