Mtela Wakamuchisya Kumalana ni Lusagu

Ŵandu ŵajinji akamulichisye masengo fundo syatusisasile mu ngani sipite sila. Yeleyi yakamuchisye kumalana ni mtima wa lusagu. Nambope kusala yisyene, pajika nganituŵa tukombwele kumalana kapena kutyosya mtima wa lusagu. Nambo ana lusagu luchimala kwene?

Boma jambone mnope

Maboma ga ŵandu galepele kumasya lusagu. Nambo ana yeleyi yikugopolela kuti pangali boma jampaka jimasye lusagu?

Kuti boma jimasye lusagu jikusosekwa kutenda yindu yakuyichisyayi

1. 1. Kwalimbikasya ŵandu kuti achenje kaganisye kawo, soni mwakusiŵawonela ŵandu ŵa mitundu jine.

2. 2. Kutyosya yindu yayikusiyatendekasya ŵandu ŵane kwatendela achimjawo yangali chilungamo.

3. 3. Kola achimlongola ŵangali lusagu.

4. 4. Kwatendekasya ŵandu ŵa mitundu josope kuŵa ŵakamulana.

Baibulo jikutusimichisya kuti Mlungu akwete boma mpela jeleji. Bomaji jikusakolanjidwa kuti “Uchimwene wa Mlungu.”—Luka 4:43.

Bomaji jichitenda yakuyichisyayi.

1. Kwiganya Ndamo Syambone

‘Ŵandu ŵa m’chilambomo chachilijiganya ya chilungamo.’—YESAYA 26:9.

“Ligongo lyakuti mundu jwalijose tachitenda ya chilungamo, mchilambo timuchiŵa mtendele ni bata mpaka ndaŵi syangamala.”—YESAYA 32:17.

Ana malembaga gakugopolela chichi? Uchimwene wa Mlungu uchajiganya ŵandu kutenda yindu yambone. Ŵandu pamanyilile yambone ni yakusakala, yachilungamo soni yangali chilungamo, kaganisye kawo pakwamba ya ŵandu ŵane kakusachenga. Myoyo, ŵandu wosope chachimanyilila kuti chakusosekwa mnope chili kwanonyela ŵandu ŵa mitundu josope.

2. Uchimwene wa Mlungu uchimasya yindu yangali chilungamo

Mlungu “tachapukuta misosi josope m’meso mwawo. Ngasipapagwa chiwa, chanasa, kulila, kapena kupikana yipwetesi. Yindu yakala yosope yeneyi yimasile.”—CHIWUNUKUKO 21:4.

Ana lilembali likugopolela chichi? Uchimwene wa Mlungu uchimasya yakusawusya yosope yayikusayika ligongo lya yindu yangali chilungamo. Ŵandu wosope ŵaŵalagaga ni yindu yangali chilungamo ngasakumbuchilasoni yakala.

3. Ulamusi Wambone

“Jwalakwe ngasalamula pakuya mujikuwonechela ngope, kapena kwalamula pakuya yakupikana. Nambo tachalamula ŵakulaga mwachilungamo, nipo ŵandu ŵakutulala m’mitima ŵa chilambo chapasi tachalamula mwangatenda lusagu.”—YESAYA 11:3, 4.

Ana lilembali likugopolela chichi? Yesu Klistu, jwali Mwenye jwa Uchimwene wakwinani wa Mlungu chachilamula mwachilungamo pa chilambo chapasi. Yesu akusajinonyela mitundu josope ja ŵandu, soni akusatusimichisya kuti ŵandu wosope pachilambo chapasi chachipikanila malamusi gakwe.

4. Mkamulano

Uchimwene wa Mlungu ukusiwajiganya ŵandu kuti aŵeje “ŵakwitichisyana nganisyo ni kunonyelana mwakulandana, kuŵa ŵa mtima umo ni chakulinga chimpepe.”—AFILIPI 2:2.

Ana lilembali likugopolela chichi? Mkamulano wa ŵandu ŵachachiŵa pasi pa ulamusi wa mu Uchimwene wa Mlungu ngasiwuŵa wakulambuchisya nambo uchiŵa usyesyene. Jemanjaji chachiŵa “ŵakwitichisyana nganisyo” ligongo lyakuti chachinonyelanaga yisyesyene.