Ana Lisiku Lyakulamula Lili Cici?

ANA akusaganisya kuti Lisiku Lyakulamula liciŵa lyatuli? Ŵandu ŵajinji akusaganisya kuti mundu jwalijose cacijawulaga paujo pa citengu ca Mlungu. Pelepo Mlungu cacimlamulaga jwalijose pajikajika. Ŵane cacapa paladaiso jwakwinani, soni ŵane cacalamula kuti ajawule kumalo kucakalajeje kwangamala. Nambope, Baibulo jikusasala yakulekangana ni yeleyi pakwamba ya lisiku lyakulamula. Maloŵe ga Mlungu gakusalosya kuti lisiku lyeleli nganiliŵa lyakogoya, nambo lili lyakusangalasya, soni lyakuwucisya yindu kuti yiŵe cenene.

Pakwamba ya Lisiku Lyakulamula, ndumetume Yohane ŵasasile pa Ciunukuko 20:11, 12, kuti: “Naciweni citengu ceswela ni jwele jwakusatama pelepo. Cilambo capasi ni cakwinani yatisile pameso pakwe, mwakuti nganiyiwonekasoni. Nawenisoni ŵandu ŵawe, ŵacanandi ni ŵacakulungwa ali ajimi pameso pa citengu. Mabuku galiji gali gawugulidwe, kaneko buku jine jawugulidwesoni, buku ja ŵacijumi. Ŵandu ŵawe ŵalamulidwe malinga ni yiŵatesile, mpela muyalembedwele m’buku.” Ana Jwakulamula jwakumsala pelepa ali ŵani?

Yehofa Mlungu ali Jwakulamula jwamkulungwa jwa ŵandu. Nambope, jwalakwe asagwile mundu jwine kuti akamule masengo gakulamulaga. Pa lilemba lya Masengo 17:31, Paulo ŵasasile kuti Mlungu “ŵaŵicile cilepe lisiku litacilamula cilambo cosope capasi ni cilungamo kupitila mwa Mundu juŵamsagwile jula.” Jwakulamula jwamsagulweju ali Yesu Klistu juŵajimwice ku ŵawe. (Yohane 5:22) Sambano, ana Lisiku Lyakulamula licitanda cakaci, soni liciŵa lyelewu catuli?

Buku ja Ciunukuko jikusalosya kuti Lisiku Lyakulamula licitanda ngondo ja Alamagedo jili jimasile. Pandaŵiji cilambo ca Satana ciciŵa ali acijonasile.a (Ciunukuko 16:14, 16; 19:19–20:3) Pajicimala Alamagedo, Satana ni misimu jakusakala cacataŵa ni kwaponya m’lisimbo kwa yaka 1000. Mu ndaŵi jelejo, ŵa 144,000 cacilamulila “pampepe ni Klistu yaka 1000.” (Ciunukuko 14:1-3; 20:1-4; Aloma 8:17) M’yoyo Lisiku Lyakulamula nganiliŵa lya yakutendekwa ya lisiku limo, mpelaga kutyocela kundaŵi mpaka ligulo basi. Lili lya yaka 1000.

Mu yaka 1000 yeleyi, Yesu Klistu “tacilamula ŵandu wosope ŵacijumi ni ŵawe ŵakwe.” (2 Timoteo 4:1) “Ŵandu wosope ŵacijumi” taciŵa “likuga lya ŵandu ŵangaŵalanjika” ŵacacikulupuka pa Alamagedo. (Ciunukuko 7:9-17) Ndumetume Yohane ŵawenisoni “ŵandu ŵawe . . . ali ajimi pameso pa citengu” cakulamula. Mpela mwaŵaŵecetele Yesu, “ŵawile wosope tacigapikana maloŵe gakwe [ga Klistu] ni tacikopoka m’malembe [“gacikumbucilo,” NW],” mwakwajimusya ku ŵawe. (Yohane 5:28, 29; Masengo 24:15) Nambo ana ŵandu wosope tacalamula pakujigalila cici?

Mwakamulana ni mesomkulola ga Yohane, “mabuku galiji gali gawugulidwe,” kaneko “ŵandu ŵawe ŵalamulidwe malinga ni yiŵatesile, mpela muyalembedwele m’buku.” Ana gelega gali mabuku gaŵalembile yaŵatendaga ŵandu kalakala? Iyayi, kulamulaku ngasikujigalila yaŵatendaga ŵanduwo mkanawe. Ana yeleyi tukuyimanyilila catuli? Baibulo jikusasala kuti: “Naga mundu awile, nikuti jwalakwejo agopoledwe ku macili ga ulemwa.” (Aloma 6:7) Ŵacacijimuka kuŵawe caciŵa kuti Mlungu ŵakululucile yakulemwa yawo. M’yoyo, mabuku gagaliji gamawugulidwega gakwimila malamusi gane ga Mlungu. Kuti ŵandu ŵacacikulupuka pa Alamagedo, soni ŵacacijimuka kuŵawe catame ni umi kwangamala, akusosekwa kuti capikanileje malamusi ga Mlungu. Malamusi gelega gakupwatikapo cilicose cacacisala Yehofa mkati mwa yaka 1000. Yeleyi yikugopolela kuti ŵandu cacalamula mwakamulana ni yacacitendaga mkati mwa Lisiku Lyakulamula.

Mkati mwa Lisiku Lyakulamula ŵandu ŵajinji ŵanganalijiganyeje yakusaka ya Mlungu, cacikola upile wakulijiganya ni kutendaga yakamulana ni yacacilijiganyayo. Yeleyi yikulosya kuti kuciŵa masengo gamakulungwa gakwiganya ŵandu. Kusala yisyene, “ŵandu ŵacacitamaga m’cilambomo cacilijiganya cilungamo.” (Yesaya 26:9) Nambope, ngaŵaga kuti wosope cacitendaga yakamulana ni yakusaka ya Mlungu. Lilemba lya Yesaya 26:10 likusati: “Ŵakulemwa atamose ŵalosye kwanonyela mtima, ngasalijiganyakose cilungamo. M’cilambo ca ŵandu ŵagoloka ngasatenda yindu mwacilungamo, soni ngasawuwona ukulu wa Yehofa.” Ŵandu ŵakusakalaŵa cacawulaga mkati mwa Lisiku Lyakulamula.​—Yesaya 65:20.

Pambesi pa Lisiku Lyakulamula ŵandu ŵakulupicika caciŵa ŵamnama. Pandaŵiji ŵandu ŵacacikulupukaŵa caciŵa kuti ayikene pakuŵa wamnama, mpela muŵasacilaga Mlungu pandanda. (1 Akolinto 15:24-28) Kaneko Satana cacimgopola ku ukayidi wakwe ni kumkunda kuti ŵalinje ŵandu kakumalisya. (Ciunukuko 20:3, 7-10) Ŵangasakunda kuti Satana ŵasepusye caciŵa ŵakusengwa ni kwanilicikwa kwa cilanga ca m’Baibulo cakuti “Ŵakulungama cacipocela cilambo capasi. Ni cacitamaga mwelemo kwandaŵi josope.” (Salimo 37:29) Kusala yisyene, Lisiku Lyakulamula liciŵa lyambone mnope kwa ŵandu ŵakulupicika!