Amanyilileje Yisyesyene

Chakusawusya Chachipali

Ndaŵi syejinji lusagu lukusatanda ligongo lyakupikana yindu yaunami. Kwende tulole yisyasyo yakuyichisyayi:

Mabwana gane gakusakulupilila kuti achakongwe nganaŵa akamwile masengo gagakusasaka kuganisya mnope soni machili.
Ŵandu ŵane mpaka ŵaŵenjeje ŵandu ŵakutyochela m’yilambo yine paganisya kuti akukamula masengo gakasosekwaga kukamula achimsyene chilambocho.
Ŵandu ŵajinji akusakulupilila kuti mundu jwalijose jwamlemale akusaŵa jwangasangalala soni akusatumbila chitema.

Ŵandu ŵakusakulupilila yeleyi akusakola yisyasyo yakusimichisya nganisyo syawo syalusagusyo. Soni akusaganisya kuti jwalijose jwangakamulana ni nganisyo syawosyo ali jwangamanyilila.

Fundo ja m’Baibulo

“Ngaŵa yambone mundu kuŵa jwangali umanyilisi.”—MISYUNGU 19:2.

Ana tukulijiganya chichi palilembali? Naga ngatukumanyilila yisyesyene yakwe mpaka tutende yindu mwakulemwecheka. Naga tukulupilila ngani syaunami m’malo mwakulupilila yisyesyene, tuchawona ŵandu mwakulemwecheka.

Kumanyilila Yisyesyene Yakwe Mpaka Kutukamuchisye

Naga tukumanyilila yisyesyene yakwamba ŵandu ŵane, nganituŵa tukulupilile yakusaŵecheta ŵane pakwamba ya ŵanduwo. Soni naga tukumanyilila kuti yakusaŵecheta ŵandu yakwamba mtundu wine wakwe wa ŵandu yili yaunami, mpaka tulinjelinje kumanyilila yisyesyene yakwe.

Yakutendekwa Yisyesyene: Jovica (Kummwela Chakungopoko Lyuŵa kwa Europe)

Jovica jwatumkolasile kundanda jula, jwakusile ali mkupikana ngani syakusakala syakwamba mtundu wine wakwe wa ŵandu. Nganisi syatyochelaga kwa ŵandu ŵa m’chilambo chakwe kupitila m’manyusipepala, soni pa TV. Jwalakwe jwatite, “Nombene natandite kuŵa jwalusagu soni natandite kwaŵenga ŵandu ŵa mtundu welewu. Soni nayiwonaga kuti pangali chakulemwecheka chilichose ni yeleyo.”

“Nambope, pinatandite usilikali, natamaga soni kamula masengo ni ŵandu ŵa mtunduwu. Mkupita kwandaŵi, nalijiganyisye yejinji pakwamba ya jemanjajo. Natandite kulijiganya chiŵecheto soni kupikanila nyimbo syawo. Natanditesoni kusangalala panatendaga nawo yindu, soni natandite kwawona mwakulekangana ni munawonelaga pandanda. Nambope, ngumanyilila kuti mpaka ndandesoni kwawona mwakulemwecheka jemanjajo. Myoyo, ngusiŵambalaga kupikanila ngani syakunyosya mtunduwu. Nambosoni jwangalolela mafilimu gagakusasala yakwanyosya jemanjajo. Ngumanyilila kuti lusagu mpaka lumtendekasye mundu kutumbila soni kwaŵenga ŵane.”

Yatukusosekwa Kutenda

Ŵandu mpaka ajile kuti mtundu winewakwe wa ŵandu uli wakusakala, nambo tukusosekwa kumanyilila kuti ŵandu ŵajinji ŵa mtundu welewo nganaŵa ŵakusakala.
Akumbuchileje kuti ngakumanyilila yindu yosope yakwamba mtundu winewake.
Alinjeje kumanyilila yisyesyene kutyochela kwa ŵandu ŵakudalilichika.