Ana Malo ga Ŵandu Ŵawe Gali Cici?

M’YIŴECETO yaŵayikamulicisye masengo pakulemba Baibulo, ŵakamulicisye masengo maloŵe ga Cihebeli gakuti sheʼohlʹ [shelo], soni ga Cigiliki gakuti haiʹdes [hade] kupunda ka 70. Maloŵe gosopega gakusasala yakwayana ni ciwa. Ma Baibulo gane gakusagopolela maloŵega kuti, “malembe,” “helo,” “lisimbo,” soni “malo ga ŵandu ŵawe.” Nambope, m’yiŵeceto yejinji mwangali maloŵe gagakusasala kagopolele kasyesyene ka maloŵe ga “Shelo,” soni “Hade.” Nambo ana maloŵega gakusagopolela cici kusyesyene? Kwende tulole mwagakusakamulila masengo m’Malemba gakulekanganalekangana m’Baibulo.

Pa Mlaliki 9:10 pakusati: “Kwangali masengo kapena ganisya kapena kumanyilila, kapena lunda, kumalembe kapena kuti malo ga ŵandu ŵawe [Shelo] kwamkwawulako.” Ana pelepa nikuti Shelo jikugopolela pamalo gasyesyene gatwasicile jwakunonyelwa jwetu kapena kumalembe? Iyayi. Baibulo pajikusala ya pamalo gasyesyene gatwasicile mundu jwam’we, kapena kumalembe, jikusakamulicisya masengo maloŵe gane ga m’Cihebeli, soni ga m’Cigiliki. Ngaŵaga gakuti sheʼohlʹ kapena haiʹdes. (Genesis 23:7-9; Matayo 28:1) Soni, Baibulo jangakamulicisya masengo maloŵe gakuti “Shelo” pajikusala ya pamalo gaŵasicile ŵandu ŵajinji, mpela malembe ga liŵasa, kapena lilembe lyaŵasicile ŵandu ŵajinji pampepe.​—Genesis 49:30, 31.

Sambano, ana “Shelo” kapena kuti malo ga ŵandu ŵawe gali malo gapi? Maloŵe ga Mlungu gakusalosya kuti “Shelo” kapena “Hade” gali malo gamakulungwa kupunda malembe ga ŵandu ŵajinji. Mwambone lilemba lya Yesaya 5:14 likusasala kuti Shelo kapena kuti malo ga ŵandu ŵawe, “galikusisye mnope, soni gawugwile mnope pakamwa pakwe.” Atamose mpaka tujile kuti Shelo jimisile kala ŵawe ŵangaŵalanjika nambo jikusawoneka kuti jangajikuta. (Miyambo 30:15, 16) Mwakulekangana ni malembe gasyesyene gampaka gakole malo gakusika ŵandu ŵakuŵalanjikape, “Shelo, soni malo ga conasiko gangajikutila.” (Miyambo 27:20) Shelo jangagumbala, soni jangali pakulecesya. M’yoyo, Shelo, kapena Hade nganigaŵa malo ganegakwe gakuwoneka ni meso, nambo gali malo gakuwanicisya. Naga ŵandu ŵane awile, yikusaŵa mpela ajawile ku malo gakuwanicisyaga.

Cijiganyo ca m’Baibulo cakuti ŵandu ŵawe cacijimuka cikusatukamucisya kumanyilila mwakusokoka kagopolele ka maloŵe gakuti “Shelo,” soni “Hade.” Maloŵe ga Mlungu pagakusala ya ŵawe ŵali ku Shelo kapena kuti ku Hade, gakusalosya kuti ŵawewo cacijimuka.a (Yobu 14:13; Masengo 2:31; Ciunukuko 20:13) Maloŵe ga Mlungu gakusalosyasoni kuti ŵandu ŵali ku Shelo, kapena ku Hade nganaŵape ŵaŵatumicilaga Yehofa, nambo kwanasoni ŵane ŵanganamtumicilaga. (Genesis 37:35; Salimo 55:15) M’yoyo, Baibulo jikusajiganya kuti m’bujomu “Kuciŵa kwimuka kwa ŵandu wosope ŵakulungama ni ŵangalungama ŵakwe.”​—Masengo 24:15, NW.