Ana Yesu Ŵapagwile mu December?

BAIBULO jangasala lisiku liŵapagwile Yesu. Nambope, jikusatupa magongo gakupikanika gakusimicisya kuti Yesu nganapagwa mu December.

Kwende tulole mujaŵelaga nyengo mu December ku Betelehemu kuŵapagwile Yesu. Mwesi wele m’Ciyuda wakolanjikwaga kuti Kisilefu (apanopano ndaŵi jakwe jajili pasikati pa November ni December) waliji mwesi wakusisima, soni wa wula jakumelemenda. Mwesi wakuyicisya waliji wa Tebeti (apanopano ndaŵi jakwe jajili pasikati pa December ni January). Mwesi welewu waliji wakusisima mnope, soni ndaŵi sine ku malo gakukwela, mesi gakamulanaga ligongo lya kusisimako. Kwende tulole yajikusatusalila Baibulo pakwamba ya nyengo ja kumaloku.

Yaŵalembile Esala m’Baibulo yikulosya kuti Kisilefu waliji mwesi wakusisima, soni wa wula jakumelemenda. Paŵasasile ya likuga lya ŵandu ŵaŵasongangene ku Yelusalemu “m’mwesi wa msano ni mcece [Kisilefu] palisiku lya 20 lya mwesiwo,” Esala ŵasasilesoni kuti ŵandu “ŵatetemelaga . . . ligongo lya wula jakumelemenda.” Pakwamba ya nyengo ja mundaŵiji, ŵandu ŵaŵasongangenewo ŵasasile kuti: “Jili ndaŵi ja wula, soni yili yangakomboleka kwima pasa.” (Ezara 10:9, 13; Yeremiya 36:22) Mwangakayicila ŵakucinga ŵa ku Betelehemu ŵalolecesyaga kuti mu December, yilango, soni jemanjajo akagonaga kwitinji ndaŵi ja cilo!

Baibulo jikusasala kuti cilo cele Yesu ŵapagwile, ŵakucingaŵa ŵaliji kukulisya yilango yawo kwitinji. Jwakulemba Baibulo Luka ŵalosisye kuti ndaŵi jeleji ŵakucinga ‘ŵatamaga mwitinji ndaŵi ja cilo kulindilila yilangwa yawo’ ciŵandika Betelehemu. (Luka 2:8-12) Alole kuti ŵakucingaŵa ŵatamaga kwitinjiko cilo, ngaŵaga kwamba kuja kukuyilisya yilangoyo kundaŵi ni kuwujililaga nayo ligulo. Ana yikakombolece kutamaga kwitinji kukoko m’ndaŵi jakusisima, soni ja wula ja mu December ku Betelehemu? Iyayi, ngamkaniyikomboleka. M’yoyo yayatendekwe paŵapagwaga Yesu yikulosya kuti jwalakwe nganapagwa mu December.a

Maloŵe ga Mlungu gakusatusalila ndaŵi jisyesyene jaŵawile Yesu, nambo gangasala yejinji pakwamba ya lisiku lyaŵapagwile. Yeleyi yikutukumbusya maloŵe ga Mwenye Solomoni gakuti: “Mbili jambone jikusapunda mawuta gambone, soni lisiku lyakuwa likusapunda lisiku lyakupagwa.” (Mlaliki 7:1) M’yoyo, yili yangasimonjesya kuti Baibulo jikusasala yejinji yakwaya undumetume, soni ciwa ca Yesu, nambo jangasala yejinji pakwamba ya ndaŵi jakupagwa kwakwe.