Ana Yipangiso Yamakono Yikusasokonasya Chamtuli Kaganisye Kawo?
Ŵandu ŵajinji akusalijiganya pakusaka kumanyilila yindu yine, kuti apate masengo kapenasoni pamagongo gane. Myoyo yipangiso yamakono mpaka yakamuchisye ŵandu pakulijiganya. Yipangiso yamakono yikwakamuchisya ŵandu kumanyilila yindu yejinji atamose ali chitamile pamlango.
Nambope, ŵandu ŵakusakamulichisya masengo mnope yipangiso yamakono . . .
yikusiyasawusya kuganichisya mnope yindu yakuŵalanga.
akusalepela kutenda chindu chimpepe pandaŵi jimo.
ngakusasangalalaga pali jika.
YAKUSOSEKWA KUMANYILILA
KUŴALANGA
Ŵandu ŵane ŵakusakamulichisya masengo yipangiso yamakono akusagamba kuŵalanga yindu mwakuwutuka kuti agambe kulola mfundo jekulungwa mu yakuŵalangayo.
Kuŵalanga kweleku mpaka kuŵe kwambone naga mundu akusaka agambe kupata kwanga kwa chiwusyo. Nambope kwangamkamuchisya mundu kujipikanichisya ngani jakuŵalanga.
YAKUSOSEKWA KUYIGANICHISYA: Ana akusakombola kuŵalanga ngani jelewu chamtuli? Ana yeleyo mpaka yakamuchisye chamtuli kuti apikanichisye yakulijiganya?—MISYUNGU 18:15.
KUTENDA CHINDU CHIMPEPE PANDAŴI JIMO
Ŵandu akusaganisya kuti yipangiso yamakono yikusapa upile wakutenda yindu yiŵili ndaŵi jimo. Mwachisyasyo, mpaka alijiganyeje kwineku ali mkwalembela achimjawo mameseji. Nambo naga akutenda yindu yejinji ndaŵi jimo, nikuti pangali yampaka yilondeche mnopemnope naga yakutendayo yikusaka kuŵichilapo mtima.
Atamose kuti yikusaŵa yakusawusya kuti mundu atendeje chindu chimpepe pandaŵi jimo, nambope kutenda yeleyi kukusakamuchisya mnope. Pakusala ya umbone wakutenda chindu chimpepe pandaŵi jimo, Grace jwajite, “Yikusakamuchisya kuti mkasokonasya yindu yejinji soni kuti mkalagasikaga mnope nganisyo. Nayiweni kuti yikusaŵa chenene kutenda chindu chimpepe pandaŵi jimo soni kuŵambala yakusokonasya yiliyose.”
YAKUSOSEKWA KUYIGANICHISYA: Ana kutenda yindu yejinji pandaŵi jimo kukusasokonasya pakulijiganya kapena kukumbuchila yalijiganyisye?—MISYUNGU 17:24.
PANDAŴI JALI JIKA
Ŵandu ŵane ŵangasangalalaga patemi jika pamalo gangali masegwe. Myoyo akusakamulichisya masengo yipangiso yamakono pakusaka kuti asangalaleje. Olivia jwatite, “Yikusangwana mnope kuti ngambe kutama kwa 15 minisi, ngakamulanga foni, tabuleti kapena kulolela TV.”
Nambope, mundu pali jika jikusaŵasoni ndaŵi jambone jakuti aganichisye mwakusokoka yindu yalijiganyisye. Sonitu yeleyi yikusaŵa yakamuchisya kwa ŵanache atamosesoni achakulungwa.
YAKUSOSEKWA KUYIGANICHISYA: Pali jika, ana akusakamulichisya masengo ndaŵi jeleji mwalunda?—1 TIMOTEO 4:15.
YAMPAKA ATENDE
ALIWUNGUNYE MWAKUKAMULICHISYA MASENGO YIPANGANYISO YAMAKONO
Ana mpaka akamulichisye masengo chamtuli yipangiso yamakono kuti aganisyeje chenene? Ana yipangiso yamakono mpaka yalepelekasye chamtuli kutenda chindu chimpepe pandaŵi jimo soni pakulijiganya?
MFUNDO JA M’BAIBULO: ‘Mlusunje lunda lusyesyene nambosoni ndamo jenu jakupakombola kuganisya chenenepe ya msogolo.’—MISYUNGU 3:21.